الاثنين، 13 فبراير، 2012

ناقصه اهتمام .. !

دام غصن الفقر في مَدَتْك مال ..
وما عطيت امن الكلام الا المفيد ..

ولا خذيت القيل من لا جا وقال ..
والمراجل ما لقت غيرك عضيد ..

أفتخر بك كل ما جا لي مجال ..
وإن ذكرت أقول أبوي وما أزيد ..

الحكي بـ عيونهم أبلغ مقال ..
لـ اغبطوا حظي لأني لك (وليد) .. !


بالسماء الشمس هامت واستنار الظلام ..
عقب ذاك الغروب أشرق أمل من جديد ..

لملم الغيم صمته .. وامتلى بـ الكلام ..
وفضفض الحزن صبره فوق أرض القصيد ..

وربّع الحرف بسمه مع هديل الحمام ..
عاندت كل عبره بالمحاجر تقيد ..

رفرف البوح، راحه رغم أنف الغمام ..
صاحبت حلم صاحب فـ التمني بعيد ..

تشتكي لي .. حياته ناقصه إهتمام ..
مبتلى، والأيادي تحسب إنه سعيد ..

مدته لـ التفاؤل تفرض الإحترام ..
نَقَّص الهم عمره ... وابتسامه يزيد ..

ما على هالظروف ليا تمادت ملام ..
دام الانسان منها لـ انكوى يستفيد ..

يآلف الموج بحره لو به الغدر عام ..
ومن توفى غريق بـ رحمة الله شهيد ..

غابت الشمس .. لكن يستنير الظلام ..
في أمل كل يوم يجيب عمرن جديد .. !


سابقتك الحروف وجات ما تبغى تشوف الا شعوري بـ اهتمامك ..
واستبقت الشعور وقلت لك قلبي وأنا محنا بحاجة اهتمام ..

عقب ذاك السكوت اسألك بـ الله قولي وش بينفعني كلامك ؟ ..
صرت أصمك ولا اسمع (اشتقت وأحبك) ما يفيدك هالكلام .. !

هناك تعليق واحد:

  1. عُقب الهَجر مايفيد الملام ولا العتاب يَ يبو سارهَـ ,,
    رايقة وحبيتهَا كثيِير ^^

    فُوق فُوق أنت يَ الغالي مآأقوُل غِير الله يسهل لك أموركَ ويفتحَخها بوجهكَ ,

    ردحذف

سيتم إدراج تعليقك بعد الموافقة عليه وشكراً،