الأحد، 17 أبريل، 2011

مسابيه بيري .. !

بسم الله الرحمن الرحيم

مسبوه .. أعرس على مسبوهه ..
طبعاً ترى كلهم ( بيري ) .. !
بعد فتره ..
انجبوا .. ( بيبي مسبوه بيري ) ..
تعالوا نعرف خباياهم ..
حياتهم ما بها صوت حي ..
حديثهم فـ برود .. كاست ..
نادر تلاقي تواصل معنوي ما بينهم .. !



التقنيه .. عشق الحضاره ..
والشعوب تحب دايم ترتقي بـ علومها ..
وعلومها مربح وطن .. واجيال .. لكن لـ الأسف .. بـ علومنا شفت الخساره .. !
ما اعمم .. او اخصص ..
او اقول اني مثالي ..
بس الأغلب .. شايفينه ..
( منسبه فـ بلاك بيري ) ..
والبلاي ستيشن ايضاً .. عارفينه .. سالب عقول الصغار وما خلوا منه الكبار .. !


ايه نبغى .. ندمج بـ العالم أكثر ..
تتسع آفاقنا .. ما هو تضيق ..
في متاهات الطريق .. اللي مشوا فيه ( أغلبيه ) ..
من سلوك .. إلى سلوك ..
ومن ثقافة شخص لـ آخر .. ما لهذا الدرب آخر ..
والسؤال اللي فـ بالي : لي متى هـ ( الإنسباه ) .. ؟



أبو سارهـ .. !
أبو سارهـ .. !
أبو سارهـ .. !

^
وش زود بدر بن عبدالمحسن ؟



* عين الرضا عن كل عيب كليلة .. ولكن عين السخط تبدي لك المساويا ..

لست بـ ساخط .. ولا راضي .. ولكن بين .. بين .. !
أتمنى منك ايضاً يا من سـتثري الموضوع بـ تعقيبك ان تكون كذلك .. !


* ثقافات الاستخدام تختلف من شخص .. لـ شخص .. والكل يتبع اهتماماته .. لكن الأغلب .. ينتمون إلى :
تراي نمت ..
.. قمت من النوم ..
Eat Time ..
وفيه محشش .. !

* قلت له .. مبروك صرت من القوم ( المسابيه بيري ) .. قال لا والله .. الخدمه حلوه .. و و و ..
لحظه .. لحظه ..
ابسألك .. وش الفائده اللي اضافتها لك الخدمه ؟
تجيني قصص حلوه .. تصلح لك .. دوك .. ودك اقرا ..
ما ابي اقرأ .. وابسألك .. لك كم شاري الجهاز ؟
لي يمكن ثلاث شهور ..
كم قصه جتك ؟
وحده ..
وغالب اللي يجيك ؟
نكت .. !
وين الفائده بـ الخدمه ؟
اذا صار عندي فراغ .. تملاه الخدمه ..
بـ هذي صدقت .. الخدمه تملى عليك الفراغ الوقتي .. لكنها تزيد الفراغ العقلي .. !
ما فهمت ..
انا اعلمك .. تخيل إن : مخك مثل المعده ..
المعده اذا غذيتها بشيء مفيد وصحي .. كل جسمك يستفيد وبانت عليك ملامح الصحه ..
والعقل .. اذا غذيته بشيء مفيد .. حياتك كلها تستفيد وبانت عليك ملامح العقلانيه ..

( صغير بـ السن .. وحديثي معه كان بسيطه وسهل )

* افا .. آخر شخص كنت اتوقعه ينضم لـ قائمة ( المسابيه بيري ) انت .. !
معليش ابو ساره .. انا انسان لي شخصيتي .. وقبل ما استخدم اي شيء .. اشوف وش حاجتي له ..
حلو ..
وش حاجتك لـ البلاك بيري ..
انا اشوف ان الخدمه في هذا الجهاز ( تدخل على قلبي السعاده .. والسرور ) .. !
لحظات .. وقبل ما ارد عليه .. جاه برود كاست ..
اخذ الجوال .. ولهى عني تقريباً اربع دقائق .. بعدين رجع وقال وش تقول ؟
قلت ..
Done .. والحاجه اللي انت تتكلم عنها .. ما هي حاجه في غاية الأهميه اذا كانت سبب في انها بـتفقدك توازنك بـ التركيز على اعمالك .. او التركيز في مجلسك والحديث مع الاشخاص الـلي حولك .. والتقليل من احترامك لـ ذاتك .. واحترام غيرك .. !

على طاري الإحترام ..

ما تلاحظون بـ العاده إن اللي ( ينسبه ) .. يعني ( يفهي ) مع البلاك بيري .. ينسى نفسه ؟
تلاقي احيان واحد منسمج بـ المحادثات .. لا شعورياً اصبعه يروح لـ ( خشمه ) .. تكرمون .. !
او من الحماس يسوي حركات بـ لسانه .. او بـ راسه .. تقل طالع من شهار ؟

مره كنت في انتظار .. فجأه جاء واحد وجلس جنبي .. صراحه قمه بـ الإحترام ..
سلم .. وجلس .. وسولفنا ..
ولد مؤدب بـ قوه .. !
فجأه قال عن اذنك .. ومسك الجوال ..
انا على بالي جاه شيء مهم .. وقلت خذ راحتك ..
( ينغز ) بـ الحروف تقل يكتب خطاب بـ اللغه اليابانيه ..
رفع رجل على رجل .. ومع الأسف .. بكل قلة ادب .. اسفل الجزمه تكرمون على وجهي .. !
عيب يا ابن الناس ..
احح ..
حس ..
ترا فيه احد هنا على يمينك ..
ما فيه فايده ..
قمت وجلست قدامه .. !
تصدقون .. خلصت شغلي .. ومشيت وهو على نفس الجلسه .. !
الحلو بـ الموضوع .. جلس جنبه رجل اقرب إلى الشيب من الشباب ..
وعلمه شوي من مبادئ الأدب واحترام المجلس ..
كنت اقدر احاكيه .. بس خبركم .. شباب و شباب .. ما ينفع .. واخاف تاخذه العزه بـ الإثم .. !


* عجزت عن تصنيف ( المسابيه بيري ) .. مثلاً ( بزران .. مراهقين .. شباب .. شياب .. عقال .. جهله ) .. !






احترامي لـ الجميع .. وشكراً لكم .. !

هناك 5 تعليقات:

  1. والله البلاك بيري حمااااس ..
    انا عني ما عندي ..
    اتمنى امتلكة لكن ..
    خايفا اطلع من الجماعة اللي فوق منجد..
    واغيب عن العالم اكتر ما انا غايبا عنو الحين
    تحية وتقدير لك ..

    ردحذف
  2. الله على هالمدونه الساخره ...ضحكت واستمتعت وبنفس الوقت عشت سخريتك اللاذعه على بعض الحقيقه الواقعه ...

    لك روح مرحه تطغي على حرفك وتلبسه تاج الابداع
    والفكاهه المدروسه والمحسوبه ...

    الكتابه الساخره كتابه توصلنا الى كثير من الحقيقه بقالب كوميدي ولذا كانت بأعتقادي الاصعب بالتناول ..

    هي في الغالب موهبه رأيتها انا هنا بكل اقتدار ...

    مايعزجني في البلوقر ان المميزين ك انت لا
    حياة تدور حول حماهم ..

    الردود والتعليقات قليله رغم ان التدوين راقي ومميز ..

    انا اكتب وادون على النت لوق وهو بكيفه لابكمه اقل بكثير من مستوى البلوقر لكن
    الحياة فيه اسرع رتم ...

    شكرا" لك على كل حال فقد استمتعت كثيرا" بمدونتك هذه وسأمر الان على الباقي ..

    ردحذف
  3. سجل إعجابي بما سطرته يمينك حروف عبرت كثيرآ عما يجووول بداخلنا استمر ابو سارهـ ويابخت ساره باأبوه رجل يملك عقلآ مثلك ~

    ردحذف
  4. م أكرم كلماتك ي أبو سآره . ,
    وقد لآ أكفيك حقك لو قلت لك : ( عقلك يوزن بلد )

    لله دُرّ حرففففك

    مميّز وأسلوبك خاص كما عهدتك ..


    الجٌوِهَرِهَ

    ردحذف
  5. حسستنا اننا من العالم الخارجي بمقالك خيو :)
    هو تقريبا كلامك صحيح ولكن مو على كل الاوادم وكل انسان يبحث عن الوناسة والسواليف(ادري حست الدنيا بهالجملةفصحى وعامي ههههههه!!)اهم شي وصلت المعلومة..
    وشكرا والى الامام

    ردحذف

سيتم إدراج تعليقك بعد الموافقة عليه وشكراً،