الثلاثاء، 7 ديسمبر 2010

اعترافات بريئه .. !

 اعترافات الأماني لـ الصحافه فبركه ..
واعترافاتي البريئه لـ الأمل حلم الصبور .. !

من فهم معنى كلامي لا يحاول يدركه ..
المغازي واضحه يا لايمي بين السطور ..

أولاً : عني بصوت الأرض صمت المملكه ..
يا سامع النمل ودبيبه .. من لنا غيرك غفور .. ؟

ارتكاب العبد ذنب .. ان تاب لك .. يستدركه ..
البلا بذنوب غيره لا غدت حوله تدور ..

ثانياً : بين الولد وعلاج أمه .. معركه ..
انتصر فيها المرض .. وامشوا معي لين القبور ..

نسأل امه يوم ماتت مسلمه او مشركه ..
الخطأ طبي ووارد بس ملينا القصور ..

ثالثاً : سعر الشعير أغلى من اللي يملكه .. !
والفقير يموت جوع ولا قرب فمه الفطور ..

عادي اصلاً دام ليله قاسي وما أحلكه ..
وش فرق عنده ليا من صار ما بـ العلم نور .. ؟

رابعاً : ساهر مسك من لا مسكنا يتركه ..
المهم العدل في تطبيق أنظمة المرور ..

احترمت السير طيب والشوارع مربكه ..
لي متى بـ امشي نظامي وآتعثر بالصخور .. ؟

خامساً لا سادساً لا سابعاً .. مستهلكه .. !
اعترافاتي البريئه ما لها غير الصبور ..

السحايب ناشفه والأرض مافيها بركه ..
والهوا ياللي نشمه ممتلي فسق وفجور ..

ما علينا خلاف حنا ذنبنا نستدركه ..
البلا بذنوب مبطي من حوالينا تدور .. !

هناك تعليقان (2):

  1. ماشاء الله الأبحار في حرفك ينسيني كل شي == فهيت بمدونتك ونسيت الغدى خخخخخخخخ خلاص اعزم اهلي على حسابك .. ياملحك يابو سارة الله يزيدك من فضله ==

    ردحذف
  2. السحايب ناشفه والأرض مافيها بركه ..
    والهوا ياللي نشمه ممتلي فسق وفجور ..

    ما علينا خلاف حنا ذنبنا نستدركه ..
    البلا بذنوب مبطي من حوالينا تدور .. !


    ^
    ^

    والله إن هالبيتين بسسس [ عن ديوآ آ آن ] "

    صح لسآنك يَ رآعي الجزله ..

    * الله يلوم اللي يلومك و مآ اقول غير

    يزينهآ ربّك وانا اختك =)

    تحيتي /

    .... [ الـوآيـلـيّـه ~

    ردحذف

سيتم إدراج تعليقك بعد الموافقة عليه وشكراً،