الثلاثاء، 28 يونيو، 2011

قلب دلي

حبيبتي ..
والمجتمع .. اشيائهم مفروضه ..
وانا عليهم .. ما فرضت اشيائي .. !
 خاب الرجا ..
واللي مجنني .. لا قالوا : آمر .. !
والأوامر كلها مرفوضه .. 
المشكله .. 
ما يجتمع ..
حبيبه .. تشبه .. مجتمع .. !
في قسوته .. والمفترض .. واحد من الأثنين .. يلطف .. لا قسى الثاني علي .. !
عاد بـ صراحه .. 
تعودت .. !
واستنكر غياب الشقى .. 
ليه .. عَوّدت ؟
يا نبض الأفراح .. قلي ..
وش تبي بـ قلب دلي ؟
ما كفاك .. 
تنتشلني من الحزن .. لا جت .. وغابت ..
أنت غبت ..
وتغَيّب الدنيا معاك ؟
الله ياعمري زمان ..
لما كان .. 
الصمت لا ضمتني ..
يحكي .. بحب وحنان .. !
لا تقوله ..
الشعور .. اللي أحبه .. 
صرت ما أقدر أطوله .. !
غَيَّرَه .. 
تغريبها ..
وش تبي .. تغري بها ؟
ما راح أرف ..
والمطر دايم هطوله .. ممكن بلحظه يجف .. !
من الأخير ..
حل عني ..
ما أبي أي شيء منك .. ولا تبي أي شيء مني .. 
دامها بدوني .. بخير ..
ليه أعيش انا متهني ؟




الجمعة، 17 يونيو، 2011

جارحه .. فقيره .. سارقه .. ضايعه .. !

صدق تحكين ؟
كل هذا الشوق لي .. !
ما اصدق ..
عيدي .. عيدي .. ودي اسمع ثاني مره ..
قد الأرض ..
ومن بها ..
اشتقتي أنتي ..
لـ مين ؟
أنا .. !!
يآه .. 
ياربي شـ أقول ؟
والشعور  اللي بقلبي .. 
ما يوصله الكلام ..
قبل ما تُبدين شوقك ..
عاد كيف ألحين يعني ..
بعد حكيك .. لك أعبر ..
حتى مدري ..
منين أجيب حروف غير ..
ما تشابه لـ الحروف .. 
وكيف أركب شيء من لا شيء بس يلوق لك .. !
يا جارحه ..
زين البنات .. بزود زينك ..
يا فقيره ..
بـ الغرور .. وفوق ذا متواضعه ..
يا سارقه ..
نور القمر .. والشمس لـ أجلك شارقه ..
يا ضايعه ..
بعدك بلاد .. وبسمة أيام .. وثواني ..
يا أماني ..
قلب ..
وإحساس .. 
ومواني ..
يابحر موجه خذاني ..
فوق شط الحب .. و فيه .. غارقه أحزاني .. !
لا تسأليني ..
إيه أنا .. مشتاق لك .. وأكره أنيني ..
لا ندهتك ..
وإنتظرتك .. تسمعيني ..
يا دوا .. عبرة سنيني ..
يا غنيه .. في حنيني ..
يا كريمة .. حظ فيني ..
يا وجودي ..
يا بعد هالدنيا .. أودي ..
أوجديني .. في حدودي ..
واحضنيني ..
واسمحي لي اسألك ..
تحكين صدق ..
كل هذا الشوق لي ؟

للحاضره بعد الغياب

كيف حالي ..
بخير ..
ورحمة الله وسيعه ..
ما توفيت عقبك .. يا نفس .. روح روحي .. !
إلتزمت السكوت ..
برغم طول القطيعه ..
والبقا فـ القصايد كان كثرت جروحي ..
لكن ألحين جيتي .. والمحبه وديعه ..
سالمه في غيابك .. 
وفـ حضورك .. لـ بوحي ..
هاتي العذر ..
وأمرك ..
مُلزم إني أطيعه ..
وأسمعيني أحبك .. كان مسمعك يوحي ..
لا تقولين .. كيفك ..
رحمة الله وسيعه ..
ما توفيت عقبك .. يا نفس روح روحي .. !


الخميس، 9 يونيو، 2011

من أحب ؟

تجهلينه ..
أغلب اللي أكتبه ..
ما تعرفينه ..
وأنا لين ألحين باقي.. أحفظ اللي تكتبينه ..
مترفه ..
والحرف من غيرك ..
على لسان القلم ( ما أسخفه ) .. 
حتى انا .. 
اذا كتبت .. احيان أتوه .. وأتخيلك ..
واللي كتبته .. لا حضرتي في خيالي .. مـ أعرفه .. !
تخيلي ..
او لا ..
لا تتخيلي ..
بس اسمعيني ..
يابعد قلبي وعيني ..
تعرفيني .. 
قبل اعرفك .. 
يوم كنتي تسأليني ..
عن حنيني ..
والغرام اللي بـ قلبي .. 
من تحب .. ؟
احترت .. 
ليه تحيرني .. !
بكل صراحه ..
اللي قبلك من سنيني ..
كان راحه ..
ما أفكر بـ أي شيء ..
ولا أحب ..
حتى شفتي .. في قفص صدري .. مساحه ..
وقلب حي ..
يشبه لعصفور صبحك ..
يوم جيتي ..
أفرد لصدرك جناحه ..
وطار لك ..
يا أبجديه من ذهب .. 
كلك فصاحه ..
والصراحه .. 
من أحب ؟
اقري اللي أكتبه ..
من يوم جيتي .. وصرت شاعر ..
لين رحتي .. معك قلبي ..
بس خليتي لي جراحه .. !

الجمعة، 3 يونيو، 2011

حريتي .. سمعاً وطاعه .. !



يا ساده ..
الجنون أعلن .. جهاده ..
والعقل .. مستسلم ..
شعب .. أسقط .. 
شعب يسقط ..
سامحيهم .. يا بلاده .. 
سامحيني .. يـ البلاده .. 
بـ أستفيق ..
علّني أطفي حريق ..
أو .. 
أولعها .. زياده .. !

*

قوم ..
مفردة تعني : مجاعه ..
ربما .. ايضاً .. جماعه .. !
لا .. خلاف ..
في نظر من لا يخاف ..
من تجرع سم .. غيره ..
لا يبالي .. في الحروف الأبجديه .. 
والمواويل النديه ..
.. والعبارات الغبيه ..
يا جماعه ..
قوم .. تهلكه المجاعه ..
كيف هم .. يدعونهم ..
لـ العيش في حريةٍ مفادها .. سمعاً وطاعه .. !

*

اخفقوا بـ حروبهم ..
من قال .. لي ؟
أعلامهم .. كـ ذنوبهم ..
إعلامهم .. كذبوا بهم ..
آمنت بـ الإخفاق لكن .. أين تلك حروبهم ؟

*

ضجيجهم .. 
في بيتنا .. تحت الحصار .. إني أراه الآن .. يسمعني ..
ويتبعني .. ويدفعني .. إلى ما كنت .. أنوي به .. !

*

ومصيرنا .. 
متعلقٌ فيما أمر ..
رب العيون .. ودمعها حين إنهمر ..
لا تفهم الأقدار ..
لكن ربها ..
أعلم بنا .. ومصيرنا .. إذا أمر .. !!



( تجربة فصحى على قد حآلي .. وتفشل بعد ) 
الكتابه أعلاه .. كيبورديه .. فـ لا تشرهون وتقولون انخفض مستواك ..
ولا صرت تكتب زين .. 

شكراً لكم ..

الخميس، 2 يونيو، 2011

فمان الله .. والبقا فـ الآهـ .. !

سكت صوت الرعد ..
والبرق تلويحه كسف غيمك ..
من غيابك جفاف الصدر .. مَوّت زهرة سنيني ..

نضب دم الجسم ..
والقلب .. نبضه يآمل فـ ديمك ..
تعطشتك شعور .. وكنت متحريك ترويني ..

خذيتك نور لأيامي .. وأخذتيني لـ تعتيمك ..
فقدت الشوف من قبلك .. ومن بعدك .. ظلمتيني ..

حرام ..
اتحشرج السكرات .. وتحييني على ضيمك ..
بلياك العمر ماضي .. على وشو قتلتيني ؟ ..

عشقتك متهم بـ الحزن ..
والأفراح .. تحكيمك ..
حكمتي .. والبقا فـ الآهـ .. اذا كنتي .. عشقتيني ..

لـ صوت الحب .. حريه ..
ولـ الأشواق .. تكميمك ..
ولـ امواج البحر .. ذكرى .. على شطك ترسيني ..

صباحات الشتاء عَدّت .. وبَقّت لي ترانيمك ..
تسليني عصافيري .. واذا غنت .. تبكيني ..

فمآن الله ..
ومن بعده .. فمانك يـ المطر .. غيمك ..
من غيابك .. جفاف الصدر .. مَوّت زهرة سنيني .. !!