الخميس، 31 مارس، 2011

من هنا وهناك .. !

يذوب برد الشوق في نار وصلك .. 
وارض الضمى .. تروى من غيوم لقياك .. !


يا غايبه .. 
مليت ..
وضلوع صدري من سبب غيبتك عني .. ذايبه .. !



مبطي وأنا قناص واحب طيري .. 
والصيد .. لامنه تهيا .. قنصته ..

والحين من شانك فـ البلاك بيري ..
ما غيرك بـ لستت حبيبك .. اضفته .. !

تبطين .. وأبطي لو تخليت عنك .. !
كم لي وأنا اقاوم ملذات غيرك ..


غصب الدموع تخط فرقاك بـ الخد .. 
واقري عذاب العين .. من عقب فرقاك ..

قلتي برب وصبري اليوم .. من جد ..
مبطي وهو ينطر تقولين لي .. باك .. !


تدري ( صباح الخير ) ماهيب حلوه ..
لامنها جتني .. على لسان غيرك .. 

حتى أحس الشمس تبكي بـ قسوه ..
كله عشان الصبح ما ذاق خيرك .. !


عشيقك ..
لـ أنجرح من دنيته ..
 يبريه ريقك .. !

أرسلت ( بنق ) وما تخيلت ردك ..
يبطي علي هالقد .. يا مايس القد ..

تدري قسم بالله ما اطيق صدك ..
تكفى بسرعه لا طلبتك .. علي رد ..

الأحد، 27 مارس، 2011

هدوء وصمت .. !

هدوء .. وصمت .. !
يعم اجواء .. تفكيري ..
على غيري .. تشطر يا زعل لا نمت ..
والا ليه ..
تعال بـ سمت ..
وزَعّل حتى أحلامي ..
حرام تروح ..
وتملى هـ القلوب جروح ..
وتتركني .. أحس بـ غمت .. !
كثير اشياء ...
بدونك ما لها داعي ..
ملامح بسمة شفاهي .. اذا ما جت على عبرهـ .. حرام استوطن اوجاعي ..
دموع الغيم .. لو ما هَلّت بصدري .. وسقتني لـ حد اشباعي  ..
حبيبي المبطي بروحي .. كثر ما غاب عن عيني .. واحسه يلوي ذراعي ..
عرفتك ..
من وانا توي .. صغير ..
وعشتك بـ احساس غير ..
ليه قلي معك أحس إني بـ خير .. ! ؟

الخميس، 24 مارس، 2011

حلو الشعور ؟

ظروف .. وفَرَّقَتْ قلبين .. كانوا بـ المرآيا دوم .. !
لا والله .. قلوب كثار .. صمت النبض فرَّقها ..

من المسؤول ؟ ..
.. ما أدري .. ولكني إلين اليوم ..
رُغم ( الهجر ) يا وجه المرايا .. باقي أعشقها ..

أحن لـ ذكريات الصبح .. لا جافت عيوني النوم ..
.. وأتمنى لو إن أحلامي .. التوفيق حققها .. !

هنآ ..
كان ( الشعور ) .. أحلى من البسمه .. على المهموم ..
وسيعه كانت الدنيا ..
...... وعلينا الوقت .. ضيَّقها .. !

ضاع الشعور وما بقى بـ القلم روح ..
لا طعم بـ اشعاري ولا لون بعدك ..

أحاول أكتب عن بقاياك وأبوح ..
بس المصيبه لا تذكرت ردك ..

يومي طلبتك .. لا تزيديني جروح ..
قلتي وعد .. يا للأسف وين وعدك ؟

رحتي ..
ودمع العين .. بـ الخد مسفوح ..
مع إن مابه شيء لـ البعد حدك ..

خنتي ..
أو إن الصدق خانك .. ومسموح ..
مابيك لي تحكين أسباب .. صدك ..

أنتي تعالي .. والخطا منك مدموح ..
لـتبررين القصد .. مفهوم قصدك ..

يكفي حديث غياب .. وابياتي تنوح ..
يكفي غرق .. ما بين جزرك ومدك ..

الصبح مثلك .. هادي اليوم مملوح ..
جوهـ حميمي .. وآتمناك وحدك ..

تبدينه فـ ضحكة .. غزل .. صوت مبحوح ..
وتْقَرّبَ الأشواق قلبي بـ يدك ..

ونهيم بين الجد .. وشوية مزوح ..
ومن التعب .. يرتاح صدري .. بخدك ..

إلين ذاك اللي فقدته .. مع الروح ..
أقصد شعوري ..
بالمحبه يهدك .. !




صباح الخير يـ ( الماضي ) .. !
... و يا أطلال ضحكتنا ..
صباح الشوق لـك وحدك .. و من غيرك له بـنشتاق .. ؟

أنا و قلبي و سواليفي ..
و نبض الشعر .. و المعنى ..
على حطة يدك باقين و إن كثروا لي العشاق .. !

أحبك كثر ما حبوا قصيدي عن محبتنا ..
أو أكثر من حروف فراقك اللي تبَكّي الأوراق ..

قدر .. و الا ظروف العمر لو ما كان حدتنا ..
لـ اقضي ما بقى بعمري على حضنك بـدون فراق ..

قول : آمين ..
جعل الله في جنته يجمعنا .. !
.. لأن العيش بـ الدنيا ورب البيت ما ينطاق .. !

السبت، 19 مارس، 2011

كويتي .. إيه .. على راسي والله .. !




لو سمحت ..
.. ممكن بس ..
سم .. ؟
روح لـ الجهة الثانية .. عشان ما تتسبون في زحمه على هذا الرصيف ..
ابشر .. ما طلبت شيء .. !


( عسكري .. يتكلم معي .. وصاحبي لـ تنظيم المرور .. لكن لحظه .. )


أنت كويتي .. ؟
إيه طال عمرك ..
على راسي والله ..
تسلم .. ويسلم راسك ..
.. إلتفت على صاحبي .. وقال أنت وش اسمك ؟
علامات استفاهم على وجوهنا ..
ليه تسأل ..
ياخي انا اعرفك .. شايفك .. مشبه عليك ..
.. انا همست بـ اذن العسكري .. ( يشتغل فـ الخطوط ) .. !
ايووه .. بس عرفتك .. أنت فلان الفلاني ..
ايه ..
هلا .. ومرحبا ..
.. وبدا مسلسل الكلام الروتيني .. إلى أن ..
ختم بـ .. حياكم الله ضيوف عندنا .. وشرفتونا .. وخوذوا راحتكم ... !!!!!!


ماشي ماشي ..
اليوم بعد صدور عدد من الأوامر الملكية ..
انتظر الطلاب إلين قالوا .. ترا بكرا اجازه .. !


شيء حلو ..
.. والإجازه .. نستمتع فيها .. بـ النوم .. بـ الراحه .. بـ كسر الروتين .. !
لكن ..
مو بـ ( ...... القوسين ما تكفي ..... )


على غير العادة ..
اتصلت على ابن عمي ..
( أنت في الاستراحه )
- لا أنا في طريق الـ مدري ايش .. " المهم انه من طرق شمال الرياض "
( وش عندك .. تعال الاستراحه جايب هارديسك فيه ..... )
- لا .. لا .. لا .. وينك .. وينك .. امش لا يفوووتك .. بنات فـ البانوراما .. ويرقصون .. وهجوله موب طبيعيه .. !
( سلامات .. عسى خير .. لا يكون الهيصه هذي كلها عشان قرعة ابطال اوربا ؟ )
- ياخي انت وش يعرفك .. بكرا اجازه .. بكراااا اجازه .. فللله .. !
( سم ! .. طيب .. ؟ )
- ايه بكرا اجازه .. والناس محتفلين عشان بكرا اجازه .. خل عنك كثرة الحكي وتعال لمي عند المكان الفلاني ..


* وصلت إلى نقطة الالتقاء ..
وقفت سيارتي ..
انتظرته .. انتظرته .. انتظرته ..
فـ الحقيقه .. ما تأخر علي .. الا نصف ساعه ..
المهم ..
ركبت معه ..
وكيف الحال .. ما كيف الحال ..
زحمه ..
ياخي حراام عليك .. وش هالزحمه ..
شف شف .. يرقصون ..
لا ..
منتهييين .. ناظر .. يرقصون قدام العائله .. ومعهم ابوهم .. ومطلعين المعروض .. !
والله ما يستحون ..
ما علينا ..
وانت كيفك .. اخبارك ..
صادق انت .. كل هالزحمه عشان اجازه بكرا ..
ايييه ابن عمو .. خل الشعب يستانس ..
ماشي ما قلت شيء .. بس المفروض تكون الفرحه بحجم الخبر .. او الخبر بحجم الفرحه ..
والاحتفالات هذي .. لو ما اعرف انهم يحتفلون عشان اجازه .. كان قلت اسوء الاحتمالات جايبين كاس العالم .. او .. او .. او ( مشفر )
اقول لا يكثر .. وتسوي لي فيها انا العاقل .. انقز ورا دور علم اي شيء نبي ننبسط مع الناس وش ورانا ..
هههههههه طيب طيب ..
تصدقون ..
حست المرتبه اللي ورا .. ما لقيت الا شماغ .. ومو مصدقني ..
وقف السياره عشان يدور بنفسه ..
فعلاً .. مافيه شيء ..
فتح الشنطه حقت السياره .. وما لقى الا علم الكويت .. !
وش رايك .. ما وش رايك .. تدري ..
هاته هاته ..
رزيناه على الباب اللي ورا .. ومشينا ..
سبحان الله ..
علم الكويت بصراحه .. له جاذبيه غير طبيعيه .. !
تصدقون ..
كل الناس تحكي معنا .. وتضحك معنا .. حتى ترقص لنا .. !
نافذتي مقفله ..
.. فتحتها ..
هيييييه .. هييييه .. أنت ..
التفت عليه .. لبيه ؟
كويتي .. ؟
إيه ..
على راسي والله .. !!
تسلم ويسلم راسك ..
الجميل في هذا العلم .. اللي وقعنا عليه بالصدفه ..
انه خلى سوقنا يمشي عند الجنس الناعم ..
ابتسامات .. وهتافات لـ الكويت .. وآه .. فديتكم يا هل الكويت .. !!
تبون الصدق ..
تمنيت اني كويتي .. !
لكن تذكرت ذولاك اللي يقولون ( عنز البدو تحب التيس الغريب ) .. !


مشاهد .. ولكم التعليق ..
* كائن غريب اطوار .. يسوق سيارة .. ماسك صورة الملك عبدالله حفظه الله .. وجالس يبوسها من ( كل مكان ) .. !
.. عادي .. ابسط حقوقه ..
تدرون المشكله وين .. ؟
سيارة تشبه باص ساهر فيها ( درزن ) بنات على اليسار .. يصارخون .. ويزاعقون .. وآآآآه ياليتني الصوره .. !!!
.. صار شيء اكثر من كذا .. ونزل لهم .. و .. بلا .. بلا .. بلا .. الباقي حصري لـ اللي راحوا هناك وشافوا ..
( ماسكه على صورة الملك )


* تذكرون العسكري بـ أول الموضوع ..
واحنا جالسين نحكي معه .. جاء لمه واحد تقريباً صغير بالسن .. يمسك يد العسكري ويقول تكفى .. بس شوي .. والعسكري يقول رح هناك شفت السياره هذيك .. فيها المدير .. قل له .. اذا وافق ميخالف .. !
كـ أي شخص ملقوف بالعالم .. سألته .. وش يبي ذا ؟
قال .. مركب شيء في سيارته يرفعها ( أربعة متر ) .. وسمحت له مرتين .. والثالثه عييت عليه .. والا يبي يرفعها .. !
( ماسكه على رفعة السياره )


* عسكري يذب على شخص ( يحمل علم النصر ) ويقول .. ايييه افرح افرح .. هذي فرحتكم اللي ما قبلها ولا عقبها .. !


* نزلت اتمشى على الأقدام وطبعاً .. سر الجاذبية معي .. وابشركم .. حسيت بـ النجوميه .. كويتي .. كويتي .. كويتي .. اماراتي ..
الأخيره سمعتها كثير بالاضافة إلى عراقي .. أجنبي .. مضيع .. من بعض الكائنات غريبة الأطوار .. !




( المشاهد اكثر من كذا ) .. لكنها ما تسر .. ( ويا كثر المسكات ) .. !!!!!!



الجمعة، 11 مارس، 2011

بكل احترام .. جمعة غضب .. !

السلام عليكم ورحمةٌ من الله وعتق


بكل إحترام ..
الشعب .. مرضيه النظام ..
الحكم لله ..
ثم ..
لـ آل سعود والله ..
واللي ما يرضى بـ كيفه ..
من ورا خشمه بـ يرضى .. !
النظام بـ أرضنا ..
مستمد من الشريعة ..
كتاب ربي ..
وسنة محمد رسوله ..
بـالمبادئ ..
والحقوق ..
وواجب الوالي لـ شعبه ..
وواجب الشعب لـ وليه .. !
كل شيء باين لنا ..
ياللي سقينا دمنا .. من ارضنا ..
قصدي سقينا ارضنا .. من دمنا ..
نفديها .. !
يـ الله عسى تحميها ..
وعيونهم تعميها .. حسادها .. اللي يبون اسيادها .. ترضخ وتتركها لهم ..
يبطون والله ..
يحكمون بلادنا .. اللي عليها اجدادنا ماتوا فداء توحيدها ..
متوحدين ..
مبايعين ..
ولو على ارقابنا .. ما نفترق ..
نبقى وطن شعبه وفي ..
متجمعين بـ رآي واحد ..
ما يهزه .. أي جاحد ..
ينتمي لـ غير .. الوطن .. !
يا ثائرين بلا سبب ..
لا تكذبون ..
ما عندنا ( جمعة غضب ) ..
راضين ..
سمحين المحيا ..
حتى كل الشعب ردد في سلامة قائده ..
يا مرحبا .. بكل احترام ..
الشعب مرضيه النظام ..
الشعب مرضيه النظام ..



* يقول الله تعالى : {وإذا قيل لهم لاتفسدوا في الأرض قالوا إنما نحن مصلحون ألا إنهم هم المفسدون ولكن لايشعرون }


* الإصلاح مطلب الجميع .. ولكن بـ اللحمه والتكاتف والالتفاف حول الإمام وليس بالخروج عليه كما حدثت الفتنه في عهد عثمان بن عفان رضي الله ..