الجمعة، 21 ديسمبر، 2012

حكي مكبوت

ماهوب وقت الكلام وجيت به عاني ..
حطوه في روسكم حتى يجي وقته ..

مؤمن ولكن كثير الصمت أذاني ..
والصدر عيا يكمل عنكم كبته ..

ماني مصرح لها ماهو على شاني ..
لو هي علي من زمان اللي أبي صبته ..

بـ ايديني أفعال تسبق منطق لساني ..
وارث وتدرون ورثي منكم جبته ..

العقل ميزان ترجح فيه أحزاني ..
والحب من بين ضلعين الهوى بقته ..

أنب ضميري وخلاني وبكاني ..
على بساط الندم تسترني أروقته ..

تهب ريح الطواري ما تعداني ..
الا ومعها تروح الروح مرغبته ..

حاولت أبنسى لقيت إني أبنساني ..
لوني على القلب والي كان أدبته ..

خلوني أبوح دام الشوق صحاني ..
بي طفل دنياه بالتفكير مرعبته ..

يا ما تبعثر وعوّد بي ووداني ..
حتى من الله تركد لين رتبته ..

طلبتكم بشروا بالخير وجداني ..
خايف وخوفي متى ما طابني طبته ..

أوعدكم أسلم الإحساس حرماني ..
وأدله مع غياب عذبني وعذبته ..

وأترك وزيز السؤال الحاير الجاني ..
يدوّر بصمتي المعتاد أجوبته ..

ماهوب وقت الكلام وجيت به عاني ..
حطوه في روسكم حتى يجي وقته .. !


الاثنين، 17 ديسمبر، 2012

يا طفلتي حبيتك .. !

الخوف ..
نبرة حزنها مشتاقه ..
والبرد ..
ميل خاطري لرضاها ..
الشوق ..
صبري عقبها ما طاقه ..
والحب ..
ناداني ولا لباها ..
وين أشوفك ..
وأسرقك من خوفك ..
الصمت ما كفى ..
الا أبي أدفى ..
وأنفاسك شعوري .. 
والشعر ملهوفك ..
دمعك ..
يبلل فـ الحنان أوراقه ..
مهما حروفي قصرت واياها ..
محظوظ من حبك سقاه وذاقه ..
من حقه يعيش العمر .. يبتاهى ..
خطاي خليتك ..
وألحين ناديتك ..
عادي ترديني ..
ما كان في ايديني ..
يا طفلتي حبيتك ..
يا طفلتي حبيتك .. !



الأحد، 9 ديسمبر، 2012

حلم كنتي


حولي الأشياء .. كذبه ..
حتى أنا دونك غريب ..
حلم كنتي ..
حلم يشبه لـ الطفوله والمشيب ..
مولدي من مولد الحب البريء ..
اللي ربا في صدرك أنتي ..
وحلم كنتي ..

في سنيني .. ذكريك ..
قبل أحبك ..
بعد أحبك ..
ذكريني .. ذكريني ..
أنا شـ مصبر أنيني ..
غير ذكرانا الجميلة ..
فيك طبعاً .. إيه فيك ..

صدفه قلبي طاح عندك ..
وارتفع عن كل شيء ..
صار طير ..
وامتلى بك ناظري .. 
ما كنت حي ..
كنت بك ميت كثير ..

وحلم كنتي ..
عشته سنين ومضى ..
لكن ترك فيني حياة ..
وشعر ..
وشعور .. 
ورضا .. !


الأربعاء، 21 نوفمبر، 2012

صباح الأثنين


صباح الأثنين موحش كنه غيابك ..
يا حر قلبي على ذكراه يا حره ..

إلى متى راح أشوفك فيه وأشقى بك ؟! ..
وأعيش (نفس الشعور) - (اللحظة المره) ؟! ..


الحب لو ما رضينا في قوانينه ..
ما كان تسهر عيون الشوق وتحاتي ..

مهما بلغ فالأذى .. عشنا مجانينه ..
والشعر لولاه ما تنطق به شفاتي ..

صباح الأثنين ما ظني بـ تنسينه ..
آخر كلامي أحبك .. رايح سكاتي ..

لا ما كرهتك .. كرهت اللي تسوينه ..
بـ القلب لما بدا ينبضك فـ أبياتي ..

ما هوب معقول تعطيني وتعطينه ..
نفس الكلام، الشعور، الماضي الآتي ..

يـ (حْنَيّنَ) الحرف هذا الشطر يا زينه ..
وهو أساساً يعبر عن معاناتي ..

كنت أحسب الشين بي حتى تحبينه ..
أثرك تحبين (نفسك) في عباراتي ..

لو ما عطيتك عمر راضي تخونينه ..
لحقتك بـ صوت جرح يقول لك هاتي ..

اما يموت الغلا .. والا تردينه ..
سنينه الضايعه بـ ايديك حقاتي .. !



ما عدت أنا الأول بـ عين المهره ..
بالشعر من راحت لهم عني به ..

الله يا ذاك الزمن يا طهره ..
لا قلت بيت وجتني تغني به ..

بلحالها تملى شعوري شهره ..
وأحس لي قيمه وقدر وهيبه ..

وألحين ..
روحي منها .. منقهره ..
والكل شايل بالموادع عيبه ..

مـ أرضى تجمعني بهم في سهره ..
بعد التفرد .. أعتبرها خيبه ..

قافي بـ يصفى لو تكدر نهره ..
الله يساعدني على هـ الغيبه .. !


كل ما صار فـ غيابك .. عادي ..
دمعك .. برودي .. غصتك مشتاقه ..

الا أني أشوفك مع البغدادي ..
فـ أبو ظبي .. تصففين أوراقه ..

من كنت أعدك فالشعر ميلادي ..
وأستلهمك فـ أبياتي الخلاقه ..

ما جاء بـ قلبي وإن خذاك بعادي ..
ألقاك مع غيري جمل يا ناقه .. !

السبت، 17 نوفمبر، 2012

صور وتصاميم ٢

امتداداً لـ صور وتصاميم ١
جميع التصاميم هنا لـ المبدعة Noor :$ من ساحة الإقلاع
رابط الموضوع: فاَق التميُز وَ الإبداع || - بعيدًا عن بلاد القهرِ والكبتِ !
(اضغط على أي صورة لتصفح جميع الصورة بحجمها الأصلي وبطريقة ديناميكية)


الأربعاء، 14 نوفمبر، 2012

صور وتصاميم ١

السلام عليكم ورحمة الله وبركاته ..
في ملف على جهازي جمعت فيه جميع التصاميم والصور الخاصة بـ مدونة أبو سارهـ .. !
أحب أشارككم فيها بهذي التدوينة .. وأي تصاميم أو صور جديدة أبحطها هنا إن شاء الله ..
شكراً لـ أصحاب هذي التصاميم .. 

السبت، 10 نوفمبر، 2012

أنا بـ أجبرك ..

هدوء ..
يسبق عاصفه ..
واللي حصل ما هو شوي ..
وش آسفه ؟!
آسف أنا ..
على .. 
على ..
ما هو لـ شيء ..
مجرد آسف .. مبتلى ..
أدمن قصيده .. وأدمنه ..
فـ أيامه المدموحه .. 
في فراغ الأمكنه ..
يا مستحيله ..
فيك لما صرتي أنثى ممكنه ..
.. وفـ ليله .. ليله ..
جاك من عند الـ (ألف) ..
لـ الحاء ..
وأسدلتي عليه إعجاب بـ حروف .. وحلف ..
وشعوره الصادق بـ خير ..
ما وقف بي لـ الأخير ..
ومـ أنتي آخر .. أوله ..
مو مشكله ..
الله معك ..
هذا الهدوء .. 
العاصفه قدام .. صبرك ..
لا تزود الأسئله ..
روحي لهم .. 
روحي برجلك .. يم قبرك ..
ما جبرتك عـ البقا ..
بـ اختيارك .. كنت رجلك ..
لكن من اليوم .. 
آسف .. عـ الفراق أنا بـ أجبرك .. !!

الثلاثاء، 6 نوفمبر، 2012

(هونج كونج- مكاو) بـ كاميرا جوالي ..

السلام عليكم ..
خلال السنة الحالية سافرت لـ هونج كونج وأخذت لها بعض الصور ...
أتفرج تو على الصور ومسكت معي أوريكم بعض منها مع قليل من الشعر .. 
للعلم: عند (الضغط) على أي صورة بتفتح لك الصور كلها مترتبة وكبيرة ..

أبي أختار موتي كيف ..

الطواري الحزينه جات ملتمه ..
وأنا على جريف قلبي ما تحملها ..


آسف على حبي لك النازف ..
شكراً لأنك عجزتي عنه ..
أنا حصدت وأنا أجني ..
عمري حرام اتبرأ منه ..


والله لو كنت عارفها .. من أولها ..
لـ القلب ما قربت في حبها يمه ..

ولا العلاقه أزينها .. وأطولها ..
وأعيش أبو ساره اللي ماحدن همه .. !


جنة شعورك .. على قلبي ..
ما أنكر أيامنا الحلوه ..
لكني مصدوم .. يا حبي ..
ولا عاد لي بالهوى سلوه ..


زعلان وشايل بـ قلبي حييييل ..
حيل ..
حيل .. وما بـ أنسى ..
إني سفينة بحرك الليل ..
ومع غيري الصبح لك مرسى .. !


ما أشك لحظة وعندي ما يثبتني ..
خذيت قلبك وتفكيرك قبل شكي ..

هذا أثر من تمنتني وخانتني ..
الطعنه الناعمه ما تجرح تبكي ..


وآهـ .. 
جرعني العشق سمه ..
وأنا مـ أقواه ..
تعبت أهواه .. 
وأحسب إني لحالي .. 
فـ شعري بس أنا أهمه ..
طلع وياي من .. يهواه .. !


سلامة .. قبري البارد ..
يـ حبل المشنقه يـ السيف ..
كذا والا كذا ميت ..
فـ أبي أختار موتي كيف .. !

الاثنين، 5 نوفمبر، 2012

مجنون لو يوم فكرت إني أخونك .. !

قررت أجيب .. أولي .. وأقصاي .. لـ عيونك ..
فـ الحب .. من قبل لين ألحين وأكتب لك:

(اليوم ماهوب يوم إن مر من دونك ..
والليل لو ما ملكتك فيه ويش أملك ؟! ) 


يا كلامي .. فـ الهنا ..
يا صمت آهي ..
يا شفاهي ..
أنتي أعذب هالشعور ..
أنتي حروف القصيد ..
.. وإييييييه من قلبي أنا .. أنتي من قلبي أنا .. !
 

اهتمي بـ قلبك وتطنيشي وعقلك ..
وأهتم فيك .. الصبايا لا يهمونك ..

أصعبهم أبطي يجيب العين من سهلك ..
مجنون لو يوم فكرت إني أخونك .. !!

ليلة أول شتاء .. !

هيضني الجو .. وتفجر شعوري ..
فـي ليلة الـ زعلان راضي عليا ..

الحب لو ماهوب حاجه .. ضروري ..
إنه يبين في قصيدي شويا ..

حبيبتي .. رتبت لك كل أموري ..
ما ناقص الا جيتك لي هنيا .. !


وأعد أنا خصلات شعرك ..
شعره .. شعره ..
يا أميرة قلب عاشق ..
انفتنتي به .. وشعره ..
إي وأضمك ..
وآتنفس حب دافي من قفص صدرك لـ فمك ..


تبسمي واخذي يديك .. بـ يديا ..
تمايلي وأنا أغني .. ودوري ..

عشان أدوَّر خاطري لك حميا ..
وأكسر عناد القلب وأقهر غروري ..


نسترجع الذكرى ..
في ليلة أول شتاء ..
ونحب إلى بكرا ..

 تفجري بـ حروف حبي وثوري ..
لا دام وصلك عقب شوقي تهيا ..

محتاج أعبر هالمساء عن سروري ..
أعطيني الـ حرية الـ حب .. هيا .. !

الجمعة، 2 نوفمبر، 2012

ف - ت - ن - ه .. احذروا التقليد وأشياء مشفرة ..

- : أهلن
! : وعليكم الأهلن
- : وش جالس تسوي !
! : أحلب النياق
- : ماشاء الله حقين هالتقنيه ما خلوا شيء ما سووه
! : إي صح ما خلوا شيء .. ممكن توخر شوي
- : أبشوف أبشوف .. وش ذا .. وين النياق يا كذاب .. هذا تيوب يوب ..
! : تيوب يوب هاه .. وخر لا أسوي لك انفولو من البيت ..

أهلن جميعاً .. لا أحد يرد وعليكم الأهلن تراها قديمه ..
قبل أسبوع وكالعادة كنت مسير على أمي حصه أدودل يديني ..
قبَّلت جبينها الطاهر .. وعطيتها جبيني عشان تقبله .. حطت ستيكر 10SR - Made In China
صدق ما أستحي على وجهي ..
وكل ما طلعت من عندها أتذكر هالشيء (وجه ابن فهره) .. خصوصاً لا دخلت عليها بـ خفي حنين وفوق هذا: يمه وين القهوة .. يمه هاتي الشاهي ..
يمه جوعان .. يمه مصدع .. يمه منقهر .. يمه ما لي خلق .. يمه وين الستيريو نبي نرقص ..
سمعت أنت وإياها ؟
أنا موب كذا بـس أعلمكم بعضنا كيف يعامل جدته وأمه على أساس إنها (قهوجية - طباخه - دكتوره - ملاهي - صيدليه - مرقص)
أدق عليها عشان تصدقوني .. لا لا خلوني أتصل وأشغل السبيكر .. شكلكم مـ أنتم مصدقيني ..
اسألوها إذا ما كنت دايم قبل ما أجي لمها اتصأل عليها: يمه تبين شيء وأنا جاي ؟!
وإذا جيتها: يمه تبين قهوه .. يمه جوعانه .. يمه تعبانه .. يمه مصدعه .. يمه عندك سلف ؟!
حتى إنها دايم ترد علي بخصوص آخر (يمه) .. أنت فلوسك وين تروح ؟!
أبد .. يضيق صدرها إذا صارت بحسابي .. وعندها رصيد إجازات .. اللي أعرفه ألحين إنها بـ اليمن .. !!
وش اللي بـ اليمن ..
فلوسي ..
كيف يعني ..
بـ رصيد تاجر يمني .. (يمكن بنشري ويمكن حق معسل ويمكن حق ملابس)
أها ..
أجل أنا أزين منك وأنا أمك .. فلوسي مسافره للقصيم ..
لا تقولين إنها بـ رصيد حق الكراث .. !!
يمه .. حنا 2012 .. أحس كذا وأنا مدري إن اللي يلفون الكراث بـ خبز تميس وياكلونه مع شاهي هذولا خلصوا .. !!
خلصوا بـ عينك لا تفاول علي ..
هههههههههههههه


(عشان تصدقوني) :

أنت ما أحد كذبك عشان تثبت لهم ..
هذا واحد من الـ طيبين .. يشغل السبيكر فـ الاستراحة قدام أخوياه إذا صارت أمه متصله ..
مسوي فيها أنا اللي عادي أمي .. أم الجميع ..
اتصلت عليه أمه نوبه من المرات ..
ألو ..
هلا يمه ..
شفت يـ وليدي الكراث اللي جبته لي العصر ..
إيه ..
خلص .. وأبيك تجيب لي زيه ..
! : إلى ألحين الوضع أوك يا شباب .. استمتعوا في القادم ..
يمه ألحين أنا بعيد و بكرا ....... => ما تعطيك فرصه تكمل كلامك ..
أها بس اخلص جبه عندي بنات خالاتك وبيسافرون باتسر للديره وجاز لهم بياخذونه معهم .. ولا تنسى يبونه نفس اللي جبته العصر .. ( ....... )

تدوكر الرجال .. واللي كان يحط جمر أو يلعب بلايستيشن أو اللي معه أربعميه يبي يصن .. التفتوا عليه كلهم وبصوت واحد آآآآآآآآآآآهههههههههههههههههههههههه
عاد أنتم خابرين ربعنا .. يحبون السواليف البطاله ..
ما سوت عليه ..
كل ما شافوه ..
يـسمعونه (هاه كيف اللي جبته لبنات خالاتك .. عساه أعجبهم .. إلى ألحين يحبون الـ ( ........ ) ..

مصدقينك والله ودارين إنك فري وعادي تكلم أمك أو أخوك أو واحد من ربعك أو هندي البقاله وتشغل السبيكر ما همك بس ياخي هالشيء يضايقنا .. ويمكن أحياناً اللي تكلمه يقول كلمه منا والا منا تحرجك وتحرج اللي عندك ..
صديقي الـ واو .. ناصر وداد (أنا أحوبك ذكرتوها ؟) .. اللي تكلم بنت تربطك فيها علاقه غير شرعية .. مهما صار أو كان أو ما زال بينك وبين البنت .. ومهما كانت البنت اللي أنت تكلمها .. لا تشغل السبيكر عندنا ..
مابي أسهب كثير فـ الكلام عن هذا التصرف .. لكن اسمح لي أقول لك ولكل اللي يسوون مثلك: أنت واطي ..
وأنتي يا بنت مـ أنتي طالعه منها ..
تشغلين السبيكر عند صديقاتك .. واو اسمعوا صوته يخقق .. حبيبي فهودي يتصل اوووش ما احلل وحده تطلع صوت ابشغل سبيكر .. وتعطينه نبرة ايوووا حبيبي ..
ما يصير هذا الكلام ..
فهمتوا يعني كيف ما يصير ..
عيب ..
شوية حيا بس ..
واذا بليتم فـ استتروا ..
خلصنا فقرة ( ....... ) .. ترحيب ذا موب كراث هههههههه

(وش جالس تسوي) :

صديقي الـ فاهي ..
اللي بـديت كلامي فيك ..
اللي تشوفني أطقطق على الكيبورد وتسألني وش تسوي ..
أنت وش شايف ؟!
اختر الإجابه .. أعزف على بيانو .. أشتغل على اللاب توب .. أهمز الحروف .. !!
بعدين تعال ..
يوم أقول لك إني أحلب النياق .. صدقت ليش ؟!
ما في عقل تفكر فيه ..
بس تتلقى .. تستجيب .. تصدق .. تنقل .. !
هذي حياتك ؟!
حاول تطور من الأربع اللي فوق ..
اشتغل على نفسك ..
مو أي واحد يقول لك .. الماسونيين راسمين أشكال هذي المباني عشان ياخذون الأفكار من بطنك قبل توصل مخك .. تتلقى كلامه .. تستجيب له .. تصدقه .. تنقله .. !!
أصنع بعقلك (مكافح الـ لا معقول - Anti Absurd)
لما تشوف أحد بـ اليوتيوب طالع يقول إن مطار جده الجديد مرسوم على شكل ( ..... ) +18 .. قله يا شيخ أنت خلهم يخلصون ويصير خير ..

الا ما قلت لك ..
صار فيني شيء غريب سبحان الله ..
مدري وشلون جتني القدرة هذي .. أقصد المعجزة ..
الأربعاء هذا اللي راح .. سافرت لـ (طنجه) ..
لحالي أنا وأخوياي كل واحد بـ لحاله مع بعض ..
قبل ما نمشي مدري وش أعمى تفكيري وخلاني أنسى إن عندي إجازه السبت ..
يوم وصلنا هناك .. تذكرت إني لازم أداوم السبت ..
وش أسوي .. وش أسوي ..
قلت بنفسي يا ولد .. انبسط هاليومين واذا جاء السبت الصبح يصير خير ..
يوم الخميس بالليل جو الضبيان وصدت لي ضبيين ..
الضبي الأول صار له ظرف وما قدر ينام برا بيتهم ..
والثاني قعد معي ..
الأول يبيني والثاني يبيني .. ==> لا تخلينا يـ الواو أنت .. يا ناصر وداد هههههه
المهم ..
وأنا جالس أفكر وش أسوي .. وش أسوي ..
فجأه .. طلعت أنا ثاني ..
وقفت قدامي ..
كذا أنا بالضبط بس واحد ثاني ..
ثانيي راح مع الضبي الأول ..
أولي جلس مع الضبي الثاني ..
و .. و .. و .. و .. و ..
وخليت أنا الثاني يرجع للرياض يداوم عني السبت .. ويستقبلنا بالمطار .. !
اوو .. سبحان الله ..
كف على وجهك يالـ فاهي .. وش جالس أقول لك ياخي قبل هالسالفه .. !!
ما فيك فايده ..
خلصنا فقرة وش جالس تسوي ..
وش جالسين تسوون !!


(Made In China) :
مجتهد .. مهوب مجهول الأهداف .. اللي في هوامير الصحراء اسمه متحمس هههههههه ..
لا .. مجتهد .. منصح .. تدور الـ أصلي .. الـ رخيص .. الـ مضمون بـ إذن الله
أنت أكثر واحد مغلوب على أمره في المشتريات ..
وخذ عندك حبه سالفه:
قررت أشتري غتره بيضاء ..
أنا ساكن بـ حي الوسيم .. أنا حر أسميه اللي أبي .. وسيم ومعضل وعيونه زرق وشعره أشقر .. هذا إسم حيي (سمعتوا يامزز) إسم حيي ==> خلف هذا السطر تمساح (سامج).. لا تخلوني أتهور أحط رقم البيت ههههههههه ..
جنب بيتي محل يبيع الغتره بـ 90 ريال ..
جيت أبشتريها لقيت واحد على الكاشير قبل ما أحاسب ..
أخذني على جنب وسمعني .. تلقاها بـ 70 ريال في حي الجيكر ..
حي الجيكر يبعد عن بيتي حدود 40 كيلو ..
الطريق له زحمه ..
بس الغتره بـ 70 ريال ..
توكلت على الله ورحت ..
يوم قربت أوصل للحي .. ضاقت الشوارع .. زادت الزحمه .. بديت أنفس .. انصدمت مراية سيارتي .. !!
وصلت المحل ..
شريت حبتين ..
وحده طلع مقاسها غير المكتوب على الطبق حقها وبما إنه مستحيل أرجع .. استفادت منها الوالدة بـ تنشيف الببسي إذا أنكب على الأرض
الثانية .. أبد ما فيها شيء للحين أستخدمها ..
إيه .. وركبت مراية لـ سيارتي بـ 480 ريال ..

من جد .. نصف القوت راحه .. !!

نجي لـ شغله ثانيه ..
اللي لابس تي شيرت بولو ..
بنطلون كليفن كلاين ..
جزمه لاكوست ..
بوكسر بير كاردن ..
عندي لك اقتراح .. إذا رحت دبي مره ثانيه .. إلبس سوق الكرامة بكبره وتعال .. !!
ياخي بدال ما تضيع فلوسك على بضائع تقليد على أساس إنك لابس ماركة .. لو تشتري بها لبس محترم بخامة ممتازة بنفس القيمة أحسن لك ..
أحد يخبر لي X6 تقليد بسعر كويس ؟!


محاور الموضوع:
١- (ف) الفهاوه.
٢- (ت) التقصير بحق شيباننا وعجزنا.
٣- (ن) ناصر وداد.
٤- (ه) هياط البعض في المكالمات قدام الناس.
٥- احذروا التقليد.


وشكراً،،

الجمعة، 12 أكتوبر، 2012

السكوت يضر محتاج الكلام .. !

خاطبي باب الغياب وصارحيه ..
السكوت يضر محتاج الكلام ..

(كونك) أوسع من ضلوعك ضيقيه ..
همك الجاثم على صدرك حرام ..

دمعك إن بلل عيونك عانديه ..
خلي الضحكه تعديك الملام ..

قلبي القاسي وطن توهك فيه ..
كثر ما طاح بجروح الحب وقام ..

كان مليتيه قولي: ما أبيه ..
واقفلي دونه مفاتيح الغرام ..

أو تعالي بـ طهر عني راوديه ..
كود يفطر عقب كل هذا الصيام ..

اتعبي فـ الصبر وانتبهي عليه ..
باقي فـ نبضه خيانتها تُلام ..

قلبك المشتاق بالحب افتحيه ..
السكوت يضر محتاج الكلام .. !

الأحد، 7 أكتوبر، 2012

يا قلبها زير النساء .. خايفك

 يا عروق يدينها خفي علي ..
كن قلبي في هواها ميلته ..

ـــــــــــــــــــــــــــــــــــــــــــــــــــــــ


يا قلبها روح عسى فراقها خير ..
عمر الشقي باقي قبل تلتهي به ..

الغصن لامن طاح بيرفرف الطير ..
شف عاد فرق الصايبه والمصيبه ..

الأرض مطراحي واذا جيت أبصير ..
فضاء لها ضاقت علي الرحيبه ..

يا قلبها روح مدام انها غير ..
في كل شيء وفوق ذيا قريبه ..

خايف على من قبلها للنساء زير ..
من بدهم تجيب قلبه تجيبه ..

الحب ما يرحم وأنا جداً أغير ..
وهي لعوبه مستبده حبيبه ..

وفوق ذا أسرارنا ما لها بير ..
مهما نسوي كلن آخذ نصيبه .. !

أحبك لحالك

قليلك ما يكفيني ..
هذي الحقيقه الجارحه ..
وأكبر مثال البارحه .. لما امتليت بدمع غيرك ..
ما قدرت أفك عيني ..
خفت أشوفك في شعوره .. وأنهزم .. وأصارحه ..
ضليت ساكت لين راح ..
وابتدت آلامي .. تصرخ .. آح .. آح .. 
يـا للوجع .. يـا للجراح ..
أثرني لـ ألحين أحب ؟! .. 
وما لقيت لقلبي طب ؟! ..
إلى متى .. هذا الهوس ؟! .. 
وإلّا متى بـ أرتاح ؟! ..
تكثر علي الأسئله ..
والمشكله .. 
من أول الليل .. أبحث .. أبحث .. وما ألاقي أجوبه ..
وأنتي .. 
يـ أنتي .. ما دريتي .. ما طرا لك مره ضعفي .. 
ولنتي بس مره وجيتي ..
جيتي .. بـ المعنى الحقيقي ..
مو لـ إلقاء السلام .. وقبل ما ابدأ الكلام .. درتي ظهرك لي وسريتي .. !
 اجلسي .. لا تحضنيني ..
قابليني .. خلي عينك صوب عيني واسمعيني:
تذكرين ٢٠٠٥ ؟! ..
كيف كنا .. لما نسهر مع بعض .. والليل يخلص مثل همسه .. 
والصباح .. الله يا ذيك الرسايل ..
والصور .. وطيور شعري .. والدخون .. وريحة أطراف الجدايل ..
والـ (أحبك) .. كم ترامت .. من على حضني لـ حضنك ..
تذكرين ؟! ..
لو ناسيه .. هالليله بس .. حاولي تتذكرين ..
عادي والله .. من طرف واحد أبرضى ..
مو رضيت انحب بعدك .. قبل ما أنتي تجين ..
وما رضيت أحب غيرك ..  كاتم فـ صدري الحنين ..
خوذي مني ما تبين ..
واتركي لي كلمتين .. فـ آخر اللحظات هذي .. واحفظيهم زين زين ..
رحتي عني فـ ليل حالك ..
ما سألت ..
قلتي انسى ..
ما زعلت ..
وغبتي وطول غيابك ..
وارتحلت .. بين أماكنا القديمه .. شايل فـ صمتي سؤالك ..
ليت قلت .. وليت قلت .. وليت قلت ..
إيه أنا ..
(أحبك لحالك) .. !!!!


 

 

الخميس، 4 أكتوبر، 2012

خدني بحضنو ودمعتو تقري بحضني .. !

حبيبي قاني .. 
وساب حناني يبصلو ..
بئيت أناني .. وأولتلو .. رقعت تاني .. طب وليه ؟!
بعد ما ألبي قرحتو .. ورحت فيه ؟! ..
حتعمل ايه .. 
تئتلو ؟!!
هوا أنا ما ليش في ألبك حب لسى فـ أولو ..
بعد السنين .. اللي احنا عشناها فـ ضياع ..
ومش دارين .. بعد الوداع .. حيقرى ايه ..
واديك رقعت تبص لي .. حتعمل ايه ؟! ..
خدني بحضنو ودمعتو تقري بـ حضني .. ولهفتو آلت بـ (أحبك) .. 
والزمان اللي رماني .. 
قابني تاني .. عشان أحبك من قديد .. !!


وسلامتكوا يا حلوين : )

الأحد، 30 سبتمبر، 2012

الستر عينه .. !

رسمت لـ أهدافي .. طريق ..
وكل ما له يضيق ..
بديت فـي بحر العلوم ..
وعمت .. 
حتى صرت فـ أمواجه غريق ..
انتظرت النجاة .. وجات بـ الطوق العتيق ..
أحيان أغيب .. ولا سمعت أصواتهم فجأه أفيق ..
ولا دريت إلا وأنا فـ الساحل المهجور مُلقى ..
قمت .. أدور لي شقيق ..
يمسح آلام الغرق .. وإن غبت يبقى ..
ما يغيب ولا يخون ولا يحاول يشعل بـ قلبي حريق ..
وأشهد إنه هو لقاني قبل مـ ألقى .. قبل مـ اسأل بالوجود وقبل مـ ارقى ..
حازم بـ فكره .. وقلبه يعتبر جداً رقيق ..
والدليل إنه تفهم .. قبل لـ يعاتب شقيقه .. في غرامه لـ الرقيقه .. لما راحوا للمدينه ..
بعد فتره من ضياعه ..
وبعد ما هي خانته .. فـ أحلى سنينه .. صاح وينه ؟! ..
علموه .. أو هو درا .. مـ أعرف ولكنه سرا فـ الليل يدور لي ذرا ..
والستر عينه .. لما غمضها علي .. 
وقال .. وش حققت لي .. قصده أنا ..
لني أنا وإياه واحد ..
قلت شفني .. رايح لـ فرقا الطريق .. أبمسح أهدافي القديمه ..
وأرجع ابدأ من جديد ..
الا معاها ..
راح أكمل في هواها ..
وراح أزيد ..
آسف .. الا هي مـ أقدر يا شقيقي مع سواها لـ أجمل أيامي أعيد .. !



 

يا ناس أنا أحبه وأموت في حبه

حياة الناس .. 
مثل ما هي حياتك أنت ..
لا تجرح .. 
ترا ماهم بدون إحساس ..
يا عازف .. على هم الفقير الناي ..
فقرك صعب .. 
مـ أنت بحاجة أكل وماي..
بـ حاجة قلب ..
متى بـ تحس ؟!
عشانه طفل .. وبـ اسم الفن .. قلدته ؟! ..
رقص من هم ..
متى تفهم ؟! ..
لو إنك جد متمكن .. 
وعندك موهبه وفنان ..
قدرت تضحك الجمهور .. 
بـ إسلوبك .. 
.. ونظراتك ..
 بلا استهزاء بـ الأحزان .. !!
يا مسكين ..
فـ قلب الطفل ذا سكين ..
تخيل إنه بـ قلبك ؟! ..
بتقواها ..
وتتحمل .. تشوف الناس تتراقص على جروحك ؟! ..



(بقلبي من زمان .. مقطع الطفل اللي يرقص بثياب رثه .. وقلده أكثر من واحد .. عبدالناصر الدرويش .. وقلدوه في واي فاي)

السبت، 22 سبتمبر، 2012

رضا أمك

يا صاحب العمر دمي ساري بـ دمك ..
والكلمه المستحي منها بـ أبديها ..

هو سر لكن لأنه جداً يهمك ..
بـ أصارحك فيه وأحلامك بـ أراعيها ..

بيت الشعر تنفضه من كمك لـ كمك ..
دام القصايد كثيراتـ(ن) قوافيها ..

أهم شيء الرضا في ما لفظ فمك ..
والغصه .. بـ حكمتك قادر تعديها ..

اسمعني بـ قلبك وكني منب يمك ..
بعدين قرر بعقلك وأنت راعيها ..

الراحه اللي تجي من دونها أمك ..
اسألك بـ الله قلي .. وش تبي فيها ؟!


الأربعاء، 19 سبتمبر، 2012

ترتب الليل الطويل ..
ورتب الشوق اللذيذ وقناديلي ..
أنا لك بس ..
منتظرك ..
تجين تبعثرين أشياي .. 
تناديلي ..
أحبك .. 
هد لي حيلي ..
بعد ليلي ..
أنا أحبك بعد وأكثر ..
وأبي أسكر ..
مطر زينك .. 
خدر عينك ..
شقاوة خدك الزاهي .. 
إذا قربت له شفاهي ..
وضيعني بـ ريحة شعرك المنثور ..
مثل النور .. يا شمسي ..
ويا لذة حكي هاليوم .. وصمت أمسي ..
أبي أسهر.. على هالعنق .. 
وآتمتم بـ حنيه .. 
أحبك ...
وأستمر أعيدها بـ أنفاسي وهمسي .. !


سنياره ومونه .. !

يطير النوم من عيني ..
وأنتظرك ..
تجين وتحضنين الشوق ..
وعلى دربك .. تحضنيني ..

...

جنية الشوق ..
يا مونه ..
تعالي لي ..
أنا هالليله محتاج ..
تغنيني ..
وأبيك ..
الدم ..
وأنفاسي ..
وشراييني ..
أبي الصوره ..
لـ أول طعنه بقلبي ..
أبيها غادره ..
وإن جات أبيها تكون مغدوره ..
تعالي لي مثل ما هي ..
بـ نفس الجسم ..
ونفس الشكل ..
ونفس الوجه ..
وحتى الشعر يا مونه ..
مثل لونه .. تعالي هي ..
ويـا آهي ..
أبيك شوي بـ شفاهي ..
عشان أنطقك في شعري ..
وبـ لحونه ..
وأخلي .. تحضنك مونه ..
لا يـ الفاجره أكرهك ..
.... لكن ما أحب أتعب ..
تعب أكثر ..
ولا أسهر ..
واصير الناس ..
مثل الناس لا حبوا ..
يجون الحب ..
يحبونه ..
وبعد سنين ..
بالفرقا .. يسبونه ..
أنا أحبه ..
وأحب اللي محببني به وأنتي ترا ما لك دخل فينا ..
ولا بالحب ومضمونه ..
فهمتي كيف يا مونه ؟!!
انا .. ما خفتكم .. خايف أخون اللي لها شايف .. جيتوا لي بكم منها نمونه ..
سنياره .. بعد مونه .. هلكتوني .. هلكتوا عيوني وعيونه 
أبو سارهـ .. على هونه .. يـحاول يمزج أفكاره .. ويخفيها .. وتجي مونه .. بـ سنياره .. يصحونه .. ويخلووووووووووووونه .. !!!!
هنا الغاره .. هنا المقتل .. هنا سنياره ومونه .. كثييييييير يصورون أيام .. قبل مـ ينام .. ولكن مـ قدروا والله يبكووونه ..
وإذا جاء للفراش ينام .. قالوا قم .. وإلى منه رفض ما قام .. يخونونه .. بـ الأحرى يذكرونه ..
حرقوا عينه .. وجوا من وينه لـ وينه .. علقوا فـ عروقه بقوه .. وإلى من جاء يفككهم .. تعب منهم .. وعيوا لا يفكونه ..


أصبح على خير يا سنياره ومونه .. مابيكم أكثر يكفي شوق هالليله ..
 وإن انشدوكم غزير الجرح وشلونه .. قولوا تشافى وبكرا نهد له حيله ..


!!!

 

السبت، 15 سبتمبر، 2012

انس إن لك وطن اسمه سعودية .. !

بسم الله الرحمن الرحيم

السلام عليكم ورحمة الله وبركاته ..
أتمنى الخير .. والصحه .. للجميع ..


قالوا:
- قدرتنا على أسر قلوب الاخرين وكسب محبتهم الصادقه تمنحنا جانباً كبيراً من المتعة بالحياة.
- مجاهدة النفس على التحرر من التدخل في شئون الآخرين .. متعبة في البداية .. لكنها مريحة في النهاية.
- أحيانا تكون طريقتنا في التعامل مع الأخطاء أكبر من الخطأ نفسه.


كتبت:

الأرض أنا ..
يعني أمكم ..
وبعضكم ..
في وسط بطني ..
وبعضكم ..
ما زال يتمشى علي ..
لا تسألي .. يـ السبع فوق ..
أنتي الأمل ..
واللي قدر يمك يطير ..
وطار ..
... وإن طوَّل .. رجع ..
أنا الوجع ..
والرب عالم بـ المصير ..

...

الأرض أنا ..
يعني الوطن ..
اللي اجاباته سقطن ..
في كل مره يسألون ..
أهل الديون: إلى متى ؟!
... لا نستطيع ..
ولا مجاوب ..
أو مطيع ..
وغيرهم ..
.. مليون هم ..
مثل المريض ..
الـ واقف بدمع الألم ..
فالقيض ..
ونأسف ......
ما لقينا لك سرير ..
بخير ..
حنا ما علينا ..
والفقير ..
يضيع من ما هو لدينا .. لا تجينا ..
والوعود ..
ولو بـ ايدينا ..
لك عطينا ..
... وله عطينا ..
...... والـ عمى بعين الحسود ..
لـ الفراغ الممتلي ......
قبلك وقبل اللي وراك ..
واللي يفرك في يدينه ..
لـ الفراغ .. نزود .. حتى يمتلي .. ونزود .. حتى له تغني .. يا بلادي واصلي ..
موجود ؟!
... وينك رحت ؟!
ما به شيء ..
لكن عاجله أمر .. وتعجل في مسيره وراح ..
واستغنى بـ شكر الله .. !!
هو وش قال ؟!!
بعد أسبوع ..
أمه .. عنه تسأل ويييين ؟!!
وين ..
أمه ..
سؤال سنييييين ..
أرق عين ..
وبكَّى عين ..
وأنا المسكين ..
قبل عامين ..
سافرت .. لـ بلد خوَّاف ..
شفت أشياء .. ما تنشاف ..
وعشت ..
التجربه برهان ..
جاني ليلهم .. إنسان ..
يفضفض لي ..
وأفضفض له ..
بدأ .. والصوت .. مو مسموع ..
وإذا قرَّب أشوف دموع ..
... ويتهرَّب ..
سهارى البار .. ما خلوه في حاله ..
ويناظرني .. وهو خجلان ..
.. يأشر لي على الشباك ..
وش بك ..
ليه ..
أروح هناك ؟!
يا ..
ساتر ..
بنات الليل ..
لا ..
لـ تقول .. هذولي بنات أبليس ..
أنا يـ الليل .. متأذي ..
أنا يـ الليل .. متأذي ..
وخلاني ..
... على الشباك ..
حتى الصبح .. صحَّاني ..
ووداني يمشيني ..
وأنا الـ طيب .. على عيني ..
تلَقَّاني ..
بشر جني ..
... يصيح .. وممتلي تجريح ..
دمه .. مالي ثيابه ..
وقال .. افزع ..
...... هناك أمي ..
ضربوها ..
وشوف ذا دمي .. !!
تعضد بي .. ورحنا .. لين ما طحنا .. بمكان أعزل .. به أربع من رجال الأمن ..
قلت الأمن ..
وقال اسمع ..
هذي البنت متحرش بها ..
اختي ..
وذا منك ..
.... وإذا ما تدفع المطلوب .. نقديه ..
انس إن لك وطن اسمه سعوديه ..
وفي لحظه .....
رجعت بكل .. ما عشته ..
هناك اما بـ حارتنا .. والا في طفولتنا ..
وشفت أمي ..
وشفت أبوي ..
وشفت أهلي ..
..... وشفت الليل .. وأنوار الطريق الـ بين مكه والمدينه وشفت .... ما أمدى .. !!!
اضربوا عيني ..
يبون .. اللي يبون .. وقلت ..
أبكلم على الصاحب ..
يجيب اللي تبونه لي ..
وكلمة السفاره ..
جو ..
وفكوني بـ فلوس ..
ورحت ..
وأنا فـ الجو ..
أطالع في سماهم ..
ليلهم يبكي ..
ويقول أرجوك .. خذني معك أبي مكه ..
... ولكن ما قدرت آخذ معي الا أنا ..
وأشواق مدري منين جتني للوطن والأرض .. !!

انتهى

وقالوا أيضاً:
بدل ان تسب الظلام .. حاول إصلاح المصباح -

الجمعة، 14 سبتمبر، 2012

لغة الصمت ..

آسرتني بصمتها ..
كلّمتَهَا ..
ما جاوبتني ..
بنت ..
أحبك ..
ما ترد ..
وناظرتني ..
إيه ..
أحبك ..
والله جد ..
مطنشتني ..
جيت عند شفاتها ..
ضميتها ..
أبغاها تحكي ..
ما حكتني ..
قبَّلتني ..
وقبَّلتني ..
و قبَّلتني ..
لا شعورياً ..
حكت لي ..
شوقي ذابحني عليك ..
ويمها قوه سحبتني ..
وطيحتني ..
فوقها ..
وبجسمها تطوقتني ..
وابتدت فـ الهمهمه ..
وبلذة حكاها خذتني ..
جمَّدَتني ..
وأي حرف يذوب منها ..
آخذه ..
وأذوبه في مسمعي ..
يا أفهمه ..
يا أعشقه ..
... وأستلهمه ..
من ضحكتي إلين أقاوم مدمعي ..
"خلك معي ..
لا عاد تتركني لحالي .."
ما أبي .. أعيش دونك ..
اسمعي ..
جيتك بعد ما غبت يعني .. ما بهت فـ العين لونك ..
ما تركتك في رضاي ..
وكل لحظه تمرني واحنا بعاد .. آتمنى إنك معاي ..
وهذا صدري ..
اسأليه ..
شمي ريحك فيه حطي صدرك الدافي عليه ..
خلي قلبي .. يحكي قلبك ..
عن " وعد ما راح أخونك " ..
حتى وإن طاولت دربي ..
وما قدرت إني أكون .. راح أكونك ..
والا وش معنى أحبك ؟!
احضنتني بصمت ..
... حتى فيه منَّه حررتني .. !!



الجمعة، 7 سبتمبر، 2012

شوفيني وحسيني

من الأرشيف:
نـامـت عـنـنـا الـفرحـه .. !

.. قديمـه صح .. ؟

طيب إلـبسي الـطرحـه .. !

.. وشـوفيني ..
 
تعالي هـاتي كفـوفـكـ .. 

وحطيـهـا على عيـوني .. 

تشـوفيـني .. ؟

حـلو .. طيب .. 
وهذي كفوفي بـعيـونـكـ ..

أشـوفـكـ .. ؟ .. لا .. !

أحـسـكـ .. إيـه ..

وأنتي مـا تحسيني .. ؟!

إذا حـسـيتي بـ إيديني ..

مـثل مـا أحس بـ إيدينكـ ..

فـهذا ( الحـزن ) بـ الدنيـا ..

مـجرد ( شيء ) نشعر بـه ..

هـاتي إيديكـ بـ إيديني .. !

صحيتي صح .. ؟

وصحيـنـا الـفرح بـ الـشوف .. !

عرفتي إشلون .. ؟!

شـوفـيني .. وحسيني .. 
تشوفين الـحزن مبسـوط .. !

إذا ودكـ نعيش بـخير .. !

شـوفيني .. وحسيـني .. 

ـــــــــــــــــــــــــــــــــــــــــــ

إضافة:
شوفيني ..
وحسيني ..
عشان أعيش فيك بـ خير ..
كانت .. هـ السطور آخر .. كلامـ(ن) جاك من عيني ..
سكبته لك بدمع الحب ..
قبل مـ أنتي تخليني ..
ذكرتيني ؟
يـ آخر من رحل .. وأول من أحسه مجافيني ..
أنا أحبك ..
ومعك إنتابني هـ الحس .. 
لحالك بس ..
فقدتك .. مو أنا لحالي ..
معي حتى .. دواويني ..
دواويني .. الـ جميله بك .. 
وبـ أوصافك ..
وبـ أحلامي .. 
وفي صورة ملامح وجه .. عيا لا يخليني ..
ملازمني بكل الـ صدق ..
لا جاء الكذب باغيني ..
جميل .. الذنب ..
يا عفوه ..
والأجمل منه بـ غيابك ..
عن إقدامي له أنتي يـ الضـ.. ــمير الحي .. بشعورك تصحيني ..
حبستيني ..
عن الـ ممنوع ..
والممكن ..
تبين الصدق ؟
حتى إنه عن الـ جائز ..
عن المفروض .. 
يا عمري منعتيني .. !
صحيح إنك تركتيني ..
وعشتي بعدي سنينك ..
ولا أدري .. 
إذا أنتي إلين ألحين .. 
من قلبك تحبيني ..
ولا حتى أبي أدري ..
لـ أنه بس يكفيني .. 
أحبك وحدك .. 
ومـ الله ..
خلق بعدك أحد يفتن .. شعوري كثر ما أنتي .. فتنتيني .. !!

 


 

الأربعاء، 5 سبتمبر، 2012

محضونتي مستحيه

تحبني .. لكنها مستحيه ..
لا جت تقول أحبـ .. عيت تكمل ..
مشتهيه ولا تدري اش مشتهيه ..
أحبها والمشكله ما تثمل ..
الا اذا قالت أحبك يه يه ..
كأنها جت بالغلط .. والأجمل ..
ان الشعور اللي فقد بي وعيه ..
يجمع قصيدي في حلاها ويهمل ..
على دفاها من حياها واهيه ..
محضونتي والحزن فينا أرمل ..
من عقب ما وجّب علينا نهيه ..
يصير بالشوق الغيابي مهمل ..
وتحبني مشتهيه ومستحيه ..
وتقول (أحبـ .. بك) لازم تكمل ..


سكن الشوق بضلوعك ما على الغربه ملام
موطني ضاع ومضيع صاحبك من صاحبه
خل طفل الحب يآمن وانتبه لا جاء ينام
تُسمعه ليل المفارق والوجيه الشاحبه
يتموه سنين حتى عاش فيه الإنهزام
كل ما جاله ممات أحيوه فيه وصاح به
سالبينه بسمته فالعيب من دون الحرام
وين ما يسلك طريق الـ لا لعتقه ساحبه
مـ اكتفوا من كمكمة فاه وكفوه امن الكلام
امتلى سمعه غبينه لين جرحه فاح به
طيحوه امن الأماني ناظره لا فيك قام
كيف يآسه من أمل مسروق منه طاح به
لملم جراحه وداره من حمى مات السلام
لين يلقى له مدينه تجمع الجّرَاح به
سكن الشوق بضلوعك ما على الغربة ملام
موطنه ضاع ومضيع صاحبي من صاحبه

كتاب عطشان






الكتاب بـ صيغة (فلاش بوك):

كتاب عطشان - أبو سارهـ .. ! (فلاش بوك)

الكتاب بـ صيغة  (PDF):

كتاب عطشان - أبو سارهـ .. ! (PDF)



* تنويه:
الكتاب يعمل بصيغة الفلاش، فلا بد من توفر برنامج الفلاش في الجوال أو الكمبيوتر لديك قبل التشغيل.

السبت، 4 أغسطس، 2012

تهمته قاتل أبوه .. !

تسكن فـ بطن الأرض محدن نشدها ..
صمت الحقيقه ما به أي شيء مشبوه ..

متى الخيانة تستتر في لحدها ..
والقلب يدفن طيبته يوم خانوه ..

هذي أو اللي قبلها أو بَعَدْها ..
متعودات إن جاء لهم حب خلوه ..

يبغون من دنيا التسلي أبدها ..
وإن ما نسو مثلي بـ ذكره تناسوه ..

اما الوفيه .. ما تخلي سندها ..
لو حدت الأقدار تبكيه لـ أطروه ..

والنادره ..
تعبر على من فقدها ..
قدام عينه كثر مـ اقفوا وبكوه ..

مثل أم خلت في قفاها ولدها ..
بـ ساحة قصاص وتهمته قاتل أبوه .. !


الجمعة، 3 أغسطس، 2012

بـ أرتاح أنا يا لـ السرور .. !

بهذا الصباح ..
انزاح .. عن وجهي أنا ..
أو أنا .. انزحت عن وجه العنا ..
بـ أرتاح .. !

غمضت .. نور ..
طفله ..
بنيه ..
فاتنه ..
لا والله إلا من الحور ..
يا لـ السرور ..
تمشي على ثلج الغرور ..
يذوب ..
واحساسي يثور ..
يا لـ السرور ..
هذي المسافه تنكسر ..
من عينها مدت جسر..
أبعبره ..
فـ ايدينها ..
حالي يسر ..
وشلونك أنتي ؟ ..
إي وربي .. 
فيك يا حلو الشعور .. !!
حتى من غمضت أشوفك ..
ما أردد غير بك يـا لـ السرور .. !!

فتحت .. ظلمه ..
مـ بشفاهي أي كلمه ..
وش يدور ؟! ..
يا سطوع الشمس .. 
جـور .. 
حلم عابر كيف طار ؟! ..
ومن عطاه الحق يطير ؟! ..
من صباح الله خير .. !!

وليه ..
أبعثر ..
أو أرتب ..
صبري الحالم عليه .. !

دامني بـ أرتاح .. !
فيـــه ..

ابتسمت ..
ويا صباح إن نمت ..
أبيه ..
لا تصحيني الرياح .. 
قلها ماني هنا ..
انزاح عن وجهي .. أنا ..
أو ..
أنا انزحت عن وجه العنا .. 
بـ أرتاح .. !

الخميس، 2 أغسطس، 2012

لـ الحلم .. لك نسّاي .. !



سكوتي عنك ما يعني رضاي ..
وابتعادك مو عذر ..
ولا خطاك انك خطاي ..
اللوم كله فالبذر ..
لما غرستك وسط صدري ..
آمنك .. تارك وحدك ..
مو معاي ..
تستظل بسقف قلبي ..
على أمل أقطفك حب بلا حذر ..
بعد السنين ..
وبعد مـ الدنيا لك تزين ..
وتستقر ..
هذ جزاي ؟!
بذمتك ..
ذا اللي خذيته من وفاي ؟!
كذا تروح ..
ولا كأنك لي عمر .. !!
وتطول الغيبه بعد ..
وفـ لحظة أحتاجك تمر ..
تصب فـ شعوري جروح ..
ولا كأني انتظر ..
ولا كأن الشوق ناي ..
يعزف على حزني مطر .. 
ويدندن الحرمان ..
على جفاف الماي ..
ذنبك .. عشقت انسان ..
لـ الحلم .. لك .. نساي .. !!

الخميس، 26 يوليو، 2012

نعم أنا أقر وأعترف إني .....

                            بسم الله الرحمن الرحيم

نعم أنا ..

أقر ..
وأعترف ..
إني من أصحاب (الترف) ..
لا شفت هذولا الجياع:



وبلا شرف ..
مسرف ..
ولو قالوا فقير ..
أقول أبداً ..
أنا غني ..
قدام هـ  الطفل البريء ..




قدام هـ الطفل البريء ..
أحس فـ العالم دنيء ..
وقصة الخذلان قصة ..
كلها ذل وقرف ..
من عام ٤٩ ..
الكل يـقر ويعترف ..
إن الـ مسار المستقيم ..
غصبـ(ن) علينا إنحرف ..
٦٧ التكاتف ..
سوريا مع مصر .. والأردن ..
قووا ..
واستأسدوا ..
لكن ..
طرف .. مسك البداية لـ النهاية ..
وانجرف ..
دم الـ سلام سيول حتى .. ما أعرف .. !!
إلى متى ؟
الليكود أو حتى العمل وجيوش .. تبني ما تمل ..
تبني على عظام البرايا .. مملكة ..
والطفل فيهم .. وش أقول ؟
امن الذبول .. اللي كساه .. وأهلكه ..
صاير ينام ومقتنع .. من كثر ما عـاش فـ قمع ..
الحلم حتى فـ المنام ..
عجز .. يحاول يملكه .. !



 والله ..
.... رحيم ..
....... وعالمـ(ن) في حالهم ..
واحنا علينا فـ الدعاء ..
.... والحال ما يرثى لهم بس .. يرثى لنا حنا معاهم ..
يـا عظيم ..
.. اقبل دعاهم ..




 شيء مؤسف ..
... ما هو بس اللذي ذكرته فوق لا ..
شيء أكبر من كذا ..
بـ الرغم من كثر الأذى ..
منورين قلوبهم بـ آيات من ذكر الحكيم ..



وآهـ ..
يـا صبري علينا ..
طيبين ..
حبيَّبين ..
وعايشين فـ نور مدري في ظلام ..
أذكر ..
قبل هذا الشهر ..
شهر العبادة ..
.. من سهر طوف عِباده ..
.. ومن رقد طافت عباده ..
ولما صرنا ألحين ..
شفت ..
بعض منا ..
زان وضعه فـ النهار ..
وفـ المساء ..
شكله نسى .. !!
وأهل الصراع المستديم ..
الله كريم ..
الله رفع .. والله بسط ..
والله عليم بـ كل شيء ..
وما جعلنا تاء يمين ..
ولا جعلنا تاء يسار ..
أمه وسط .. !
خفوا علينا وان عجزتوا ..
اتركونا ..
ندعي العالم بنا ..
ياربنا ..
يا رب تهدينا السراط المستقيم ..



ويا ..
غني ..
فـي ما عطاك الله ..
وفقير ..
في ما خذيت امن الـ كئابه ..
ابتسم ..
 واسجد لـ ربك شكر ..
مـا لـ التملل فيك داعي ..
وأنت واعي ..
إنك أحسن من كثير ..

السبت، 21 يوليو، 2012

الذكريات الأماني


ابنفجر من حدة الكبت والشوق ..
الله حسيب الحب يوم امتلاني ..

ما كن لي غيرك بهـالكون مخلوق ..
مـ أقدر ولو إنك مع إنسان ثاني ..

كل ما تشجع قلبي وقال أبفوق ..
يرجع عليك وأشعر إني أناني ..

ادعي لي أنسى وارفعي ناظرك فوق ..
حتى تطيح الذكريات الأماني ..

والغيم يشعل فرحه رعود وبروق ..
واستمتعي بي كثر مـ آنا أعاني ..

أبغى أتسمع لك تقولين لي روق ..
ما عاد باقي شيء قلبك نساني ..

هذاي أشوف لمولدك مزنه تلوق ..
يكفي مطر دمع المحبه ملاني ..

لا تنفجر من حدة الكبت والشوق ..
لو مو عشانك يا حبيبي عشاني .. !

الخميس، 19 يوليو، 2012

يوميات رمضانية

السلام عليكم ورحمة الله وبركاته
مثل كل عام راح تلقون هنا السواليف الرمضانية وابياتها ..

البداية:
تعودت أكون مع أهلي في كل شهر رمضان بمكه ..
والسنه اللي راحت وهذي ما قدرت اروح معهم عشان عندي دوام ..

ارسلت بيتين للوالده:

للمسافة ظروفـ(ن) جات ما صحتها ..
ودي ابقى معاكم لكن الله معاكم ..
جنتي تحت رجلك ليتني تحتها ..
عقب ما كنت دايم وين رحتوا وراكم ..


البيت الثاني .. مثل منتم خابرين الحريم الكبار اللي يزود من العفش يقولون ميخالف حطوه تحت الرجلين، اقول لأمي امتلى تحت الرجلين تقول حطه تحت رجليني يكفي .. ثلاث ارباع العفش صار تحت رجلينها .

الأحد، 3 يونيو، 2012

والحكاية توها تحلى معك .. !

السلام عليكم ورحمة الله وبركاته ..
من زود ما تعز علي هـ المسرحية .. أو الرواية الشعرية ..
صممتها بـ طريقة عرض (فلاش بوك) ..
أتمنى تعجبكم ..


والحكاية توها تحلى معك .. !
(اضغط على الصورة)

قبل التطور والتنوع بأجهزتها


* على عجل ..
قبل التطور والتنوع بأجهزتها ..
كنت الأول عندها بالاهتمام ..
وألحين جات التقنيات وغيرتها ..
لاهيه .. يادوب تنطق بالسلام ..
القهر لاخلصت من بربرتها ..
باست تويتر وقالت له بنام ..
الظاهر ان البنت هذي اخرتها ..
تاتطيرني مع اسراب الحمام ..
لين مـ أوصل ديرتن ما عبرتها ..
لاملت حلقي بهالصمت الكلام ..
والمشاعر دورت عن فضفضتها ..
في صدور(ن) فارشه ورد الغرام ..
أمزح أمزح يافديت انا أجهزتها ..
راضين فيها ولو دون اهتمام ..
حبها فيني مؤكد سيطرتها ..
وأنتم أدرى ماعلى العاشق ملام .. !

الثلاثاء، 29 مايو، 2012

من زمان أشتهيك .. !

يا مساء المشاعر .. والغزل .. والقصيد ..
وينك ..
أبطيت قرب .. من زمان أشتهيك ..

فيني كومة رسايل ما تجي فـ البريد ..
شيلها من ضلوعي كود تكفي يديك ..

ملت امن الـتصبر والحبيّب بعيد ..
عادة الحب، لكن من متى نحتريك ؟ ..

هات منها وريد وهاك مني وريد ..
خلنا نستبيح الدم، وأستر عليك ..

ابقمرك استلذ وما نبي نستفيد ..
كافي إن الغيوم امن الحيا ماتجيك ..

عيش واترك سهرنا يبتدي من جديد ..
واظهر انت وحبيبك لين ما اختفيك ..

مع لذيذ المشاعر والغزل والقصيد ..
يمكن أشتاق وأرجع عقبها وأشتهيك .. !


الخميس، 3 مايو، 2012

تشريح

رجعت لـ أطراف البداية ..
وانتثرت ..
رحت أدور لـ النهاية ..
وين قلبي ..
وين عيني ..
وين روحي ..
وين ويني .. 
من أنا له يا جروحي ..
يا سنيني .. 
لملميني .. 
واذكريني .. 
والله إني ما تركتك ..
حتى شوفيني ذكرتك ..
ما نكرتك ..
جيتك أبغاني .. 
عطيني .. لا تخليني أعاني ..
اكتفيت امن الأماني ..
رجّعيني ..
لـ السنين الماضيه ..
ثم اتركيني ..
وأوعدك ما راح أحب ..
وأوعدك .. 
لو شفتها ..
آُصبح أناني ..
مثلها وأخونها ..
وأنتي بعينك تشهدين ..
اشلون أبهديها .. الحنين ..
اليا انهمك بـي قلبها ..
وأفنت عمر .. في حبها ..
تبغى نظر ..
تبغاني أمشي فـ دربها ..
وأخونها ..
مع غيرها .. 
وأعيش عمري دونها ..
لكن متى .. ؟
أعلمك أنا متى ..
يـ مطّوقه ..
لما يجي فصل الشتاء ..
بسادس سنه متعلقه ..
متأمله ..
متحريتني في وله ..
وبشوقها تكثر عليها الأسئله ..
وأرد شايل نعشها .. فوقه صراحه ..
وأشيلها فوق الصراحه ..
إيه أحبك ..
جيت لك .. لـني أحبك ..
بس مدري ..
شوفي شـ مخبي بصدري ..
أنثى غيرك ..
من متى ؟ ..
أعلمك أنا متى ..
بـ أول شتاء فيه إلتقينا ..
يا حزينه ..
ما كتب ربي علينا .. 
مع بعضنا نعيش حنا لـ النهاية ..
واعذريني ..
انتهينا .. 
انتهينا ..
انتهينا .. !!!



الخميس، 5 أبريل، 2012

شاعرك .. ما هو رجل .. !!

شاعرك ماهوب شاعر .. لو قصيده ما كتبك ..
يا مأججة المشاعر .. وأنتي أعذب ملهمه ..

ارتواك بـ حب حتى .. في طواريقه سكبك ..
رمّزك بـ أشياء حزينه لـ أجل محدن يفهمه ..

الحسد بعّدك عنه .. والرضا يّمه جلبك ..
حنضل العاذل عشانك يا لذيذه يلهمه ..

زارت احلامه منامك وارتمى فيها وخطبك ..
في منامه بك تغزل .. صمت زاحم همهمه ..

تسألينه وش نسى ؟..
ياصدق عمره ما كذبك ..
صورتك بـ عيون قافه .. راح تبقى مبهمه ..

لفتتك فيها شموخ انساب مع هيبة عربك ..
وفتنتك أحيان تجبر قافيته .. السلهمه ..

ينحتك بين الضلوع وونته تشعل غضبك ..
ولو عرفتي وش بـ صدره .. كان قلتي مـ أشهمه ..

شاعرك ما هوب شاعر لو قصيده ما كتبك ..
وشاعرك ما هوب رجل إن مـ احتفظ بالملهمه .. !!!

السبت، 31 مارس، 2012

يبي ضمه .. يبي من كسره الساكن .. يحن ( ..... ) ويلمه .. !

بكى ..
واشتكى ..
وما بقى شخص يقدر يرتكي به .. ومـ ارتكى ..
ترك نفسه ..
ونسى الواقع ..
سنين ..
وحالته مره ..
وفـ ليله بردها صاقع ..
ضحك (مره) ..
وذكر همه ..
وبكى أمه ..
كثر ما هي تجيب الـ "حب" .. والـ " تيتيم " .. وتمره .. !
حلف ..
يصرخ ..
ويحاكيـها " بغصة فقد " .. وما يرضخ ..
لـ " صمت أمه " ..
هدى .. همه ..
ورفع كمه .. مسح دمعه ..
وارخى شعوره لـ سمعه ..
فقير " الود " .. من لمه ؟ ..
وتناثر قلبه الأبيض .. ولا لمه ..
تألم به .. وأمّل به ..
بدا يتعلم الـ " منطق " ..
بـ " حريه " ..
وإلين اليوم .. ما " صمه " ..
كتب عن :
أرضه ..
.. ودمه ..
كتب عن :
عرضه ..
.. وذمه .. !
بلا ذمه ..
يعيش ..
ويمتلي تطنيش ..
بكى من ايش ؟
يبي " ضمه " ؟
يبي من " كسره " الـ " ساكن " ..
يحن " إحسان " ويلمه .. !
وأقول ..
" إحسان " بـ التأكيد ..
لأنه ما يبي " إنسان " ..
يبي " أفعال " ..
... بدون " لسان " ..
تعب يكفي ..
تعب .. حتى :
بكى .. واشتكى ..
وما بقى شخص يقدر يرتكي به .. ومـ ارتكى .. !




.. وأولاً ..

ح - لم أنتهي من بناء سفينتي، وجف البحر.
ا - كل ما أتقدم بالسن، تتراجع أحلامي.
ج - أفكر أن أتزوج ثانية، ولذلك حتى الآن لم أحصل على الأولى.
ة - الفقراء ينعمون بلا شيء، ومع ذلك يبتسمون لـ لا شيء، فل نقدم لهم شيء.
و - ( .......... )
ط - أن تسرق " بيت " .. أهون من أن تسرق " إبتسامة " طفل .. وحاجة يتيم.
ن - ربما تتوب، أو " تنقفط " ويعاد ذلك " البيت " برضاك أو " من ورا خشمك " .. لكن كيف ستعيد " الإبتسامة " المسروقة ذاتها ؟

* الـ بيت قد يكون:
- شعر.
- مال.
- قطة بيضاء لـ امرأة شقراء تسر الـ " العزاب".

الاثنين، 19 مارس، 2012

الحب قتل عمد .. !

والحكاية توها تحلى معك ..
كانت ..
وصارت ..
والحكاية انتهت ما أسمعك ..
لا تسمعين ..
اللي بـ أقوله ( هم لازمني سنين ) ..
ومن خيالي ..
عشتك أحلام الليالي ..
لـ المحبه ..
لـ الحنين ..
لـ الجروح اللي تروح .. وما تجين .. !
ويوم جيتي ..
قلتي "أكذب"..
وأنا أدري ..
 إنك أنتي تكذبين ..
ما تحسفت ..
أعشقك ..
والـ "محب أحمق حزين" ..
ما يشوف عيوب خله ..
يستره ..
يستذكره ..
يموت فيه .. وما يمله ..
يعشق وجوده .. وظله ..
يعطي من قلبه "رضا" ..
وإن ما كفى محبوب قلبه ..
يرتضي فيه المذله ..
أنا أعمى كنت فيك ..
وما أبي غيرك ..
أبيك ..
أسهرك ..
أصحاك ..
أبكي منك ..
ما أبكي عليك ..
وين .......
فات ..
الوقت كله في سكات .. وذكريات ..
ونبض عاشق ..
عيّش شعوره .. ومات ..
وصار شاعر ..
يكتبك ..
ويحس فيك .. ويوصفك ..
وإن جاب أحد طاريك عنده ..
ينصفك ..
ما يستمع بك أي شين ..
ويرفعك ..
حتى تصيرين بسماه ..
الثامنه .. وأنتي بلاه ..
إنسانه جداً .. طامنه ..
يا كامنه فـ الغدر مني .. لك تحيه واحترام ..
بس لكن ما بقى لك في وسط صدري قدر ..
الا ..
أحبك ..
أكرهك ..
قصدي أحبك ..
يا ضياعي ..
ما لي بعدك أي داعي ..
من يبيني ..
بعد ما خذتي سنيني ؟
وقمة شعوري وحنيني ..
علميني ؟
شـلون أعيش ؟
وكيف أشيلك من عيوني ..
من جنوني ..
من سواليفي وشجوني ..
يا وهم ..
حبيته أكثر منهم ..
من حبهم ..
من عطفهم ..
من شوقهم لي .. وصدقهم ..
يا كذب ذوق ..
يا صايره لـدمي عروق ..
يـ اللي بقى لك فيني شوق ..
يـ مسكبّه فيني كلامك ..
ماي مالح ..
لـ العطش .. زود احتياج ..
وش علامك ؟
ليه سويتي كذا .. !
بـ أي ذنب ..
طيشك ..
يحكم بـ إعدام ..
ماضي ..
كان بالتجريح راضي ..
ويستمر بظلم حاضر ..
كان يأمل ..
في حياة أجمل .. وأكمل .. !
مو حرام ؟ ..
كل ذاك الإهتمام ..
يضيع بـ أمر " إحساس مهمل " ؟
..
تذكرين ..
أيام كانت قاسيه .. وعيت تلين ؟
لما كنتي ..
ولما كنت ..
من هدوء الصبح .. آخذ لك هدوء ..
وما أطيق أشوف جزء بوجهك الفاتن حزين ؟
أخنق الوقت بوجودك ..
وأختنق به لما عني ترحلين ..
أحبس أفراحي بصدري ..
وانتظرك ..
انتظرك ..
انتظرك ..
واليا جيتي .. قلت سمي ..
أنتي أولى تفرحين .. !
وفي حضوري ..
لا تغيمتي بشعوري ..
تركضين .. وترقصين ..
وبالمطر .. تتدلعين ؟ ..
آه يا ذيك السنين ..
ما لقيتي شخص غيري ؟ ..
تعشقينه في حياتك ..
آسف .. 
أقصد في حياته تعبثين ؟ ..
 لا ..
تقولين ..
اسكتي .. 
وش بقى تـ تبررين ..
كم سنه أسمعك ساكت ..
ما حكيتك ..
جاك دورك تسمعين ..
تسمعين ؟
اللي قلته ( هم لازمني سنين ) ..
والحكايه ..
توها تحلى معك .. كانت ..
وصارت .. والحكايه .. إنتهت ما أسمعك .. !



الأحد، 18 مارس، 2012

..| شعور |..

استمرار لليوميات والمبعثرات .. !

الأحد، 11 مارس، 2012

على مزاجي .. أو على حسب احتياجي .. !

أحاول أبتسم لك ..
ما أبين لك كدر ..
وإن كان عمري راح فـ ايدينك هدر ..
ما صار شيء ..
الحمدلله ..
ما خسرت الا "عمر" .. !
حبك وفى ..
في وقت .. قلبي كان يمشي لك حفا ..
عشرين .. شاب ..
وفوقها ستة مشيب .. 
وفوق هذا بالغياب ..
كنت إظن إني حبيب ..
وللأسف ..
مثل السراب ..
الحلم ..
وآمالي ..
وأنا ..
كنا نعيش بـ اغتراب ..
ما حسبتك ..
هالكثر ..
تبني من الحب .. القهر ..
وتقول : اسكن ..
انتظر ..
يمكن .. أجي ليلة وأمر .. !
وأحن لك ..
على مزاجي .. 
أو على حسب احتياجي .. !
لا تضايقت ابـ أزورك ..
وأرتوي أعذب شعورك ..
وأتركك ..
تعطش بعد ..
وأنا أتلذذ في بعادي ..
لا وأغني لك " عبادي " ..
لا تشوه بي مصيرك .. 
يا حبيبي ذا وعد:
"آخذ على غدري عهد" ..
ما يخلص لـ غيرك .. !

...


الأربعاء، 29 فبراير، 2012

خاطر الحب

للحب خاطر .. غريب .. 
امسي كئيب .. 
وفليلته مت وذكرتك .. طيب .. تغريبة حبيب .. 
وعشت أحبك من جديد .. 
 بكل تنهيدة قصيد .. 
تشيب .. في دفتر حنانك .. ما تغيب .. 
وتنتظر تحنانك .. 
 من يقول الحب عيب ؟ .. 
دام له خاطر غريب .. 
يجيبك فليلة وله .. 
بسمة قريب .. 
اقفى غريب .. 
 وودع الماضي المريب .. !

الاثنين، 27 فبراير، 2012

ليه أكابر ؟

أكابر ..
ليه أكابر ؟
وأنا صدري سور .. جواته مقابر .. !
كم توفوا ..
وسط صدري ..
كم حبيبه ..
خلت الدنيا كئيبه ..
إيه ..
أنا مشتاق غابر ..
ذرته ريح الجفا يم الجفاف ..
وما أخاف .. امن الأكابر ..
ليه أكابر ؟
والمطر .. ما مر عابر ..
جاء يهدي لي حنيني ..
بين قلبي وبين عيني ..
يدري إني كنت صابر ..
وإني أتناسى سنيني ..
 يوم كنت أحاول أنسى بعضهم .. 
وأنسى .. نسيت .. !
ليه أكابر ؟
عيب أحب .. ؟
ما هو بـ عيب ..
لو لهذا الكسر .. جابر ..
لو ورا هالطيب .. طيب ..
كان أقول الحب .. عيب .. 
ليه أكابر ؟
يا أول الموتى .. اسمعي ..
رحتي .. وخليتي معي " احساس إنك ترجعي " .. !
وما عشت أثابر ..
قلت أحب الثانيه ..
والثانيه هألحين جنبك .. ترتوي من مدمعي .. !
ليه أكابر ؟
والكتاب اللي خدعني مو أنا .. 
أبغى أواجه .. 
شفني جيت .. 
ياللي أنت .. تقول حكمه :
كيف حكمه ؟ 
" قلبك إليا من تحطم .. 
حطمه تلقى علاجه "
وأنا حطمته .. ثلاث .. 
وما شفيت .. !
انقذني تكفى ..
رد لي شوي منه ..
عطني من قلبي شوي ..
محتاج أحب إنسان حي ..
دام صدري سور جواته مقابر ..
ليه أكابر ؟