الخميس، 1 مارس 2018

هلا .. والعين ما تبحر سوا فالزين وعيونه ..
أناظرها تناظرني سلام وسالفة رحال ..

مشى قلبه على كيفه .. على شفَّه ومن دونه ..
تجاه الحب والذكرى وعوّد له عديم الحال ..

وراح يخايلك قمراه وجر الرمش مكنونه ..
جمالك سير الإحساس يمك يا طويل البال ..

تعالي بالقصيد اللي بهت في شاعرك لونه ..
تعالي في سماء صدري لوحدك دون قيل وقال ..

سحابة ما تميل الا على اللي فيه مفتونة ..
ولا تمطر سوا للي عليها من حلاها مال ..

ابكتب لين ما يروى شعور الزين وعيونه ..
مدام إنه يناظرني سلام وسالفة رحال .. !

الاثنين، 13 نوفمبر 2017

وش عليه إن هلت العبرة عليه ..

الشعور اللي تخبى في ضلوعك ..
وش عليه إن هلت العبرة عليه ..

أطلقيه إن كان ما يسوى دموعك ..
حتى لو يسوى دموعك أطلقيه .. !

-------------------------------

أنا تغير في طباعي لك كثير ..
ومو كثير إني عشانك آتغير ..

دام حبك في شراييني كبير ..
ما أبي في يوم أحس إني (صغير) ..

-----------------------------

والدعاوي مع صباح الخير بدري ..
كنها تمطر علي راحة وخير ..

ويزهر الإحساس لك في وسط صدري ..
غيري وأنتي طول عمرك فيني غير ..

---------------------------

أنا بعيوني غيرك أنتي ولا أشوف ..
الاك ياللي شامخه في عيوني ..

في مظهرك في مخبرك زينة وصوف ..
كنك قصيدي لارسمك بشجوني ..

والموقف اللي صار قد صار محذوف ..
ترا المسفه ما تحرك سكوني ..

أنا بعيوني غيرك أنتي ولا أشوف ..
الاك ياللي شامخه في عيوني .. 

الجمعة، 1 سبتمبر 2017

كل عام ووقت جداني بخير ..

كل عام وضيقة الخاطر بخير ..
أشعر إني في زمن ما هو زماني ..

أدعي الله ودني لين الأخير ..
للنهاية يمكن أعرف شيء ثاني ..

غير ماني عارفه يومي صغير ..
في طباعي وبسلوكي والأماني ..

ليه ؟
فـ صدور المجالس هالحقير ؟
وكيف ذاك الخزي برقبته يباني ..

وذيك بين الناس تنشر ما يصير ..
ولا أحد غيري يشوف ولا يعاني ..

كل عام ووقت جداني بخير ..
دامي أشعر هالزمن ماهو زماني ..

الخميس، 24 أغسطس 2017

آسره .. ما تختشين ؟

للشوق راوي في وجودي ولا باس..
من ضامه فراقي يجيني وأسلم..
أنا هنا ما أغيب لا غابوا الناس..
وأحس باللي جاء لو ما تكلم..

آسره، ما تختشين ..
ليش هذا الزين كله ؟ ..
ليش توك لي تجين ؟
بعد ما جف الشعور ..
وما بقى في حنين .. 

بس شوفك.. 
تعرفين ؟ 
يقطف الاحساس فيني ..
والمشاعر لك تمايل .. 
احكي احكي .. دام حكيك لي وتين ..
وضحكتك ترسم أماني ..
يا بعد هاك السنين ..

حلم .. والابداع قصه ..
والغزل شاعر حزين ..
يطيب .. 
يزهى .. 
كل ما تتبسمين .. !




الدمع لا حدر عليها من الشوق ..
ماهوب عيب الا فخر وآتباهى ..
حبيبتي بنتي لو العمر ملحوق ..
أترك حياتي وين تمشي وراها ..