الأحد، 26 ديسمبر، 2010

المساء ماهوب رايق .. !

تدري ليه الكون ضايق .. ؟
والمساء .. ماهوب رايق .. ؟
انا ادري .. !
.. والله ادري ..
غيبتك عني .. دقايق ..
ضيّقة صدر الوسيعه .. !
والمساء .. ماهوب رايق .. !
يا حبيبي .. 
ليه .. سميتك حبيبي ؟
مو عشانك .. تسوى عيني .. !
وأغلى من باقي سنيني .. 
واللي طآف ..
من سنيني قبل أشوفك .. 
ما أعدهـ من سنيني .. !
يا حبيبي .. 
مل صبري .. 
لي متى هذا السكوت .. ؟
والمشاعر باردهـ .. 
وأنت تدري ..
 الدفا لو كآن صوت ..
مات فيك .. 
وانا مدري .. ودك احيا او اموت .. ؟
ودك احيا او اموت .. ؟
يا دفاي .. 
وصوت عمري يـ اللي جاي .. 
ردني لك .. ضم صدري ..
عطني من صدرك هواي ..
لا أموت .. !

الأربعاء، 22 ديسمبر، 2010

رآحـ .. ـله .. من غير ليه .. !

راحله .. !
من غير ليه ..
.. ارحلي والله معك ..
والحنآن اللي أبيـه .. كآن ناوي يـجمعك .. !
لكن كلامك .. رآحـ ... لـه ..
... وانا حناني ضعت فيه..
ما قدرت أحكي .. معه .. ولا قدرت أحكي .. عليه .. !!!!
.. كيف تبغين أسمعك ؟
احطك بـ قلبي و ( اتيه ) .. ؟
او ادورني معك .. ؟
والله مدري ..
بس دامك راحله ..
.. ما ابي قلبي .. خذيه ..




كلن على ليلاه يسحب لحونه ..
وانا على ليلاي جريت لحني ..

يا ضجة الاحساس او يا سكونه ..
الليل من غير الحبيّب .. فضحني ..

دوني ودون الموت .. دوني ودونه ..
ان جاني احيا .. وان تركني ذبحني ..

بـ عيوني ألمح فرحتي في عيونه ..
والحزن بـ عيون المفارق .. لمحني ..

صحيح عاقل لكن أهوى جنونه ..
لـنه برغم البعد ما قد جرحني ..

طيّب .. وفي .. كله حنان .. وليونه ..
والخاطر الزعلان لـ رضآه محني ..

ما دام قلبي يستلذ بـ طعونه ..
بـ أسهر على ( فرقاه ) وأجر لحني ..




أنـا آسف .. !
.. ذكرتك أمـس ..
.... والمـفروض .. نسيـانك ..
نسيت أنسـاك .. !
... يـ اللي بـعد مـا صديت .. أنـا عآيش على ذكرآك .. !
واشوفك في زوايا البيت .. واسأل عني .. وش وداك .. ؟
قصدي كيف .. طاوعتك .. وخليتك تروح هناك ..
ايه هنآك ..
إلى آخر حروف الصمت ..
وانا بـ شفاهي اتحراك .. ؟
تجي كلمه ..
.. تجي جمله ..
تجيني صوت يتنهد .. إلى من لاح له .. طرياك ..

الأحد، 19 ديسمبر، 2010

جيتي بوقتك .. !

جيتي بـوقتك .. !
والله أعلم وش شعوري يوم شفتك .. 
احضنيني ..
واتركيني .. ارمي آهاتي فـ بختك .. 
ياهلا .. 
وينك من أول ..
توي ارتاح بـ حياتي .. !
واشعر ان لـ عمري قيمه .. 
يا عظيمه .. 
كيف غيرتي .. حياتي .. ؟
وابتسمت .. ؟
وانشفت دمعات عيني .. ؟
وبعد صمت .. داعب احساسي لهاتي .. و تكلمت .. ؟
ايه انا .. 
هـ الليله أكتب لك شعر .. 
من بعد .. آهات .. وسهر .. !
وألعب على طق المطر ..
مبسوط ..
ما دام القمر .. نآيم على صدري وله .. !
يـ الأوله ..
.. يـ التآليه .. 
... يـ الغاليه .. 
يـ أحلام عمر مطوّله .. ما تنتهي .. !
ولا تنّسي .. وتبقى إلى آخر رمق .. 
عايش .. وانا ميت بهآ ..
وان مت .. يارب الفلق .. في جنتك أعيشها .. !
أحبها ..
واليوم .. جتني بوقتها .. 
ويارب .. تبقى لـ الأبد .. !

الأحد، 12 ديسمبر، 2010

اصرخ بعد ما اسمعك .. !

اصرخ بعد .. ما اسمعك .. !
يـالـ ( أنت ) .. قصدي يـا ( أنا ) .. 
ضيعت عمري .. أجمعك .. 
حتى تملكني الـ ( عنا ) ..
زعلآن .. !
عادي .. كم على نفسي زعلت .. ابغى رضاك ولا رضيت .. !

اصرخ بعد .. ما اسمعك .. !
فجر بـ ضيقك كل صمت .. 
تخيل إن قلبي ( معك ) ..
والعفو .. لو عنك .. نمت .. !
المح سواتك في عيوني .. يا ما لك فجرت صمت .. وامتلى وجهي دموع .. ولا لقيتك .. !

اصرخ بعد .. ما اسمعك .. !
اندهـ حناني لو تبي ..
بلل يديني بـ مدمعك .. 
واوعدك .. اذوقك تعبي ..
ذق قسوتك .. !
انت اللي علمني القساوهـ .. حتى صارت بي حنان .. 

اصرخ بعد .. ما اسمعك .. !
نجم المحبه .. والصفا ..
من بعد ما هو ( يلمعك ) ..
ابشرك .. عني اختفى ..
ما عدت أشوفك لي حبيب .. ومن حياتي انتهيت .. اصرخ واذا أُرهقت .. غيب .. لـني عن صوتك سهيت .. !


الثلاثاء، 7 ديسمبر، 2010

اعترافات بريئه .. !

 اعترافات الأماني لـ الصحافه فبركه ..
واعترافاتي البريئه لـ الأمل حلم الصبور .. !

من فهم معنى كلامي لا يحاول يدركه ..
المغازي واضحه يا لايمي بين السطور ..

أولاً : عني بصوت الأرض صمت المملكه ..
يا سامع النمل ودبيبه .. من لنا غيرك غفور .. ؟

ارتكاب العبد ذنب .. ان تاب لك .. يستدركه ..
البلا بذنوب غيره لا غدت حوله تدور ..

ثانياً : بين الولد وعلاج أمه .. معركه ..
انتصر فيها المرض .. وامشوا معي لين القبور ..

نسأل امه يوم ماتت مسلمه او مشركه ..
الخطأ طبي ووارد بس ملينا القصور ..

ثالثاً : سعر الشعير أغلى من اللي يملكه .. !
والفقير يموت جوع ولا قرب فمه الفطور ..

عادي اصلاً دام ليله قاسي وما أحلكه ..
وش فرق عنده ليا من صار ما بـ العلم نور .. ؟

رابعاً : ساهر مسك من لا مسكنا يتركه ..
المهم العدل في تطبيق أنظمة المرور ..

احترمت السير طيب والشوارع مربكه ..
لي متى بـ امشي نظامي وآتعثر بالصخور .. ؟

خامساً لا سادساً لا سابعاً .. مستهلكه .. !
اعترافاتي البريئه ما لها غير الصبور ..

السحايب ناشفه والأرض مافيها بركه ..
والهوا ياللي نشمه ممتلي فسق وفجور ..

ما علينا خلاف حنا ذنبنا نستدركه ..
البلا بذنوب مبطي من حوالينا تدور .. !

الاثنين، 22 نوفمبر، 2010

هاتي شفايفك بـ شفافي .. !


مدخل :

ندهـ لي .. وقلت له لبيه .. !
وانا ما ألبي لـ غيرهـ ..
أحبه .. بس ما تكفي ..
أحبه .. أعشقه .. لا .. لا ..
أحبه .. أعشقه .. وأغليه ..



لبيه .. لبيه .. يا لبيه .. ناديني .. !
انا احس إني مسمّى على شانك ..

تدرين .. كنت أعشق اسمي قبل تلقيني ..
والحين احبّه كثر ما هو على لسانك ..

في صوتك احساس يطربني .. ويغنيني ..
وفي بحتك .. لحن عمري .. عزف لـ ألحانك ..

ما كني الا .. معك قصه وصغتيني ..
أعيشها بك .. وعمري صار عنوانك ..

امشي معك كيف ما ودك .. تمشّيني ..
مرسوم لك .. وأجمل الألوان ألوانك ..

يا عذبة الصوت .. معك الله معميني ..
عن شوف غيرك .. عساني فدوة احزانك ..

لا تستحين .. اقربي .. ناديت .. لبّيني ..
غمّي عيونك .. وضميني بـ احضانك ..

هاتي شفايفك بـ شفافي .. وخليني ..
استطعم اسمي بـ ريقك .. واطرف لسانك ..

عشان ألبيك لا صرتي تناديني ..
يـ اللي احس اني مسمّى على شانك ..



مخرج :

وش بي أطالع ؟ ..
أبد ..
مافيه شيء ..
بس أنا عطشان .. وألمح بـ الشفايف مشربي ..
ممكن اتصبين لي ؟
كثيييير ..
ما أبغى شوي .. !!

الثلاثاء، 16 نوفمبر، 2010

والحكايه توها تحلى معك .. !



في حياتي ..
ما أبي الا حنانك ..
يا حياتي .. وينك أنتي .. ؟
اسألك ..
.. وأعرف مكآنك .. أنتي بقلبي سكنتي ..
صح .. أنا أدوّر عليك ..
.. وأنتظر لمسة يديك ..
لكن أدري .. ما بعد جيتي حقيقه .. !!
في خيالي ..
.. شفتك أجمل من خيالي .. !
بسمتك .. تشبه عيونك .. !
... والأمل .. في بسمتك ..
يا بسمتي ..
ممكن بـ لحظه تجين .. ؟

..

قبل أعرفك ..
كان هذا .. هو سؤالي ..
... وأنتظرك بـ كل حنين .. !
اسمعيني ..
قبل مـ أنتي تعرفيني ..
كنت أعرفك .. !!
.. تذكرين .. ؟
كيف بـ أول يوم شفتك ..
قلت اسمك ..
يا عنود ..
.. وأنتي خفتي .. وانكسفتي .. !
وابتدآ نبضك يزود ..
والسؤال اللي فـ بالك ..
كيف يعرفني .. أنا .. وهذي اول مرهـ اشوفه ؟
قلت لك في وقتها .. أنتي وردهـ .. جابها الله في يديني .. !
لـ أجل اعيش .. اشمها ..
.. استحيتي ..
.. والصراحه ..
واضحه ..
من يوم جيتي .. ريحة الجنه .. معك .. يا وردتي .. !

..

لحظه .. لحظه .. !
نرجع شوي .. لـورآ ..
لـ اللقاء الحلو الأول ..
كيف كآن .. ؟
... لـ ابتسامات الحنآن ..
لـ ارتباكك .. لـ ارتباكي ..
.. لـ الهدوء ..
في ذاك المكآن ..
.. التقت نظراتنا ..
ولا كـأنه حولنا .. به نآس .. تدري عننا ..
والبحر سآكت .. وموجه .. منسجم معنآ كثيييير .. !
ينتظرنا .. نقرب شوي لبعض ..
ابتسمتي .. وابتسمت .. !
.. والحكي يبدآ بـ صمت ..
.. وجيتك أمشي .. ياللي ما حركت رمشي .. لين شفتك من قريب .. !
واحتضنـتك في عيوني ..
وش في لوني .. ؟
انخطف بك ..
يا جنوني ..
يا جنوني .. منين جتني الجرأه هذي .. ؟
ما اعرف ..
المهم .. عيني ترف .. وبشرتني بك عيوني ..
مرحبا ..
أهلين ..
كيفك .. ؟
.. أنتي كيفك .. ؟
خبريني .. كيف صيفك .. ؟
انسي كيفي ..
لأني والله .. من لمحتك ..
ارتجفت بـ عز صيفي ..
.. والدماء اللي بـ عروقي .. باردهـ من قو شوقي .. !
ما له داعي هـ السكوت .. !
احكي .. احكي ..
لا تخليني أموت ..
حتى أنا .. ماني مصدق ..
إني مـ أسمع أي صوت .. غير صوتك .. يا .. يا .. يا .. كيوووت .. !!
قم بسرعه .. !
.. وين أروح .. ؟
لا يشوفونك معي .. عاد والله يذبحونك .. !
.. يمه .. خفت ..
.. يا بعد هـ الكون كله .. فدوتن لك يذبحوني ..
مـ أنت صاحي .. !
يـ الله بآي .. أنا عنك بـ ابتعد ..
.. لحظه بس .. ممكن أهدي لك حكايه .. ؟
.. قالها عبدالحليم .. لي أنا .. طبعاً عشآنك .. !!
ايه ممكن .. بس اسرع ..
لـن ..
..  ادري .. لـن وقتك من ذهب .. !
.. وأنا عمري لك بـ ابيعه .. واشتري لحظه .. معك .. !
..... اسمعي ..
إيه .. اسمعك ..

" يا ولدي قد مات شهيداً .. من مات فداءاً لـ المحبوب "

هآت رقمك .. !
ياخي أعجبني .. جنونك ..
تبغى اسمي .. ؟
.... اعرف اسمك ..
.. يا عنود .. !!!
يمه منك ..
انتظرني ..
بآي ..
بآي ..

..


تصدقين .. ؟
... من مشيتي ..
ما قدرت اشيل نفسي .. من على الشاطئ واروح .. !
ماني مصدق خيالي .. كيف جيتي لي حقيقه .. ؟
ايه .. أنتي ..
كنت اشوف إن الملاك .. مستحيل تكون مثلك .. !
... وإن ربي ما خلق وحدهـ .. بـ حلآك .. 
المهم ..
أنا انتظرك ..
... وآآآهـ يـا ذا الانتظار ..
الثواني واقفه ..
وأنا أناظر سآعتي ..
ودي لو الوقت .. يسرع .. مثل نبضي يوم شافك .. !
لكن آسف .. قالها الليل الطويل .. انتظرها .. ليه مستعجل عليها .. ؟
يا رجل .. إسهر معي .. إلين ترجع فـتـنـتـك .. اللي خذت : نور القمر .. ريح الورود .. وبسمة الصبح الخجول .. !
سيدة كل النساء .. !
ما أحبك .. أنت مظلم .. روح خل الصبح يطلع .. !
.. ودي لكن .. لازم تعيش بـ ظلامي .. لـ أجل تعرف .. قيمة النور بـ حياتك .. !
يا حياتي .. وردتي ..
والأمل بـ أظلم جهآتي .. وين نورك .. ؟
أشرقت شمس الصبآح .. وبآقي الظلمه بـ عيني ..
جيت لك نفس المكان .. وما لقيتك .. ؟
... وين أروح .. ؟
رآح صوتي .. !
.. من كثر مـ اندهـ عليك ..
توني بـ أول غرامك ..
مـا أطيق الإنتظار ..

..

اتصلتي ..
بعدهآ بـ أسبوع .. ويوم .. !
... وأنا تذبحني الهموم ..
إيه .. صوتك ..
هذي هي تنهيدتك .. بحّتك .. هذا سكوتك .. !
يآ هلا بـ الغايبه .. انشغل بآلي عليك .. خفت ما اسمعك ثآني .. !
... يا هلا بك أنت .. أكثر .. لا تخاف .. بس أنا رحت لـ مكآني .. ؟
وش مكآنك .. ؟
... حاول تفكر .. وقل لي .. وين أنا ممكن أكون .. ؟
يا بعد سود العيون .. وبسمتي .. والانتهاض .. أنتي ممكن بـ الرياض .. ؟
... ايوه صح .. من علمك إني بهآ .. ؟
يا نورهـا .. يا قلب يكسيه البيآض .. ما يليق بـ حضرتك .. الا الرياض .. !
... وحضرتك من وين قل لي .. ؟
يـ أجمل .. أجمل .. ما حصل لي .. حتى انا منهآ .. وفيهآ .. وانتمائي صار اقوى لـ أنك أنتي .. منّهآ .. !
... بس يكفي .. لا تبالغ بـ الحكي .. ولو تبي علمني عنك .. وش تحب .. و ايش تكرهـ .. كم عمرك .. احكي بـ راحه وقول ..
أنا أعلنت الوصول .. لـ الحياة بشوفتك ..
عمري أنتي ..
وأنتي اكثر شيء أحبه ..
وأكرهـ الاشياء عندي .. غيبتك .. ليلي بدونك .. !
... طيب اسمك .. ؟
اسمي ... اول حرف فيه .. مثل أول حرف بـ إسمك ..
فكّري ..
.... عبدالاله .. ؟
صح .. صح ..
... بس أنا أبغى .. آقول : بودي ..
لبى كلك .. أنتي ناديني و ألـبي .. بـ اللي تحبي تنآدي ..
وأنتي طيب .. مشتهي أعرفك أكثر .. عمرك .. ولونك .. وعشقك .. ؟
... أنا عمري .. دون منك .. في ثلاث سنين يمكن .. !
... لوني المحبوب .. pink .. وما أحد بـ القلب يسكن ..
جت من الله ..
هذا هو اللي أبيه ..
ما لـ قلبك شخص غيري ..
بـ أمر ربي ورحمته .. تعشقيني مـثل مـ انا أعشقك .. !
... ليه لا ..
... أنت جرب ..
... عطني حبك .. عاطفك .. عطفك .. حنانك .. وأنا اشوف .. انت تستاهل غرامي .. او لا .. ؟
... آسفه .. طوّلت مرهـ .. المهم إني سمعتك .. وإني طمنتك علي .. انتبه لك .. يـ الله بآي ..
جعل ربي يحفظك .. اسمعي .. من يوم شفتك .. والتحفتك في عيوني ..
ضحكتك .. نظرك .. خجلك ..
التفاتاتك .. ذهولي بك إلين الحين بآقي .. لا بعد هـ الحين زآد .. !
لـن صوتك .. كل نبرهـ فيه قصه .. ودي احياها معك .. لمآ تحكي .. وأسمعك .. يا بعد صمت القمر .. !
يومك حلو .. ويا عسى عمرك طويل ..

..


افتحي عيونك عشآني .. !
اسمعيني ..
اذكريني .. كيف كنت بـ أولك ..
مآ أبيك بـ آخرك ..
تذكرين .. ؟
يوم قلتي بـ تعرسين ..
وأنتي كنتي .. تكذبين .. !!
لا تعآلي .. هذي بـ أحكيها عقب ..
خلي نرجع .. بعد ما كلمتك بـ عشرين يوم .. !
ثآني مرهـ .. فيهآ نحكي .. والحقيقه ماهي مُرّهـ .. المهم اني سمعتك ثآني مرهـ ..
اقتربنا شوي .. أكثر ..
والشعور اللي غشانا .. ابتدآ يكبر .. ويكبر ..
كنا نحكي بـ المساء .. إلين تشرق شمسنا .. والحكي يحلى بنا .. لا زاد عن حده وفاض ..
.. وغربت شمس الرياض .. وانتشينا من جديد .. !
إيه .. ادمنا بعض ..
وكل يوم أحكيك فيه .. يـ الحبيبه كآن عيد .. !
أنبسط به .. وأبتسم له .. حتى كنت أوله عليه ..
من أقفّل منك .. أرجع .. وأتصل بك ثآنيه .. ما كأني مكلمك .. !
يآآآهـ .. يا ذيك السنه .. !
أول سنه .. عاشت بنا ..
مدمنين .. انتعاطى حبنا .. ومن يلوم المدمنين .. ؟
تسمعين .. ؟
بعدها راحت سنين ..
وكنت أحبك .. موت أحبك ..
إلين يوم الدين .. أحبك .. بس ممكن تسمعين .. ؟
قلتي لا ..
... ما أبي أسمعك تحكي .. !
... اسكت ارحم ..
كان ودك ترحلين ..
وكنت أحاول أقنعك .. ودي إنك تجلسين .. !
يا حياتي .. ليه عني تغمضين .. ؟
هـ الحكي بـ رابع سنه ..
فتحي .. تتذكرين .. !
شوفي الدمع الحزين .. وأوعدك تتذكرين .. !
كآن بـ أول شهر سبعه ..
... وأحمد الله .. ما قدرتي .. تبعدين .. !

..

مدري وش بك .. !
أنتي مـ أنتي الأوله ..
فيك شيء .. بس وشو .. الله أعلم ..
يا عنود .. !
غصب .. أشوفك .. حتى لو ما تقدرين .. !
... ابشر بـ عزك حبيبي .. بدون غصب .. رآح أشوفك ..
إي متى .. ؟
... أنت حدد وقت أجيك .. أو تجيني .. المهم انّا انتلاقى ..
بس وين .. ؟
... بـ المكان اللي تحب ..
لكن ألحين رمضان .. !
... خلها بـ العيد طيب .. ؟
وأنتي عيدي ..
الوعد بيني وبينك .. ثالث أيام الفطر ..
اتفقنا .. ؟
... اتفقنا .. بس كيف .. ؟
ما عليك .. تعرفين السوق ذاك ..
... ايه اعرفه .. !
امشي لمه .. واتركي البآقي علي ..
راح الشهر .. !
والناس جاهم عيدهم ..
وانا باقي .. ما بعد ضميت عيدي ..
عدّا اول يوم .. عآدي .. !
... حتى ثاني يوم .. عآدي .. !
إلين ثالث يوم شرّف .. وانا ملهوف انتظر .. 
من عطيتيني وعد .. وانا يذبحني السهر ..
ما غفى جفني عشانك ..
احتري هـ اليوم يآتي .. عيد لي .. يا عيد كل المواعيد .. !
ابحتفل بك .. وانتشي .. واجمع تفاصيل الفرح من شفتك .. واغيب عن نفسي معك .. !
من كثر شوقي .. تصدقين .. ؟
قبل ما اصلي الفجر .. وانا عند السوق ذاك .. !
بس انتظر ..
بس انتظر ..
واتخيلك .. وانا معاك .. 
... واشوفني مهووس فيك .. !
لحظة اللي كنت اشوفك.. في خيالي .. 
اتصلت ..
مره وحدهـ .. 
انتظرت .. 
ثاني مرهـ ..
اختنقت ..
اتصل بك .. ما تردي .. !
.. وانا بس أصفق بـ يدي .. يا عسى ما بك خلاف .. !
بعدها بـ أسبوع .. صمت ..
مـ اذكر إني فيه .. نمت ..
اتصلتي ..
... مرحبا .. !
يعني كذا .. ؟
ما كأني .. مواعدك ..
مت خوف .. احسب إنه فيك شيء .. !
و ليه غبتي .. طمنيني عنك .. 
... اسكت ..
... لا تكمل .. انت سلم .. بعدها اشرهـ علي .. !
... ليه ساكت .. ؟
... بودي احكي ..
... يا حبيبي .. تكفى لا تزعل عشاني .. لـ اجل خاطر راحتي ..
... حاكني .. ؟
... طيب اسمع .. راح اقول الصدق لكن .. افهم اللي راح اقوله .. !
... انت اول رجل اعرفه .. وأنت آخر رجل أحبه .. وما أبي بعدك أحد .. 
... بس لكن ..
... انا مخطوبه لواحد .. مُجبرهـ أتزوجه ..
اسكتي ..
ما هو بـ كيفك .. !
لا ..
ولاهو بـ كيف أبوك .. وكيف أهلك ..
انتي لي .. وانا لك ..
... يا حبيبي .. هدي نفسك .. روق اعصابك شوي ..
ماني مهدي .. جنوني .. دامي حي ..
مستحيل اتخيلك لحظه .. بدوني .. عاد كيف اتخيلك مع شخص غيري .. ؟
يا عنود .. !
هذي كفي ..
امسحي دموعك يكفي .. 
والله مـ أتحمل دموعك ..
... يـ بعدي .. عبدالاله .. انت تدري .. ما هو بس انا احبك .. كل ما حولي .. يـ حبك .. !
... بس مـ أقدر .. لازم ابعد عنك .. نفسي .. خايفه وجودي يضرك .. !
ذا حكي .. ؟
اسمعيني .. ما يصير .. أنتي غيابك ضرر .. وانا دونك ما أبيني .. !
عيشي فيني ..
انبضيني ..
انا بك .. أعيش وأحيا ..
وان تركتيني .. أموت .. !
... يا عسى عمرك طويل .. ودّعتك الله ..
لحظه .. وين .. !
ما بعد خلص كلامي ..
... سيدي .. بعدين .. خلني بـ أجمع حطامي .. انتبه لك .. جعل ربي يحفظك .. !
ابشري .. جعلك بـ أمان الله .. وحفظه .. !

..

صـمت وكئآبـه .. !
... إنتظرتك بعدهآ ..
وينك أنتي .. ؟
اتصلتي .. ؟
مـ اتصلتي .. ؟
لا رسآله .. !!
لا خـبر .. !!
لا حس .. أو حـتى إجـابه .. !!!!
كـنت أعد .. !
يـوم وآحد .. لا أحد .. !!
أثنين ايضاً .. لا أحد .. !!!
لين مر اسبوع وأنا من غيابك ارتعد ..
خايف عليك .. 
وما احب انا احتريك ..
المهم ..
يـوم الخـميس .. !
... دق رقمك .. عشـت لحظآتي .. عريس .. !
احتفـلت بـ يآهـلا .. وينك أنتي .. اشتقت لك .. !!!
قـد السمـاء .. قـد الـنجوم .. وقد مـا عشت .. امهموم .. !!
واختنقت فـ بحـتك .. !
... حسيـت فيك .. امحزّنه ..
... يـا لا ..
وش فيـه ..
.. احكي .. 
هآهـ .. مدري .. !!!
ضآق صـدري .. وإرتبـكت .. !!
وبـعد مـا آنـا سـكت .. 
طار صوتك دآخلي ..
...  وانحنى له .. غصن جرح .. !
رفرفـت له .. عبرتك .. 
واستكـانت بـه دموعك .. 
إحـكي .. إحكي .. أسـمعك .. !!!
قولي هآنت .. ؟
.. أنتي هـمي .. !
الحكي بـ أطراف فـمي .. بآغتك .. ؟
لـ أني والله .. كـنت أعد .. !
وكـنت .. 
إسـكت .. 
.. واللي يرحم وآلدينك لا تـعد .. !
إنـتبـه .. لك .. !
.. غصب عني .. ملكتي يـوم ( الأحد ) .. !!!!

..

كذب .. !
ما صدقتي ..
والدليل انك كذبتي .. !
جيت لك قبل الأحد .. وما لقيتك .. !!
وين كنتي .. ؟
اسألك .. ردي علي ..
افتحي عيونك عشاني ..
جاوبيني ..
قولي يـالله وين كنتي .. ؟
ساكته .. !
خآيفه من ايش يعني .. ؟
انا معك الحين لكن ودي اجمع ذكرياتك ..
ذكّريني .. ؟
طيب انتي .. بـ العنايه .. صح كنتي .. وانا جيتك علّمتني عنك غادهـ .. !
ليه كنتي تكذبين .. ؟
ليه ما قلتي من أول .. يوم كنتي بـ تبعدين .. ؟
الخبيث .. !
الله وكيله ..
القدر ماحد يشيله .. لا رسى بـ اللي نحبه .. !
وانا مؤمن .. انحنى كله .. لـ ربه .. ما يخاف من الحياة .. !
دام ربه .. هو وكيله ..
يـ الحبيبه .. !
العتب ما هو بـوقته .. بس انا بـ قلبي كلام ..
قبل ما عينك .. تنام .. اسمعيه .. !
افتحي عيونك عشاني ..
المسيني .. حسي فيني ..
اتركيني .. احكي الماضي عليك ..
تسمعيني .. ؟
خوذي هذي ..
صادني مره ابوك ..
جيتك المشفى الصباح .. وشافني بـ ادخل عليك .. !
عصّب وصوّت علي .. هيه وين .. وين رايح .. ؟
قلت : آسف .. مو هنآ خالد رفيقي .. ؟
قال : لا .. انت اعمى ما تشوف .. اقر وش مكتوب فوق .. !
كآن اسمك .. بعده اسمه .. ودمعتي طاحت ورحت .. قبل يلمح دمعتي .. !
كنت انا دايم اجيك .. بس ما ادخل عليك .. ما يصير .. لـني ماني كنت محرم لك ولاني من هلك .. !
وابتدت ذيك المهمه .. !
مستحيله صح كانت .. بس صارت .. !
والحكايه توهآ تحلى معك .. !
شدي حيلك .. !
واطلعي نخطط سوا ..
وشلون نقدر نقترب .. ونكون واحد .. ما يفرقنا المرض .. !

..


المصيبه .. !
كنتي أنتي ما تبين ..
بحجة إن العمر مرهـ .. ودك تموتين وحدك .. !
وانا اعيش ..
وآتزوج وحدهـ غيرك ..
الله اكبر .. ما به انثى وقتها بـ عيني سواك .. !
حتى لين الحين ما به .. انثى غيرك في عيوني .. !
يا عيوني ..
ساعديني .. خلي يتحقق جنوني .. !
ايش .. ايش .. ؟
بـنتي بـ اسمك .. !
مـا ابي ..
ان كان ما جت منك بنتي .. ما ابي يجيني بنات .. !
ولا ابي حتى عيال ..
ولا ابي حتى اعيش بدنيتي .. لـحظه .. بدونك .. !
افتحي عيونك .. !
اذكري امي وابوي .. وغاده .. وامك وابوك .. !
ونقطة الوصل الجميله .. !
اختي ..
وقصة لقاكم كيف صغناها سوا .. !
يوم اضفتيها وكنتي تعرفين .. اش اسمها .. ووين تدرس .. عمرها .. واسلوبها ..
اول لقاء .. عادي مشى ..
ثاني لقاء .. عادي بعد ..
وقبل الاجازه .. اتفقتوا تلتقون .. !
بالجامعه طبعاً .. على انك .. طالبه بـ الجامعه .. !
حبتك مثلي وعجبها .. طيبتك .. شكلك .. هدوءك .. !
واقتربتوا شوي اكثر .. والحديث اصبح يطول بـ المسن ما بينكم ..
وانا في ذيك الاجازهـ .. كنت ابين رغبتي بـ العرس لـ أمي .. !
وان حكت لي .. وش تبيها .. ؟
اوصفك .. !
واختي تسمع ..
كني مدري من هي انتي .. !
يآآآآآهـ ياذيك البشارهـ .. يوم قلتي .. اختك اتصلت علي .. وخطبتني لك وانا من الفرحه رفضت .. !!!
يا جنونك .. !
ترفضين .. ؟
حاولوا بك من جديد .. !
كلموا امك .. وجوا لك ..
وافقي لا ترفضين .. !
جبت ابوي وجيت ..
لحظة اللي شفت ابوك .. انا استحيت .. !
احمد الله ما ذكرني .. !
راح عـ الموقف سنه .. من على بابك نظرني ..
انخطبنا .. بس لكن ما اتفقنا .. !
كآن ابوك بـ خاطرهـ .. يبغى يقول انك مريضه .. !
فيك كآنسر ..
ما يهم ..
كنت انتظر إنه يقول .. !
عشان ابين له .. وفآي .. وجيت شاري .. وارتجي من ربي خير .. !
بـ الاخير ..
اقتنع اني ابيك .. ومشتريك .. بـ كل يـ اللي كان فيك .. !
لكن اهلي .. تعبوني شوي معهم .. !
بس قوة حبك بـ قلبي وروحي .. ساعدتني .. واقنَعَتهم .. !
المرض ما كآن عائق .. !
والسبب .. ممكن علاجه ..
كآن بـاقي مـ انتشر ..
ولا بعد دمر كيانك .. !

..

أطرز من بياض القلب فستان وعساهـ يليق ..
على ألماسة الدنيا .. وتلبسني مع الفستان ..

هذآ البيت .. !
كآن بـ زحمة التجهيز ..
ارسلته .. مع اشواقي ولهفة عيني لشوفك .. بـ ليله ما بها غيري .. وغيرك يا عروس القلب .. !
افتحي عيونك ..
.. عيوني .. والله ما تسوى بـ دونك .. !
في شهر ٦ .. بذيك السنه .. كنت ارتْبك .. وارتّبك .. !
كانت اختي عنك تسآل .. مبطيه ما شفتها .. !
وكنت اكذب .. !
يعني .. انك انشغلتي ..
حتى قالت .. ما تجي .. لـ الجامعه .. ؟
وقلت يا عمري فصلتي ..
مـ انتي بحاجة دراسه ..
صدقتني .. !
وهذي الدنيا بـ صراحه .. !
كذبه منا .. وكذبه منا ..
المهم تكون بيضاء .. وعش حياتك .. !
مرت الايام تْحبي .. !
وأنا ودي لو تطير ..
ما بقى فيني صبر .. وانا انتظر .. انك تكوني لي مصير .. !
دقّت الساعه .. وحلمي بك تحقق .. !
انتظرتك ..
ابتسمتك ..
جت عيوني في عيونك .. واحتضنتك ..
كانت الدنيا كبيرهـ ..
يا أميرهـ في جمالك ..
في دلالك .. يا مثيرهـ ..
كآن أحلى يوم عشته ..
يـ اللي كل ايام عمري .. من عرفتك حآليه .. !
شهر العسل .. !
وأنتي عسل .. طول السنه ..
راح الشهر ..
وايامنا راحت معه ..
زي الهواء .. عدّت سنه .. ما هي سنه .. كانت مثل لمح البصر .. !
بـ المختصر .. وانا معك .. الوقت ما له وقت فيني .. طال او حتى قصر ..
عندك خبر .. ؟
ابشري .. عندي البشارهـ .. !
بس قولي .. ما اتحمل انتظر ..
( حبيبتك حامل .. حبيبي ) كانت مثل صوت المطر .. اروت ضمى سمع الـ أبو .. اللي يبي منك البكر .. !
ما افتكر .. في وقتها وش صار لي .. ؟
غير اني شلتك لـ السماء .. وقبّلت بطنك ..
يا عنود .. !
يا عنود .. ؟
يا عنود .. ؟؟
تذكرين أو ناسيه ..

..

هذا رآسي .. جبته أحكي .. بنتي سارهـ .. !
حتى هي ما تحكي لي ..
مثلك انتي صايرهـ ..
ما ترد الصوت مثلك ..
ياللي كنت اقول ودي .. شكلها يشبه لشكلك ..
افتحي عيونك عشاني ..
ناظريني ..
طالبك لا تحرميني ..
هاتي سارهـ ..
خاطري بس اشوفها .. احسها .. واحط عيني بعينها وابوسها .. واضمها .. مثلي وانا اضم امها ..
يا دمها ..
يا نبضها ..
وشلون اببكي روحها .. اللي رحلت قبل امها .. ؟
يا ليت لو تسمع كلامي .. وما تموت ..
يا ليتها ..
لا يـ ولدي ..
امسك يدي ..
قم معي .. ماتت خلاص .. !
لا تعذب نفسك اكثر .. ارفق بنفسك .. تصبّر ..
ادع ربك .. وارض بـ اللي لك مقدّر ..
خالي لا تكذب علي ..
هي نايمه ..
صدقني بعد شوي تصحى ..
.. يا عنود ..
يـا حيــاتي .. يـ الحبيبه ..
يـ ام سارهـ ..
اسـألـكـ بـ الله ردي ..
لا تمـوتي ..
لا تمـوتي ..
افـتحي عيـونكـ عشـاني ..
افـتحيـهـا ..
.. اتركـوهـا .. باقي حيه ..
.. اتركـوهـا .. شوي وتصـحـى ..
لين شالوا جثتكـ .. 
ومعك شالوا حتى سارهـ ..
وانا بس اللي تركوني .. 
مدري وش ابغى بحياتي .. من خذوكم عن عيوني .. ؟
والحكايه .. مالها معنى بدونك .. 
.. ليه خلتني عيونك .. ؟




الاثنين، 11 أكتوبر، 2010

يا وداع الدروب .. !

أكذب على نفسي ليآ حل طاريك .. !
وأقول : طيب عقب فرقآ حنانك ..


لكن قسم بالله .. وان قلت مابيك ..
ابكي على فرقاك .. واسهر عشانك ..


يا وداع الدروب .. أخلفت كل الدروب .. !
مطلع البيت هذا .. شب فـ الصدر نار ..

قد سمعته لـ أخوي .. وكنت أحس بشحوب ..
بين وصل ومفارق .. مـ أتخذت القرار ..

لكن الله وأكبر .. غبت عنه امغصوب ..
اما قلبي عليه .. امن الفراق استخار ..

يعشقه في غيابي .. كثر ما كنت اذوب :
في رضاه إن زعل .. والحب فض الشجار ..

واحتضنا بعض .. من عقب صمت القلوب ..
وابتدا النبض يحكي .. كَنْ ما شَيء صار ..

الا اكثر .. واكثر .. من هموم الشعوب .. !
والدموع الحزينه .. والأماني الصغار ..

ما ألومه لـ أني .. لو بغيته .. يتوب ..
تآب عن حب غيرهـ .. وأعلن الإنتصار ..

ماهو مثلي خسرت الحب .. حزة غروب ..
وانطفت شمس عمري .. ليل فجر ونهار ..

الظلام بشمآلي .. والعنا بـ الجنوب ..
والجفاف بقفآي .. ولوعة الإنكسار ..

مالي الا الأمام .. وحاجتي لـ الهروب ..
تقضي إني اجي له .. ما بهذي اختيار ..

وأودع القلب أمانه في يدينه .. ذنوب ..
تطلب العفو منه .. لحدة الإنهيار ..

والا أنا لـ الدروب .. ويا وداع الدروب ..
دام قلبي معه .. ما عاد بـ الصدر نار ..


ينسآني الهم لامني تذكرتك .. !
وأغيب عن كومة أحزاني .. بذاكرتي ..

عآد انت يا ليت تلقآني .. بذاكرتك ..
وتعود لي من قبل .. لا يحترق كرتي ..

السبت، 9 أكتوبر، 2010

تبغى الصراحه ؟

كيبورديه قصيرهـ .. !
 

حـه .. !
.. حـه .. !
وش قلت ..
.. أنت تبغى الصرآحـه .. ؟
ما سمعتك ..
ارفع شويات صوتك ..
يمكن أسمع ..
وش تقول .. ؟
في بعآدك عني .. رآحه .. !!!
ياحبيبي .. اصصصصص ..
ولا كأنك .. قلت شيء ..
لكن اقرب ..
... عطني اذنك ..
تدري إني فاقدك .. ؟
.. والـعمر ما يسوى بـ دونك .. !!
كنت أحسبك .. مت .. لكن .. أحمد الله .. إن أنت حي .. !
والجروح اللي بغيابك ..
.... بآقي شوي .. وتطيب .. !
احتضني ..
.. لا تخاف .. ما هو عيب ..
قد حضني الهم .. قبلك ..
... واحتواني من قريييب ..
لكن بـ هاللحظه هذي ..
أنت متربع مكآنه .. وما أبي عني تغيب .. !!
ما أبي عني .. تغيب ..

السبت، 2 أكتوبر، 2010

ارتويها .. بس لكن مـ اكتفيها .. !

يا قلم .. !
اكتب ( سعادهـ ) ..
عن بدايات الألم ؟
.. لمآ كنت إنسان .. عآدي .. 
عاقل .. ومجنون هآدي ..
لمآ كآن القلب .. خآلي ..
وإلتقاها في خيآلي ؟

يا قلم .. !
ممكن .. أكيد .. 
إني ابدأ من جديد ..
.. وأنفض أجواء الكتآبه ..
دون أشواق .. وكئآبه ..

يا قلم .. !
لونك .. سماوي ..
.. والحبيبه .. لي سحآبه ..
والجفاف بـ أرض قلبي ..
..... هذي ما فيها غرآبه .. 

يا قلم .. !
بسمة شفاها .. 
شوقها .. لهفة بكاها ..
حضني الدافي .. لهآ .. 
ما ذكروك بـ أي شيء ؟

يا قلم .. !
عيني عليها .. 
.. يوم تندهـ لي .. وأجيها .. 
وأرتشف من ريقها .. طعم الحياة الحاليه ..

يا قلم .. !
اذكر معي .. 
رعشة ضلوعي في يديها ..
... لمآ اتساقط عليها .. مثل أوراق الخريف ..

يا قلم .. !
لا مستحيل .. 
الضمى .. ما ينسى .. 
وارتواءات المسآء ..
اذكر معي .. 
وشلون كنت اشرب حلاها .. !!
.. وترتويني من ضماها ..
وأرجع أعطش من جديد .. 
وارتويها .. 
بس لكن .. مـ اكتفيها ..

يا قلم .. !
عطشان مثلي .. ؟
.. ما عليه .. اصبر عشاني ..
أو .. حط نفسك في مكاني ..
تلتقيها في خيآلك ..
... تبتسم لك ..
.... ولا تخليك بـ لحالك ..

يا قلم .. !
اكذب علي .. مثلي وأنا افضفض عليك ..
واكتب سعآدهـ لي .. ولك ..
لين ربي يرزقك .. بـ اللي ترد الروح فيك .. !
.. وبعدهآ .. 
اصدق معي ..
.. واصدق معك ..
ونعيش فعلاً هـ السعآدهـ ..

الخميس، 30 سبتمبر، 2010

تعبت أكبت .. وأنا أبلع ضيقتي وأسكت .. !




حبيت قبلك ..
وبعدك ما قدرت .. أعشق .. !
 .. يـ أجمل حكآيات حبي .. وآخرها ..
وينك .. ؟
ذبحني الشوق ..
وأيامي .. بدونك مـا تصورها .. 
صبآحاتي مثل ماهي .. 
كئيبه .. ما تبي غيرك .. 
.... ونجوم السماء .. هجرك من الأشواق .. خدّرها .. 
أنا عني وش أحكي لك ؟
... وش أبدي لك .. ؟
بـ أي شعور تبغآني .. ألم أحزاني .. وأنثرها .. 
ملامح وجهي الذابل ؟
حنين ضلوعي لـ صدرك .. ؟
عيوني لا بكت شوفك .. ولـ أجلك قمت أصبرها .. 
وأقول : يجيك لا تبكين .. 
وإن راحت عليه سنين ..
... خواطرنا بـ يجبرها .. مثل مـ الوقت كسّرها .. 
ترآ غصبـ(ن) على نفسه .. !
غيابه .. ما هو بكيفه ..
أنا ادري فيه يا عيني .. يحب إنك تشوفينه .. 
مثل ما هو يـ حب إنه .. دموعي بك يناظرها .. 
.. وأنا أحكي له عن اشواقي ..
الا من داعب أعماقي .. وقال : الحب وش وضعه ؟
عسى بعدي عشقت كثآر .. ؟
.. ومن قبلي .. وش اللي صار .. يحبونك إلين ألحين ؟
أو باقي مجافينك ؟
وأنا أبلع ضيقتي وأسكت .. 
وهو يرحل ... بدون إحساس .. 
قسم بالله ياعيني .. تعبت أكبت ..
تعبت أكبت .. تعبت أكبت ..
كفآيه ما بقى بي صبر ..
ابندهـ له .. أبي يرجع .. 
أبي لحظه أجي بصدرهـ .. وأفجرها ..
حبيت قبلك ..
وبعدك ما قدرت .. أعشق .. !
 .. يـ أجمل حكآيات حبي .. وآخرها ..


الجمعة، 24 سبتمبر، 2010

في كل وادي يهيمون .. !

من الأرشيف .. !


المـشـاعر ..
في زمـن .. كـاتب وشاعر ..!
بـهرجـة حـكي الغـزل ..
وإنهـمـاكـ المـغرمـات ..
كذب .. مـع طيش وفشل ..
وإنـتـهـاكـ الـطيـبـات ..
فـ البـدايـه ..
أنـتي عـندي كل شيء ..
أعشقـكـ حـد الـسـماء ..
.. يـكذب بـحـنكـه وحيـطـه ..
مادرى هـ الرب حي ..
وعـالمـ(ن) في كـل نيـه ..
حـبـتـه من قلب صافي ..
وإنتهـكـ قـلب الضعـيفه ..
فـ النـهـايـة ..
راح عـنـهـا .. لـ أنهـا وحدهـ غبيـه .. !
مـا درت عـن زيـفـهم ..
يـلـعبـون بـ حرفـنه ..
لـيـن ( تصبـح مـن حـطام ) ..
والذليل المسـتعـز ..
راح يـبحـث عـن جديدهـ ..
يكذب الكذبـه مـعـاهـا ..
ويـدفن اللي مـا خذاهـا ..

الثلاثاء، 21 سبتمبر، 2010

يتزخرف النص بـ دموعي .. !

يا دموع الحزن يكفي .. ما بقى بـ العين روح .. !
تحتمل ضيم الحياة .. القاسيه يا عينها ..

افرحي .. والعمر مرهـ .. ممكن بـ لحظه يروح ..
وتنطوي صفحة بنيه .. مـ أهتنت بـ سنينها ..

وسعي صدر الحبيبه .. لا تضايقه .. الجروح ..
وانشفي من قبل تبكي .. عسرها مع لينها ..

واتركيها تبتسم .. وتشيد الفرحه صروح ..
وتحتمي عن حزن والله ما يليق بزينها ..




العيون أوراق .. ودموعي حروف ..!
والفرح مدعاة لـ أجواء الكتابه ..

والبكاء ماهو على حسب الظروف .. !
إنما يآتي بلا مـ أحسب حسابه ..

مثلما عني رحلتي دون خوف ..
والمحاجر امتلت ضيق وكآبه ..

عشت فترهـ .. ليلها كله خسوف ..
والطيور فـ صبحها عاشت غلابه ..

من جفاهم منهلك جوني ضيوف ..
ينشدوني عنك .. ( لو حتى سرابه ) .. !

وأنا آسف .. قلتها بـ كثرة حلوف ..
إني مـدري وين رحتي يا سحابه ..

لكن أدري إن لي ربـ(ن) عطوف ..
ما يخيّب ظن عبده لـ انتخى به ..

يا كريم ويا ودود ويا رؤوف ..
انا فاقد عقل فـ ألهمني صوابه ..

وهذا ربي جاب عقلي يـ الهنوف ..
والجنون بـ طلتك أعلن ذهابه ..

عاد شوفي .. من غيابك وش أشوف .. !
أو بلاها .. ما أبي نفس الرتابه ..

ليه أضيق خاطرك .. واحنا وقوف ؟
اقربي بـ أحضنك مافيها ذرابه ..

لين جسمي يتلحم بك .. والسيوف ..
ما تفرق بـين محبوب .. وغيابه ..

والسؤال اللي حوالينك .. يطوف ..
عن سبب هـ الدمع .. بـ أعطيك الإجابه ..

البكاء ما هو على حسب الظروف ..
إنما يآتي بلا ما أحسب حسابه ..



بـ الاشارهـ فهمتي .. عادتك يا لبيبه .. !
تفهمين العيون .. ودمعها قبل يذرف ..

لاتقولين وش بك .. دامك أنتي قريبه ..
الفرح في عيوني .. نص بـ الدمع زُخْرِف ..