الأحد، 18 مارس، 2012

..| شعور |..

استمرار لليوميات والمبعثرات .. !

هناك 205 تعليقات:

  1. تخون الأحلام حب معشعش بصدري ..
    وتطير الأرزاق بالحاضر وبالماضي ..
    عصفورة القلب تدري بس ماتدري ..
    اني بلاها ومعها عايش وراضي .. !

    ردحذف
  2. أرغمك طيشك على التطنيش ..
    والكذب ماهوب من عادك ..
    الحب مايستمر بالطيش ..
    ياللي خذلتيه بعنادك ..
    روحي ولانيب سائل ليش ..
    الله يوفقك فبعادك .. !

    ردحذف
  3. لا تمايع فالتعامل مع بنات الناس واثقل ..
    الرجل يبقى رجل وإن كان في بيئة بنات ..

    لك خوات وفيك غيره والذكي يدرك ويعقل ..
    من تخلى عن خواته صاروا لغيره خوات .. !

    ردحذف
  4. حبيت .. صمتك .. سواليفك .. وضحكاتك ..
    وأموت بـ أنفاسك أكثر شيء وبـ طيشك ..

    كنت أحلم إني أعيش بمعظم أوقاتك ..
    وألحين أبي أهرب من الكون وأعيشك .. !

    ردحذف
  5. ابتديك منين يا حلو السنين ؟
    وانا كل ماجيت انام ..
    انهي يومي فيك واتعب كل ماجيت انتهيك ..
    معك كان الليل رايق ..
    والشعور كثير لكن .. ننسرق منه بدقايق ..
    كنت أحب .. قبلك وما كنت أعرفك ..
    وين قلبك ..
    اللي حبيته كثر ذاك الشعور وما قدرت أقول أحبك ..
    رجعيه شوي بس ..
    لا ترديني بـ ليش ..
    منه انا محتاج احس ..
    وفيه انا محتاج اعيش ..

    ردحذف
    الردود
    1. معك حتى الصبح لآيق..
      لا ولا يبدا صباحي , الا فيك
      فيك لك منك عنك ..
      واااه من خوفي علييك ..
      كل هذا في صباحي ..
      شوف ياا شوقي اليييك..

      حذف
  6. تأملتك ..
    بزخات المطر ..
    حتى من أشواقي تألمتك ..
    يـ ريحة هالمطر جيبي ..
    حبيبي لحضني وغيبي ..
    أنا ماعدت فيك أفرح ..
    لأن بعض المطر يجرح ..
    خصوصاً لا لفى لحاله ..
    وأنا من وين انتظره ..
    يجي ويجيب لي وصاله .. !

    ردحذف
  7. لا التقيت بـ من توده ..
    احضنه .. وبوس خده ..
    وان شعوره باح لك ..
    واحتاج من عذبك شعور ..
    لا ترده ..
    عطه من مـ أعطاك ربك ..
    وضل ردد له أحبك .. 
    وأنت ماسك في يديك الناعمه أطراف يده .. !

    ردحذف
  8. الله عطانا الحياة ومن عطايا الله .. اللي تركت بالمريخي عشقها وراحت .. خلت بصدره سيوف الشوق منسله .. وريحة منيفته لامنها طرت فاحت .. ربي يعوضه في نجمه تفطن له .. لامن سماه لمنيفه امن الوله ناحت .. !

    ردحذف
  9. مجبور يا كسر القصايد ولا باس ..
    الشامخه ما تنحني لأي آفه ..

    تبقى بعضك امن الجزيلات تنباس ..
    لا من كثر بالشعر مـ الشعر عافه ..

    ردحذف
  10. الحب فن .. ومايجيده ممثل ..
    الحب مسرح .. والجروح الجماهير ..

    احيان يجيبك عقب عزك محثل ..
    واحيان بك يمسي ويصبح على خير .. !

    ردحذف
  11. أيام ما هيب عاديه ..
    راحت وخلتني أنتظرك ..
    يـ بنيه .. قصدي يـ حوريه ..
    كسري وكسرك .. يبي جبرك ..
    ردي علي مني شويه ..
    وأوعدك أرجع على خبرك ..
    أكتب على الصدر ريميه ..
    وأميل الشعر في خصرك ..
    أخلي القلب محميه ..
    وأوامر الكل تحت أمرك ..
    أرد من جا يبي شويه ..
    وإن راح عني بـ أقول أبرك ..
    دامك معي .. كن معي ميه ..
    الا كثر حبي .. وكثرك ..
    لامن لمحتك .. بـ مرثيه ..
    خلتني أردد لـ قبرك ..
    أيام ما هيب عاديه ..
    راحت وخلتني أنتظرك .. !

    ردحذف
  12. كنت أروضها بـ " غيره " ..
    ..... حتى صارت في عيون القلب .. وعيوني صغيره ..
    مـ احفظتني ..
    ... يوم كانت فوق متني ..
    واتركتني ..
    لـ الأخيره ..
    لـ الأميره ..
    لـ الكبيره ..
    لـ الحقيره ..
    لـ اللي مدري .. كثير كانوا ..
    واستكانوا ..
    ثم عانوا ..
    واستعانوا بـ " الكسيره " ..
    ما هي سيره ..
    يا أسيره ..
    كنت أروضها بـ " غيره " ..
    لين ما صرت أروض " غيرتي " عنها .. وخيره ..
    والله خيره .. !!!!

    ردحذف
  13. النوم فاتح يدينه لي ..
    كنه يقول اقرب اتحضنك ..

    وقلبي يرده وهو يغلي ..
    مابيك أبيها تحضنه عنك .. !

    ردحذف
  14. ما مات حلم .. الا انولد حلم ثاني ..
    هذي الحقيقه .. باعثه للتفاؤل ..

    لكن يعيش الحلم الأول .. عشاني ؟ ..
    حاجه خيال .. وتستحق التساؤل .. !!!

    ردحذف
  15. خياال ..
    لآتحرمنا هـَ الشعوور ..

    ردحذف
  16. ياللي سرقت القلب عني لاتغيب ..
    ودي أحس إني معك قسمه ونصيب ..
    ودي أحس إنك حبيب ..
    إنك حبيب ..
    إنك حبيب .. !

    ردحذف
  17. جابك على خد الورق دمعي ..
    متى دموع الغيم تاتي بك ؟

    ويرتوي بمداعبك سمعي …
    مابين رقصك وتلعيبك ..

    ردحذف
  18. تضم وما لها خاطر ..
    تفكر فيه وتحضني ..

    حسافه جونا الماطر ..
    حسافه ياصغر سني ..

    عطيت وقلت ابخاطر ..
    واثاري الحزن اخذ مني ..

    ردحذف
  19. يبتدي يومي ... وآجيك ..
    شايل بصدري صباح ..
    وشمس عينك ..
    تشعل أحلامي .. وحنينك ..
    وأنتظرك تقول وينك ؟
    من متى وأنا أحتريك ؟
    جعلني فدوة سنينك ..
    ارخ يديك .. وضمني لين امتليك ..
    ما أبي يومي بدونك ..
    وإن لفاني اليوم دونك ..
    عادي ياعمري .. أبيك ..
    أنت يوم وكل يوم ابيبتدي فيني بلاك ..
    ياضمى أيامي بـ أجيك .. !

    ردحذف
  20. الـ وحده ..
    أحلى من شعور اللمه ..
    لا صار نزّاف الحكي مو يمك ..

    على الأقل تتخيله وتشمه ..
    ... وتطّير أسراب الحزن في كمك ..

    ودك تضمه ؟ ..
    لا تردد ضمه ..
    اهتم فيه .. وغيبته .. لـ تهمك ..

    وسّع ضلوعك .. واشعر إنك يَمه ..
    اقرب لـ صدره واحم فمه بـ فمك ..

    اشهق زفيره يا برودة دمه ..
    خله يشب .. ويحترق .. ويضمك ..

    حتى تحس إن البشر ملتمه ..
    لا صار نزاف الحكي مو يمك .. !

    ردحذف
  21. تنبع ..
    أنوثتها عذوبه .. أو عذوبتها أنوثه .. !
    (ا) من الخيال ..
    ... (ا) جمعت في زينها ..
    أجمل أحلام الرجال ..
    ومـ اكتفت ..
    حتى عطت باقي البنات ..
    شوي منها ..
    شوي بس (ا) من الجمال ..
    وخلت الباقي لها ..
    محسود أنا ..
    من ظلها ..
    إذا تركت شمس الصباح ..
    وكوب قهوتها .. وضحكتها ..
    ووردها ..
    وروزها ..
    وفلها ..
    وجت تبيني كلها .. !
    محسود أنا ..
    مني أنا محسود ..
    لني .. بـ " الشعر " محتلها .. !
    وما نيب شاعر ..
    الا بي كومة مشاعر ..
    وارتمي بحضن الشعور ..
    كل ما نادت يـ " دلي " ..
    كيف صبحك .. ؟
    وأتنهد ..
    نووور .. نوور ..
    فيك ..
    وأحس بغرور ..
    لما أذكر إنها :
    تنبع ..
    أنوثتها عذوبه .. أو عذوبتها أنوثه .. !
    من الخيال ..

    ردحذف
  22. تقفل شبابيك الوفا .. وتروّح ..
    ما كن عصفور المحبه غرّد ..

    ولا كن شاعرها بقلبه طوّح ..
    حتى قصيده من حلاها ورّد .. !

    ردحذف
  23. أمي ..
    سماء وأنفاس عمري عصافير ..
    ولولا السماء ما عاش بالجو عصفور ..

    معها أعيش بـ حب وأرقد على خير ..
    وأصحى بـ أماني محققه وأصبح بـ نور .. !

    ردحذف
  24. يمتلي صدري ( طُهر ) ذاك الزمان .. وانتظرك ..
    من ( صباح الخير ) .. حتى ( نام يا أنتيمي ) .. !

    ردحذف
  25. يفتق ضلوعي خيالك .. ويش أسوي به ؟
    أجيه فاتح يديني .. ما تحضني ..

    قلبي يقول الله يحاسبك يـ الغيبه ..
    وأقول خلك معاها لا تجنني ..

    متشبب الحب .. يتصبر على شيبه ..
    وحبها في ضلوعي من صغر سني .. !

    ردحذف
  26. يـا ..
    شايله معك فـ رحيلك .. كل شيء ..
    باقي أنا ..
    التفتي وخوذيني .. !

    ردحذف
  27. نسيت أعلمك ..
    إني ..
    أنا ..
    حييييل أكرهك ..
    لما يجي فـ قلبك شعور .. إني .. أنا .. كنت أكرهك .. !!

    ردحذف
  28. مع إحترامي ..
    مو صحيح ..
    وجهك حلو .. ما قلت شيء ..
    بس أظلمك .. لما أقول إنه حلو وأسكت كذا ..
    وجهك حلو .. وأكثر إذا لامسته ..
    وجهك حلو .. وأكثر إذا اتنفسته ..
    وجهك حلو .. كل ما أشوفه يبتسم ..
    وجهك حلو ..
    كل ما على وجهي رسم .. (((( يا حلو وجهك )))) .. !!!!


    * شطحه

    ردحذف
  29. كل ما تجين ف خيالي ..
    من خيالي أسرقك ..
    وأكذب على صدتك لا جت تموتني ..
    أغرقك ..
    وأموت فيك ..
    عندي أريح من رحيلك ..
    وانتظاري في بحر غيبتك ..
    لين أموتـ .. هم .. ومـ أغرقك .. !!

    ردحذف
  30. دمعك ( ندى ) فرحه يقوطر على ( ورد ) ..
    ( بستان ) حلوك مبسم ( التوت ) عاشه ..

    ضاقت بك ( أشواقك ) من الحر لـ البرد ؟ ..
    صدري سماك اتمخطري يـا فراشه ..

    ردحذف
  31. رتبت سُحب الـ ( عمى ) بعيون ( ضميانه ) ..
    ود أرتوي ( شوفها ) لا فارقت ( حلمي ) ..

    مانيب طيب .. وليه الروح ذبلانه ؟ ..
    لا تسألوني .. لأني ( علمها علمي ) .. !!

    ردحذف
  32. تحركت ..
    خدودها ..
    ويدينها ما ترتجف ..
    مو خايفه ..
    لكن مبين ريقها ..
    من شوقها .. المجنون جف ..
    وكل مال خدودها ..
    تاخذ لشوقي .. شوقها ..
    وأحلى ابتسامه ..
    حركت فيني شعور ..
    وجات فيها بـ كل غرور ..
    تقول يا عمري .. هلا ..
    صبحني الله بـ السرور ..
    وفيك يـا ..... لـ تكملين ..
    أنتي .. الصباح يزين فيك ..
    ويمتلي بـ خدودك السمحات نور .. !

    ردحذف
  33. لبستها غيره وشوق وأماني ..
    وانا جروحي عاريه من سببها .. !!!!

    ردحذف
  34. ما كنت محتاجني ..
    كثر مـ أحتاجك .. !


    صباح الأحلام يا أجمل من الأحلام ..

    ردحذف
  35. الا بلا ضايق ..
    من غيبتك أمس ..

    ..

    حبك يجي رايق ..
    مع مطلع الشمس .. !

    ردحذف
  36. تبغى تحب وما يضايقك حبك ؟!
    حب نفسك ..
    حب شكلك ..
    حب طبعك ..
    وقبل هذا كل ابوه ..
    حب ربك ..
    ثم امك ..
    ثم ابوك ..
    وثم اهلك ..
    ثم ربعك ..
    وانتبه تنسى حبيبك ..
    قبل نفسك ..
    حب روحه ..
    مع جروحه ..
    اشتاق له ..
    فمواصله ..
    وبغيبته ازعل عليه ..
    ولا تبيّن ..
    خلك اوفى ..
    الامر هيّن ..
    يبقى واحد ..
    راح وباقي لك ٨ ..
    أهم منه ودون منه ..
    حُب ربك ..
    يحرسك ..
    وحُب امك مع ابوك ..
    بأي ذنب تشتته ؟؟
    خله يروح ..
    وشيل من صدره جروح ..
    وانتظر ..
    ان ما رجع بالصيف يمكن .. يرجع على وقت المطر ..
    وان طول غيابه .. تصبّر ..
    لا تقول انه تكبّر ..
    الله أكبر ..
    سامحه ..
    حتى تعيش وما يضايقك حبك ..
    عيش حُبك .. !!

    ردحذف
    الردود
    1. مرررة حلوة ..

      حذف
  37. هالوقت ..
    لا روقت ..
    تسلبني الذكرى ..
    وانطر يجي بكرا ..
    انسى به اني اشتقت ..

    ....


    والنوم ... تقصر مسافاته ..
    الصبح دائماً أقرب ..
    ملسوع قلبي ولا فاته ..
    من ساعتي غير هالعقرب ..

    ..

    بشويش ضمي عييناتك ..
    من دون يا منتظرني ليش ..
    نامي .. ولا فيه ما فاتك ..
    غير اني اموت بك بشويش ..

    ..

    ردحذف
  38. ماذبحني الشوق .. بس ..
    ابغى نفس ..
    ابغى احس اني اعيش ..
    ابغى احس ..
    محتاج أشوفك ..
    لن عيني مبطيه عن كل زين ..
    عن شيء واو ..
    حتى اخر مره فيها ..
    اتذوقت حاجه جميله ..
    لما آخر مره شفتك ..
    وانتي بشفافك حلاو ..
    تذوّقينه شقد حلوه ..
    شقد ريقك .. حيل حالي ..
    وانا سارح في خيالي ..
    واتمنى آه لو كنت بمكانه .. !

    ردحذف
  39. هذي لحظة اعتراف ..
    ان كان ودك تسمعين ..
    إيه أنا دونك أخاف ..
    وخاطري جداً حزين ..
    وعايشـ(ن) عقبك جفاف ..
    بشوق عيا لا يلين ..
    ضلوع صدري هالنحاف ..
    مخاويه عوق السنين ..
    وصايره بعدك تعاف ..
    تمسها اية يدين ..
    وكل مـ اطروا لي زفاف ..
    اضحك على المتزوجين ..
    اخاف دمعاتي تشاف ..
    اليا بكيت امن الحنين ..
    وهذا آخر اعتراف ..
    ان كانك اصلاً تسمعين ..
    أحبك لحالك وأخاف ..
    انك بحبي تعرفين .. !!!!!

    ردحذف
  40. لبيه .. تنساب من فمها على فمي ..
    وأذوب فيها بلا تفكير .. وأحضنها .. !!!

    ردحذف
  41. امسحي خدك بصدري ..
    والله أدري ..
    إن دمعك مو تدلع ..
    شوقك فقلبك يولع ..
    بس بدري ..
    تونا هذي البدايه ..
    ساعدي نفسك .. عشانك ..
    لين نوصل للنهايه .. !

    ردحذف
  42. أمراض الأجساد والأفكار مقدوره ..
    والله يشافيك يا قلبي من آلامك ..

    أتعبك شوقي كثر ما أشوف هالصوره ..
    وأتعبت نفسي معاك بـ سطوة أحكامك .. !

    ردحذف
  43. حديت قلبي على ما كان ينفر منه ..
    وأقلعت عنها وزاد إدمانها فيني .. !

    ردحذف
  44. مـرحب بها كثر ما عيني تزاولها ..
    وتشوفها بـ الوجيه .. الشوق يا مرحب ..

    مر حبها .. عذب لا منه تخيلها ..
    قلب امتلى حلوها من قبل هالمر حب ..

    ردحذف
  45. راحت دقيقه وانتظرتك لي ايام ..
    ياللي خذيت امن الثواني دقيقه ..
    ماجيت طالب حق والحق مـ انلام ..
    لامن بهت فالصدر حبك بريقه ..
    معقول هانت عندك آلام واحلام ..
    كانت فصدرك للمشاعر حديقه ؟ ..
    وين اهتمامك فالمحبه لي العام ..
    ليش الوفى يضمى ولا تبل ريقه ..
    قصرت انا في شيء قلي ولا انام ..
    الا وجايب حاجتك في دقيقه ..
    اما اني اجي لك وتتركني ايام ..
    هذي بحق وحمل ما لا أطيقه ..

    ردحذف
  46. سرقت قلبي وانت له مالك ..
    غميضه ازعل مالي ومالك ..
    يفداك دامه حرك ومالك ..
    مانيب سائل عنه موليه .. !

    ردحذف
  47. السهر للحزانى ياقمر صدر حاني .. والسماء حاضنتهم واسأل نجومها ..
    تستميل الحروف لصمتهم بالمعاني .. مايخون الكلام فبوح مهمومها ..

    ردحذف
  48. يدق الليل بيبان الغرام وتفتح الأشواق ..
    من المهجور يـ الذكرى سواي وفاقدن نوره ؟ ..
    من يسلي سهر عينه بدمع يبلل الأوراق ..
    ودبله طاحت من الحب وورده جنبها صوره ؟؟ ..

    ردحذف
  49. مهما ابتعدتي عن حياتي قريبه ..
    لـنك جريتي بالعروق وحييتك ..

    ما عادك فـ عيني لـهلّا حبيبه ..
    لكن وربي ما سليت ونسيتك .. !

    ردحذف
  50. على غصن الهوى غردت يا حلم العمر سلوه ..
    تبي أنسى وأبي أنسى ولكن وش ينسينا ؟ ..
    اذا أيامنا الصعبه وحنا مع بعض حلوه ..
    - ( بـ كيف الحب يذكرنا لو الفرقا بـ تعنينا ) ..
    - ( فدا للحب والفرقا يذكرنا وتبكينا ) ..

    ردحذف
  51. أزال المؤلف هذا التعليق.

    ردحذف
  52. جتني وحناها على الكفين سايل ..
    وبشفايفها كلام اتعب حياها ..
    ناظرتني والعيون ابها رسايل ..
    وصلتني بمبتغاي لمبتغاها ..
    غسلت يدينها ومانيب قايل ..
    عقبها وش صار لكني معاها .. 
    في ضلوعي من لذيذ الحب شايل ..
    طفله وشاعر أسر قلبه هواها ..

    ردحذف
  53. ياصعب لحظات الوداع ولحظة فراقك ..
    كانت علي اصعب من وداع موطن ..
    رحتي وضميتي معاك قلوب عشاقك ..
    ترحل بحب وشوق لم واشنطن ..

    ردحذف
  54. خايف عليك من السفر والمسافه ..
    وخايف على نفسي من الحب والشوق ..

    كل السعودية بدونك حسافه ..
    لاطعم فيها دون قربك ولا ذوق ..

    ردحذف
  55. كل القلوب الطيبة ماعادت اصلاً طيبة ..
    دام القهر والكره إلى من حط فالواحد تلف ..
    حتى الحبيب المنتظر يشفق عليه حبيّبه ..
    غدى فقيرن للفرح ويدور البسمة سلف ..

    ردحذف
  56. عطني وعد والتزم به او ..
    مافيه داعي تواعدني ..
    والا اعتذر دون ليه او لو ..
    ساعدتك اعذرك ساعدني ..

    ردحذف
  57. النوم لو مـ ألتحف صوتك ..
    كوبسني وضيّع أحلامي ..

    هاتي الأنفاس حتوتك ..
    واتحضني صدري ونامي .. !

    ردحذف
  58. الفراق البارد أجمل من وصال مقطّع ..
    والحبيب المنكسر لايجبر أحدن يجبره ..
    شبّاب نار الحب يصبر لو بها متلطع ..
    ان دفا والا ترى مافيه شيء بيخسره ..

    ردحذف
  59. تحت خط الحنين وفوق خط الوفى ..
    ماتوا العاقلين وعاشوا الأغبياء ..
    كثر مـ المستقيم بـ الاعوجاج اكتفى ..
    ارتطمت بخيانة وقت للأوفياء ..

    ردحذف
  60. لا تستبيح الغرام فقلب معشوقك ..
    واحذر تعانده في شوقه وتلطيفه ..
    كل ما تحس إن حبه مو على ذوقك ..
    تذَكَّر إنه يحبك مو على كيفه .. !

    ردحذف
  61. نفضت هم الرحيل ..
    وطاحت أحلامي .. !

    ردحذف
  62. هذي البداية والنهاية واضحه ..
    وش يعقب العود من حرق الجمر ؟ ..

    ووش يخلي هالمشاعر فاضحه ..
    غير نار الحب والموت الحمر .. !

    ردحذف
  63. يا عالم المجهول خذني أنا تبت ..
    ما عاد لي في واقع الحلم لحظه ..

    بكرا إذا شاب الزمن والا أنا شبت ..
    لازم تزحزح عن فضاء الكون أرضه .. !

    ردحذف
  64. كدر وجودي خاطرك عندها .. بس ..
    ما كنت حاضر روح معها معك حي ..

    يكفي بـ رغم البعد قلبي بك يـ حس ..
    وهي بـ حضني ما أحس بـ ولا شيء .. !

    ردحذف
  65. لـ الذكريات عيون تتبع مسيري ..
    من وين ما وجهت ردت لي أيام ..
    وان جيت مع غيره وهو جاه غيري ..
    أقلها نبي نتشاوف بـ الأحلام .. !

    ردحذف
  66. كن الغريبه حلم ضيَّع صاحبه ..
    مع الكئيب ابن الغياب ابن الكئيب ..

    ينَقله بين الجروح السايبه ..
    بـ لا وطن ولا أمان ولا حبيب .. !

    ردحذف
  67. كان العشم أكبر ولكن خساره ..
    فيك العشم والا أنت مانيب خاسرك ..

    ردحذف
  68. يا مساء الغير ..
    طير ..
    خلهم بي .. ممرحين ..
    أميرتي ..
    والعيد واحد ..
    مُفرحين ..
    وطيبين ..
    وكل عام ..
    وأنا فيهم بـ ألف خير .. !

    ردحذف
  69. لا تسأليني عن جمالك .. غير أنتي ..
    مو فـ لبسك بس والا في .. سمارك ..

    بـكل شيءٍ في عيون الغير .. زنتي ..
    وفي عيوني عيد .. وعيدي بك مبارك .. !

    ردحذف
  70. يـ معيّده .. مع غيرنا كيف عيدك ..
    حنا بـخير .. ونسألك .. جاوبينا ..

    لا تتركين الحزن يمشي فـ وريدك ..
    صار اللي صار .. وفدوتن لك يدينا ..

    تفائلي كثر البكاء ما يفيدك ..
    يبقى الأمل .. لو ضاقت الأرض فينا ..

    الا نحبك .. نذكرك .. لا وأزيدك ..
    فـ العيد .. قبل العيد فيك ابتدينا ..

    يـ معيّده مع غيرنا كيف عيدك ؟!
    قولي بخير .. استبشري وعايدينا .. !!



    ردحذف
  71. تاخذك الأفكار وتوديك وتجيبك ..
    من ساحة الحرب للغربة ولـ أطفالك ..

    والصمت يترك وحرف الحب يمضي بك ..
    على حسب ما بنيت فـ صغرك آمالك .. !

    ردحذف
  72. موطني ..
    قصرت في حق نفسي .. قبل أقصر بحقك ..
    والمشكله .. رغم إعترافي ..
    مـ أعترفت .. فيني ولا حاولت حتى تعترف ..
    وتلومني ..
    لا قلت لك .. والله قرف .. !

    موطني ..
    فوق ..
    جربت أساعدك ..
    ساعدني .. عليك ..
    لا تخليني ..
    أبيك ..
    لك حق ما أنساه ..
    وأنته بعد لا تنسى ..
    لي عليك حقوق .. !

    ردحذف
  73. على عجل ..
    وقبل المراجعة والتنقيح وعشان ما أنساها وتضيع مع الأوراق:

    مع السلامه يالديار الفاجرة ..
    كان الفجور اللي لقينا بك بسطنا ..

    غير الأول من كثير الآخره ..
    ما احترامي مـنتب أحسن من بلدنا ..

    ودنا بالجو لكن قاصره ..
    إرادة الله فوق ما حنا أردنا ..

    ما علينا والوناسه نادره ..
    لكنها تكثر ليا منا قنعنا ..

    بالنفوس ذنوب تبقى صاغره ..
    للمغفره مهما قربنا وابتعدنا .. !

    ردحذف
  74. وبرضو على عجل .. وعشان ما تضيع مع الأوراق:

    شوقك لنا ما عبر ولا تعدانا ..
    يمرنا كل ليلة جعلنا له فدى ..

    يمه ولا غيرك أحدن فاقد خطانا ..
    وَصَّل حنانه مع أصوات البطى والصدى ..

    يا قلبها بعد ربي دمت وايانا ..
    عشان نبقى بخير ولو يطول المدى ..

    وارفق عليها كثر ماهي تحرانا ..
    للحين بعيونها تعيش فرقى هدى .. !

    ردحذف
  75. ما يهاب الليل مولود الظلام ..
    ولا يعيش الخوف قلبـ(ن) من حجر ..

    لـ امتلى صدر الغبينه بـ الكلام ..
    في وجيه الساكتين بـ ينفجر ..

    عيب كلمة حيل تفرق عن حرام ..
    والله اللي يعطي الناس الأجر ..

    انتبه لك لا يضيعك الزحام ..
    فـ الغروب ولا تلاقي لك فجر .. !

    ردحذف
  76. مكسور الأشواق ما ينزل ولايرقى ..
    الا على الفاضي ومنه وللأفضى ..

    لا هو بعارف يعدي غيمة الفرقا ..
    ولا بغير الحبيَّب قادر(ن) يرضى ..

    ردحذف
  77. قلبي عشانك مستعد يتألم ..
    بمفارقي لا صار هالشيء يرضيك ..

    خوذيه مابي عنه معك أتكلم ..
    حالف يخليني إذا جيت أخليك .. !


    ردحذف
  78. صايمك ..
    ما أدري متى بـ أتعيدك ..
    والصبر ما جابك ولا عاد ينطاق ..

    رتب غيابك ..
    وأكتب أفراحي بـ يدك ..
    تعبت أعيش الفوضويه بـ الأشواق .. !

    ردحذف
  79. مدي عيونك ..
    وابسطي راحت يديك ..
    خلي السحابه تمطرك لين تروين ..

    أنا حبيبك ..
    بس مجبور أخليك ..
    بين الضلوع وجنب قلبي تعيشين ..

    ردحذف
  80. حديث قلبي .. كمله ..
    وأنت عارف كم له ..
    عايش به الصمت الأليم ..

    كنت فيك .. أأمله ..
    كل من سأل أأم له ..
    أقول إي ماهو يتيم ..

    بس نبضه همله ..
    والحرف صاير هم له ..
    لذلك إحساسه عقيم .. !

    ردحذف
  81. الشمس ما تفهم الا النور يـ المظلم ..
    غير طريقة كلام غروبك .. لـ شرقك ..

    علمني بـ قسوتك .. واعدل .. ولا تظلم ..
    عن جفوة الغيم لـ البيداء وش فرقك ؟ ..

    ردحذف
  82. توتك غصن ..
    ميَّل على أطراف الشفاه .. وآهـ ..
    لذة عبيرك ..
    لهفتي ..
    تنهديتك ..
    خلوا شعوري .. طيرك ..
    يمشي على غصنك .. وأنا أمشي وراه .. !

    ردحذف
  83. مستلهمك ..
    هـ الليله أكثر من قبل ..
    مدري لأني .. فاقدك ..
    والا لأني مشتهي .. آخذ من شفاهك قُبَل ؟ ..

    مستلهمك ..
    وأكتب معك عن ذكريات ( "آسف حبيبي" و "أسمعك" ) ..
    صوتك هنا ..
    وصورك بـ عيني ..
    وشعوري اللي يدمعك ..

    مستلهمك ..
    وأقطفك من بين الحروف ..
    إحساس أبكم ما يشوف ..
    ولا كتبته في طريقك ..
    ما يمر بـ أي خوف .. !

    مستلهمك ..
    وأحلف بربي ..
    إني لين اليوم أحبك ..
    وإني مخلص لك بـ حبي .. !


    مستلهمك ..
    هـ الليله أكثر من قبل ..
    كـ العاده أصلاً ..
    كل ليله أحتريك .. أستلهمك أكثر .. وأكثر ..
    لا بعد .. وأدورك ..
    بـ رفوف حلمي ..
    بـ الصور ..
    بـ جنوني الـ عيا يصدق ..
    كيف صرت ألمس جبينك .. بس مـ أسمع منك شيء ؟
    وأنا يـ الكانت كفوفي قبل مـ ألـمـسـ .. ـــتلهمك .. !!



    ردحذف
  84. وجه السعد بالصدر شايل مشاريه ..
    لـ الوقت ..
    ماهي لـ الصديق المخالف ..

    اخوان شعر .. وكل مشهى وطاريه ..
    والناقد المنقود ساكت ووالف ..

    عيَّش .. حنينه بالحروف المداليه ..
    كنه على جفو المحبين .. حالف ..

    تفعيلته من بحر الإحساس تسقيه ..
    ملح الـ تمني .. والصبر .. والتآلف ..

    ما أرتوت بـ الأبجديه معانيه ..
    والبوح دون شعور .. متلف وتالف .. !

    ردحذف
  85. جات سكرات الفراق وفات من جنبه ولا كنه يموت ..
    فاقد احساسه عمى قلبه وروحه طالعه من مبطي ..

    كنت أشوفه شايل الذكرى بصمت وينشد المقفين صوت ..
    والصدى مل يتردد فالطريق اللي عجز لا فيه يخطي .. !

    ردحذف
  86. صبت على ثلج المعاذير .. بسمه ..
    ذابت بها طعناتها من دفاها ..

    ردحذف
  87. خلي (مساء الخير) .. (عمري) على جنب ..
    وش رجعك بعد الخطا .. والقطاعه ..

    (متندمه) ! ..
    لكن جرحتي بلا ذنب ..
    آسف ..
    عجزت أسامحك عن قناعه .. ؟!



    ردحذف
  88. ناسيك في قلبي قبل ما تغيبين ..
    طفله عبثتي فيه حتى كبرتي ..

    معقول ..
    هالذكرى صحت ..
    ليش هـ ألحين ؟!
    فـ اللحظه اللي صرت أحس اخت صرتي ..

    شكلك زهقتي ..
    ناويه ..
    لا تردين ..
    خليك عنده .. مـ أنتي مرته ومرتي .. !

    ردحذف
  89. يـا آسيا مستعصيه ليه ؟! روفي ..
    هذا الهلال إن مـ احتضنتيه من لك ؟!

    بذل جماهيره عشانك .. وشوفي ..
    كم ضيع بدربك .. وعيا يدلك .. !

    ردحذف
  90. كذاب من يبكي مفارق حبيبه ..
    ما غير فرقا الأم فرقا تبكي .. !

    ردحذف
  91. هو يوم .. عندي كنه سنين يمه ..
    مثل الطفل دونك تمر الدقايق ..

    محتاج ولا غيرك من الناس همه ..
    صاحي ..
    أكل ..
    مبسوط .. والا متضايق ؟!

    يا جعلني ماذوق حزنك .. وأشمه ..
    ياللي معك يومي .. حنيَّن ورايق .. !

    ردحذف
  92. ما خاشرك بـ الحب .. غير الحبيبه ..
    يمه .. وتبطي ما تعدت غلاتك .. !

    ردحذف
  93. تبسمي .. يا حلو هـ الإبتسامه ..
    لا بيَّنت ملامحك زين .. وأبطت ..

    من فتنتك .. ما هي مجرد علامه ..
    بلحالها .. على الجميلات غطت .. !

    ردحذف
  94. أزال المؤلف هذا التعليق.

    ردحذف
  95. قلبي تمايل بـ حبه لك على كيفك ..
    بـ أول لقا وابتسامه للنزيف العصي ..

    لا تسأليني أحبك من ورا طيفك ..
    هذي الصراحه وقومي يا غلاي ارقصي .. !

    ردحذف
  96. فارقه معك يعني ؟ ..
    روح ... لا تلعب ..
    هذا أنت .. من يوم شفتك متلف أعصابي ..

    ما هو بـ شغلك حبيبي خلني أتعب ..
    وفر سلاماتك .. يكفوني أحبابي .. !

    ردحذف
  97. طريقتي فـ الكلام أحيان تتغير ..
    ماهو معك بس مع قلبي وتلويعه ..
    بـ الذات لا قمت اتأتأ كني صغير ..
    وده يعبر .. وعيا لسانه يطيعه .. !

    ردحذف
  98. الليلة المتبوعه بـ يوم إجازه ..
    تطول بـ التفكير منها وفيها ..

    القلب مل الصبر وما فيه عازه ..
    أكثر من اللي فات يصبر عليها .. !

    ردحذف
  99. أوعدك أحاول قد ما أقدر .. أنساك ..
    لكن تواعدني إذا أشتقت .. ألاقيك ..

    من غير لا تسأل إذا جيت .. وش جاك ..
    طمن شعوري .. ضمني .. قل هلا فيك ..

    لا تقتل بقسوة تغليك .. لاماك ..
    عشان أعيش بـ خير وأقدر .. أخليك .. !

    ردحذف
  100. بحياتي حزن ..
    وأفراحي بلا سمعه ..
    ينعاد بعض الحكي ..
    ويضايقه سمعه ..
    يـ الحب .. يـ النساي ..
    ما لـ البكى .. جمعه ..
    حتى ولو دمعه ..
    واعدني السبت ..
    واتركني الجمعه .. !

    ردحذف
  101. تصبح على خير .. يـ عيونها ..
    أحلى عباره قبل أنام .. كانت تمر إذني معاها ..
    يـ الغياب ..
    علمني بس شـلون أنام .. الليلة ذي من دونها ؟! ..

    ردحذف
  102. أبشرك يـ أمي ..
    شريت هذا البيت ..
    شوفيه ..
    شوفي غرفتي ..
    باقي الزواج وذا عليك ..
    اختاري يـ أمي زوجتي ..
    وش زوجتي ..
    قم صل وأنا أمك ..
    يمه (خرب حلمي) .. !

    ردحذف
  103. لا تحسب إنه .. منبسط ..
    ترا الغني مهموم مثلك ..
    لا يـ شيخ ؟!
    لكن معه ..
    ما عاش مثل أهل الفقر ..
    حاجه وهم ..
    يا مال السعه .. !

    ردحذف
  104. رأيتك فـ المنام تعاتبين الوقت .. وشو له ؟!
    نسيتي من سبب غيبتك والا إنك نسيتيني ..

    أذكّر زعلتك ورضاك لما قلت .. محلوله ..
    وما صدق خبر قلبك على الطاري تركتيني .. !!

    ردحذف
  105. قريب أسامحك وأنساك لا تستعجلين الوقت ..
    أبتطمن على قلبي قبل مـ أترك في حالك .. !

    ردحذف
  106. ارحلي لي ..
    مع بدايات الشتاء ..
    يا غربة الصيف الـ قريب ..
    أبي الدفى .. وأبي حبيب ..
    لا تسألي الخاطر متى ؟
    بس ارحلي .. !

    ردحذف
  107. كتمت (أحبك) بالعيون .. وتركتك ..
    ترحل على (ربي يسهل دروبك) ..

    تعال شفني لا دمعت .. وضحكتك ..
    كني نهاية حزن بـ أطراف ثوبك .. !

    ردحذف
  108. مستحيل الفعل يسهل قوله ..
    (مع السلامه) بـ ارتحل يا عيني ..

    لا هي حقيقه لا ولا معقوله ..
    لكن بـ اجرب وش تسوي فيني .. !!

    ردحذف
  109. ودي أهاوشك .. لكن مزح يا عيني ..
    طفله تصيرين لا من هشتك وحلوه ..

    تجين بـ دموعك العذبه تراضيني ..
    عشان أسامح وأضمك يمي بقوه .. !

    ردحذف
  110. بـ شويش فيني تمكنتي وأنا غافل ..
    ضاعت حياتي ولا أدري وش الآتي ..

    الحب في نبض قلبي من زمن حافل ..
    بـ جروحهم لا تزيدي لي جراحاتي ..

    ردحذف
  111. متكبره ليه يعني وش بها زايد ؟! ..
    الا وش اللي بها ما زاد عن حله ..

    يا قلب قم حبها لو حبها كايد ..
    ما عدت أبي غيرها من بد خلق الله ..

    ردحذف
  112. حبيتها .. فـ الشديده قبل ما تضعف ..
    وكنت أظن المحبه .. دوم جواها ..

    خلت غرامي وخلتني ولا أعرف ..
    لـ اليوم وشو على فرقاي قواها ؟! ..

    ردحذف
  113. تأملي بـ الله عساها تساهيل ..
    قبل الحقيقه تسرق النور منا ..
    أصعب شعور أخافه الصبح والليل ..
    فرقى تهد حيولنا .. ما فطنا .. !!

    ردحذف
  114. يا مساها .. طاح من قلبي سلام ..
    دوره مدري وصلها أو رجع ..

    دونها قلبي معيي لا ينام ..
    طمنه مانيب طايق هالوجع .. !

    ردحذف
  115. ترمين باقي ذكرياتي وتقفين ..
    ما ودك تبقين لي شيء عندك ..

    شكراً .. وحبك رغم هـ اللي تسوين ..
    أقرب لقلبي من يمينك لـ زندك .. !

    ردحذف
  116. لا تحسبيني أبيك لـ شيء لا والله ..
    وجودك بجنبي أكبر من كذا واجد ..

    لك منزلـ(ن) بالصدرمحد(ن) يوصل له ..
    يخليني أذكرك بالدعوه وأنا ساجد .. !

    ردحذف
  117. ازعلي ورضاك مرهون بـ زعل ..
    حالنا ماهوب حال العاشقين ..

    حبك الطاهر نعم قول وفعل ..
    بس طاح فقلب ما يدري لمين ؟! ..

    ردحذف
  118. صاحي وحدي ..
    نايمه ؟! ..
    لك خافي ربك ..
    اصحي ..
    ردي ..
    لاعبيني مثل مـ فراشك لعبك ..
    والله ودي ..
    معك أبادل هـالـ (أحبك) .. !!!

    ردحذف
  119. شوي خلي بيني وبينك ..
    هذي المسافه الفاصله ..
    من دون وينك ..
    واصله ..
    هاتي يدينك ..
    ذي جسور الحب من عيني لعينك ..
    قربي ..
    إلين صدرك آصله ..
    يا زينك ..
    لا تخلي هالمسافه يا حياتي .. دايمه بيني وبينك .. !

    ردحذف
  120. لأني أحب .. هالتكشيره تململ ..
    وأنا على قد حبي لك وتفكيره ..

    الا بلا ضايق وشايل ومتحمل ..
    ماعاد بي حيل أفرط زود بالغيره .. !



    ردحذف
  121. معاك أبلعب (نبرة العين لـ العين) ..
    من غير صوت أبعترف لـ أعترفتي ..

    قلتي (أحبك) لا تقولي وبعدين ..
    اقتربي وقلبك يعرف ايش شفتي .. !

    ردحذف
  122. أبسفهل بـ رضا كانك تمنينه ..
    لأن قلبي بـ حبك عاقل وواعي ..

    لكن بـ شرط الزعل هذا تفضينه ..
    اللي بليا سبب .. ما أشوف له داعي ..

    ردحذف
  123. أزال المؤلف هذا التعليق.

    ردحذف
  124. موطن بلا سكان وش ينبغي به ؟! ..
    كئيب جداً .. لا خلا من صدى الصوت ..
    والقلب لو ما فيه أم وحبيبه ..
    عايش بليا نبض وأحسن له يموت .. !!

    ردحذف
  125. علاقتي فـ الصبح (تجبر خواطر) ..
    خيرَّ ونوره يكتمل مع نديمي ..

    يا للعذوبه لا غدى الجو ماطر ..
    مشمس وبارد .. ياه .. جوه حميمي .. !

    ردحذف
  126. ملحني الله .. قبل مـ تقول عني ..
    راعي تميلح يا بعد كل مملوح ..
    إن ساء ظنك ما اسأتك بـ ظني ..
    ازعل وروح والخطا منك مسموح .. !

    ردحذف
  127. أحاط بي حب ريمي .. لا تلوموني ..
    ترا المشاعر تعاند من يعاندها ..
    أشوفها وين ما صديت بـ عيوني ..
    صعبه من القلب والذكرى أجردها .. !

    ردحذف
  128. لو للمنازل خاطر وذمه ..
    كان يترفق بيتنا فيني ..
    ولا صرت انادي فيه يا يمه ..
    يرسمك بجداره ويلبيني ..

    ردحذف
  129. أربع سنين مورده ما قطفتك ..
    أسقيك من دمي على شان تروين ..

    هذا أنا ..
    وش من تبي .. ما عرفتك ..
    لا ماهقيت بهالسهوله تناسين .. !!

    ردحذف
  130. إحساسي المبهم تجاهك ولا شيء ..
    عند امتعاضك كل ما قلت .. زرني ..

    ضاقت بك الأشواق ؟!
    جرب لو شوي ..
    طعم التصدد بالهوى وافتكرني .. !

    ردحذف
  131. عجزت ألاقي لك مكان فـ حياتي ..
    مع إن فيك أشياء ما هي بغيرك ..
    ما هي بمشكلتك ترا يا غناتي ..
    المشكله في قلب عيا يصيرك .. !

    ردحذف
  132. دم قلبي .. ملحيه ..
    كان حالي في وجودك ..
    وش يكودك ؟! ..
    ملحيه ..
    الجروح الخاثره ..
    متناثره ..
    من رحلتي .. لين ليه ..
    وحشرجاتي علقتني ..
    لا هي اللي اذبحتني ..
    وريحتني ..
    ولا خذتني للحنان اللي أبيه ..

    دم قلبي .. ملحيه ..
    صبي من دمعك عليه ..
    كان حالي في وجودك ..
    وش يكودك ..
    ملحيه ..

    ردحذف
  133. قلبي ارتح ..
    علم الصبح الحقيقه ..
    وبحريقه هالسهر وعيون أغمضها وتفتح ..
    قلبي ارتح .. !!

    ردحذف
  134. كل ما صار فـ غيابك .. عادي ..
    دمعك .. برودي .. غصتك مشتاقه ..

    الا أني أشوفك مع البغدادي ..
    فـ أبو ظبي .. تصففين أوراقه ..

    من كنت أعدك فالشعر ميلادي ..
    وأستلهمك فـ أبياتي الخلاقه ..

    ما جاء بـ قلبي وإن خذاك بعادي ..
    ألقاك مع غيري جمل يا ناقه .. !

    ردحذف
  135. صباح الأثنين موحش كنه غيابك ..
    يا حر قلبي على ذكراه يا حره ..

    إلى متى راح أشوفك فيه وأشقى بك ؟! ..
    وأعيش (نفس الشعور) - (اللحظة المره) ؟! ..

    ردحذف
  136. قلبك بخير وعوافي فدوتك قلبي ..
    مكتوب هالضيق جعل الله يهونها ..

    من مولدك خابرينك مـ أنته بـ سلبي ..
    مؤمن وصابر وإذا شانت تزينها ..

    ماجور والعافيه بـتجيك من ربي ..
    وأمي بعد كم يوم أنت بـ تطمنها .. !

    ردحذف
  137. أصبَّر القلب .. فـ الأبيات والذكرى ..
    والورده الميته لحظة .. مفارقنا ..

    عدت سنين الصدف وأنا انتظر بكرا ..
    ومر بكرا .. وبعده ما تصادفنا .. !

    ردحذف
  138. من الأرشيف:

    تجآهلتك .. !
    لـ أنـك صآحبـة إحسآس ..
    .. تمـوتيـن بـ حروف الـشـعر .. !
    ..... وبـ حروفك تمـووت النآس ..
    تجآهلتك .. !
    لـ أني .. سـيـد ضـنـوني ..
    .. غمآم التـيـه شـكـكـني .. !
    ... ولـكن شـفـت بـ عيـوني ..
    تجآهلـتك ..!
    .. أنـا قـصدي .. تحـملـتك .. !
    .... بـعد مـآ فـآضـت حـروفك ..
    ...... نسـيـتي إني .. علـمـتك ؟
    تجآهلـتك .. !
    نسآك المـوت .. انسـيـني .. !
    .. تعـبـت اتجآهل .. سكآتك ..
    ... وأنـا مـآبي تحـآكيني ..
    تحـملـتك .. !
    تجآهلـتك .. !
    .. خطآي إني .. تخيـلتك .. !

    ردحذف
  139. يا محزن ليه بس العين تدمع ..
    وأنت عارف قلتها وقد قيل لك ..

    حب من ودك تحبه لكن اسمع ..
    ماهو غصب يحبك ويميل لك .. !

    ردحذف
  140. قلبي امتلى فقد ووجع ..
    ولا لقى نظره عطوفه .. تحتويه ..
    واللي رحل عن دنيتي ..
    ما عد رجع ..
    وأنا إلين اليوم ما غير أحتريه .. !

    ردحذف
  141. أسامحك في كل شيء الا القهر ..
    مستحيل أسامحك به يالحزينه ..

    عندي استعداد أصالي هـ السهر ..
    بس ما أرجع على نفس الغبينه ..

    ردحذف
  142. ما عدت أنا الأول بـ عين المهره ..
    بالشعر من راحت لهم عني به ..

    الله يا ذاك الزمن يا طهره ..
    لا قلت بيت وجتني تغني به ..

    بلحالها تملى شعوري شهره ..
    وأحس لي قيمه وقدر وهيبه ..

    وألحين ..
    روحي منها .. منقهره ..
    والكل شايل بالموادع عيبه ..

    مـ أرضى تجمعني بهم في سهره ..
    بعد التفرد .. أعتبرها خيبه ..

    قافي بـ يصفى لو تكدر نهره ..
    الله يساعدني على هـ الغيبه .. !

    ردحذف
  143. سامح الله ذكرياتك يـ الخميس ..
    كانها بـ الليل تلعب .. لعبها ..
    راكن أحلامي على الصبر النفيس ..
    يا عسى هذا الصبر ينفع بها .. !

    ردحذف
  144. يا شاربين الـ سوالف .. سولفوا عنها ..
    عطشان لـ علومها ما ودي أخمن ..

    لو بالغلط قولوا إن الخير حاضنها ..
    خلوني أغير منه لكن أتطمن .. !

    ردحذف
  145. مهما يطول التعب لا بد له آخر ..
    وإن زاد قرَّب أخيره لا تحاتيني ..

    في يوم أبرجع لنفس الكاتب الساخر ..
    اللي عشقتيه قبل أنتي .. تعرفيني .. !!

    ردحذف
  146. عيّشت قلبي في حنانك .. وفارقت ..
    الظلم ذا في أم عينه وربي ..
    يا ليتني فـ الضيق ما ذقتك ورقت ..
    ولا دفعت العمر لك فوق حبي .. !

    ردحذف
  147. استفردي بـ الليل ما للحيا درب ..
    الجو رآيق لا تقولين .. بكرا ..

    هاتيك في حضني أبَشَّربك .. شرب ..
    لـ الحب ..
    لـ الأيام ..
    لـ العمر سكرا .. !

    ردحذف
  148. باب الزعل عنك صكيته ..
    بس الشبابيك مخلوعه ..
    الحب جرحك هدم بيته ..
    والروح تبكيك موجوعه .. !

    ردحذف
  149. عن ما حصل آسف .. وسامح ..
    عطشان لمسامحك عطشان ..

    أطلق رضا حبك الجامح ..
    مابيك ترقد علي زعلان .. !

    ردحذف
  150. أصبحت وأصبح قلبي بخير يمه ..
    يا نور وجه الكون يا راحتي به ..

    ما غيرك بدنيا حبيبك مهمه ..
    ولاغيرك أنثى في ضلوعه حبيبه .. !

    ردحذف
  151. لا ما كرهتك .. كرهت اللي تسوينه ..
    بـ القلب لما بدا ينبضك فـ أبياتي ..

    ما هوب معقول تعطيني وتعطينه ..
    نفس الكلام، الشعور، الماضي الآتي ..

    يـ (حنين) الحرف هذا الشطر يا زينه ..
    وهو أساساً يعبر عن معاناتي ..

    كنت أحسب الشين بي حتى تحبينه ..
    أثرك تحبين (نفسك) في عباراتي ..

    لو ما عطيتك عمر راضي تخونينه ..
    لحقتك بـ صوت جرح يقول لك هاتي ..

    اما يموت الغلا .. والا تردينه ..
    سنينه الضايعه بـ ايديك حقاتي .. !

    ردحذف
  152. وأنا معاك أشتاق لك صدقيني ..
    جو الرياض يحرك القلب يمك ..
    أناظر غيوم السماء في يديني ..
    مجنون ؟!
    أفوت هالمساء ما أضمك .. !!!

    ردحذف
  153. ليل الرياض اليوم ما هو بـ ليله ..
    ضايق وباين لن ضيقه يجي غير ..

    يحفظك ربي يالرياض الجميلة ..
    من كل فتنه وانتفاضه وتقصير ..

    عساك ما تبكين حمل الثقيله ..
    وتمرك أيام الشدايد على خير .. !

    ردحذف
  154. سلامتك مبسوط جعلك ذخر له ..
    ما عزتك بضحكه ولانيب عايزك ..

    بالعافيه روحي مدام الفخر له ..
    إنك بقايا دمع بالضحك ميزك .. !

    ردحذف
  155. حروفه الأربع تراجف وتدعيك ..
    عيت تجي من شدة البرد يمك ..

    مدي لصبح الشوق راحه بيديك ..
    ضميه (أحبك) كان صبره يهمك .. !



    ردحذف
  156. علميني من تقول إنها بنتـ(ن) لـ أبوها ..
    من تقارن نفسها بك عساها لـ الثبات ..

    لو تشوف مرايتك شافت بعينك أخوها ..
    الأنوثه بس فيك والا هم أسماء بنات ..

    ردحذف
  157. من يدور وصل خله لا يبيعه ..
    بالتراب ولا يوفر له بديل ..
    ان رفض حبه يطيع وما يطيعه ..
    لـ أجل عينه يستلذ المستحيل .. !

    ردحذف
  158. يـ الأوله في عيوني من تجي عازتك ..
    والشوق في ليلتي يقفي ويقبل بك ..

    أتوسد أيامك الحلوه وغمازتك ..
    فـ الحلم ربي يصبرني على (قلبك) .. !

    ردحذف
  159. يا ليل خب اللي بقوله وفارق ..
    كم لي معك سهران والناس نيام ..

    لا شفتني من سبة الهم غارق ..
    جب لي ولها لا غفت عين الأحلام ..

    بـ أتخيل طيوف الحبيبه نمارق ..
    وأكفكف عيوني من الدمع وأنام .. !

    ردحذف
  160. أحبك بعنف لا عادت على قلبي ..
    وش جابني لـ الغرام اللي منب قده .. !

    ردحذف
  161. ما دنسوا سيرتي بالغيبه الغدرا ..
    وبحل زيدوا مسامح لله وبـ الله ..

    ماكول خير الحكي وانت بذا ادرى ..
    بـ أبقى مثل ما أنا وطيبي على حله .. !

    ردحذف
  162. يـ أحلى من الكل قولي خاطرك وش به ؟!
    ما أطيق أشوف العباير تنزل وترقا ..

    صدري ملاذ الجروح اللي توشوش به ..
    فضي سكوتك وهاتي غصة الفرقا .. !

    ردحذف
  163. أخاف من ضلعي الأيمن على الأيسر ..
    هذا يحبك وغيرة ذاك تذبحني ..

    يصير أضمك بـقوه لين مـ أتكسر ؟!
    قبل المشاعر تجاهك فيك تفضحني ..

    ردحذف
  164. أنتي علي من البنات هوايه ..
    ماهو بـ عادي زينك الا هو آيه ..
    حبك بقلبي من صباي هوايه ..
    معذور دامك ناسه ويا أهله ..
    ويا مرحبا بجروحك ويا أهله ..
    بكرا حنانك ياخذه ويـ أهله ..
    ويعوض بهواك نقص هوايه .. !

    ردحذف
  165. ماخذن عقلك الواتساب .. والدبره ؟
    مليت أداري سكوتك في شرايني ..
    قلبي من الشوق لعيونك نفذ صبره ..
    ماذي بحاله قسم بالله شوفيني ..

    ردحذف
  166. أغناك ربي يالكريم بـ طبعك ..
    والعذر لو قصرت معك بحاجه ..
    لا وهني اللي غدو من ربعك ..
    وسيع صدر وللمكان سراجه ..

    ردحذف
  167. كابري في وصالك وارقدي وآمني ..
    مكانتك بالصدر محدن يزحزحها ..

    حتى لو الصدق من كذبك دهر لامني ..
    معزتك مستحيل بيوم أجرحها .. !

    ردحذف
  168. نسيج الشوق بعدك خاط ريبه ..
    متى ألبس وصالك خاطري به ..
    فداك العمر كله خاطري به ..
    أنا محتاج اشوفك لو شويه .. !

    ردحذف
  169. تستبرد أطراف قلبي .. وأنت حر به ..
    احرقه ملكك حلالك .. وأنت حر به ..
    عيشه واياك والا .. انتحر به ..
    راضي بحبك .. وظلمك .. والأذيه .. !

    ردحذف
  170. تمر الأيام دونك وأستعيض بـ لاش ..
    مدهلك فارغ من الأنفاس ردي له .. !

    ردحذف
  171. خانوك لا تزعل عيونك وهي قصة ..
    تنعاد للطيب النيه ويرويها ..

    حتى (أحبك) تصير بداخله غصه ..
    كل ما تجي في حديث الحب يبكيها ..

    ردحذف
  172. ايا جمال المطر والريحة العذبة ..
    بلل طرف ثوبها الين تتذكر ..

    الماضي اللي من اللهفة تلذذ به ..
    حتى تغني أحبك موت يا سكر ..

    ردحذف
  173. أكتف النوم وأطلق خاطري فيها ..
    وأعيش جوي بلياها وهي تدري ..

    أحبها حاف لا يمكن تكفيها ..
    لازم معا هالـ أحبك يا "نفس صدري" ..

    ردحذف
  174. خاف ربك فالبنات ولا تخاف ..
    من شعورك لا تمادى فـ الغزل ..

    انجذاب الروح من سنة الجفاف ..
    راح لكن فيك أشوفه لا يزل ..

    يا أخوي الحب معنى للعفاف ..
    والتمرد دايم آخرته .. عزل ..

    اقضب اهواءك عن حروف الضعاف ..
    لجل تصبح كلمتك .. كلمة جزل ..

    ردحذف
  175. تركتي بعيني اليمنى سؤال الشوق ..
    أبغى إجابه تنسيني معاناتي ..

    أزريت أدورك بالمشكوك والموثوق ..
    ولا بعد جابتك فالغيره أبياتي .. !

    ردحذف
  176. صراحتي ما تنقص قيمتك بالعكس ..
    وإن ضايقت خاطرك بالدمع لا تغدق ..

    خذ قاعده عالمجامل صاحبي حط اكس ..
    عشان تبقى حايتك صافيه وأصدق ..

    ردحذف
  177. أشم أصابعك في يدي من البارح ..
    وأطالع الوقت .. ليته فيك ما عدى ..

    عن الجميع بخيالي فيك أنا سارح ..
    والحب جابك فعيني واجد وودى .. !

    ردحذف
  178. جعل ظنك بي يصيبك ..
    في أبوك وفي أخوك وفي نصيبك .. !

    ردحذف
  179. في هالمطر وخري عن عيني شكوكك ..
    ما ودي أدعي عليك بشيء يوجعني .. !

    ردحذف
  180. أوجدتها في قصيدي فاتنه وأكثر ..
    يا ليتها فـ الحقيقه تاصل حروفي ..

    تلملم شعوري اليا قام يتبعثر ..
    وتضمني كل ما بين علي خوفي .. !

    ردحذف
  181. صوت المطر في شبابيكي يذكرني ..
    بـ أيامي العذبه ورقصك .. وفرقانا .. !

    ردحذف
  182. عجزت عن ترك ذكرى طيبه لك .. روح ..
    يا جعل ربي علينا بـ العفو يستر ..

    عن ما بدر منك فالماضي ترا مسموح ..
    لا ترجع بكذبك المعتاد .. تتبختر .. !

    ردحذف
  183. اليوم ..
    لا يمكن أتخيله من دونك ..
    يا أطهر يدين ربتنا وضمتنا..

    الله يطول بعمرك جعل يفدونك ..
    عيالك .. أولهم آنا يا حبيبتنا .. !

    ردحذف
  184. يا للوقاحه في لسانك ..
    ما أرد ..
    احتراماً لي ترا ماهو عشانك .. !!

    ردحذف
  185. طُلب مني رد على قصيدة يقال إنها لـ خالد المريخي وحقيقة ما كنت أعرف إنها له ..
    القصيدة:
    العين صامت عن جميع المزايين
    والقلب عيا مايبي غير اهل نجد
    ماللأصيل الابنات الاصيلين
    الله يقطع عشقةٍمالها جد
    الطيب فيها كان سؤيته يبين
    ولاتصد إلاإذا شافته صد
    نشمية وظفرة ودايم على الدين
    وإليا وفت ماللوفا عندها حد
    إن صنتها تحطك بداخل العين
    وإن بعتها تبيعك وكنّه الورد


    ردي:
    الورد عمره ما يخون البساتين ..
    وان حال دون السيل يا سيدي سد ..

    ما دام الأرض مهيأه لازم تزين ..
    حتى ولو شانت من الضد للضد ..

    من نجد والا من غنادير برلين ..
    مكتوبتك بتصير وإن طول الغد ..

    زد فالتمني والدفا ما له يدين ..
    ولا بقلبي عقب مرسالها برد .. !

    ردحذف
  186. أمـطرت والجـو زان .. وهـو طـرى .. !
    والخـيـال يـذوب فيـه ولا حـكـيت ..
    أعشـقـه .. رغـم المسـافـه ومـا جرى ..
    وأشـهد إنـه هـو عطـاني ومـا خذيت ..
    لـيـن قـلـبـه .. مـن ورى هـمي سـرى ..
    وأنـا هـمـه يـوم دورنـي سـريـت ..

    ردحذف
  187. ريحت راسي من سواليف الأشواق ..
    وأقنعت روحي: بـ المسافات راحه ..

    مصيرنا مترين في متر وفراق ..
    بعيد عنا بس هذي الصراحه .. !

    ردحذف
  188. يومي بلياك ضايع لا تخلينه ..
    يستبشر الخير فيك الصبح ويمسي ..

    يا روح أبو ساره وقلبه ويا عينه ..
    الله يخليك أنا محتاج لك .. حسي .. !

    ردحذف
  189. يستخلص الفكر من تجاربي فاصل ..
    ياخذ بـ الأحلام ويودي ولا يرجع ..

    الا معاه التساؤل (قربها حاصل ؟) ..
    وتهز الأيام راسي بُعدها موجع .. !

    ردحذف
  190. آمالي معلقه في ربي العالم ..
    بـ ما يكن الصدر وأطلبه تتحقق ..
    في هـ السنه تستمر بفكري الحالم ..
    والقلب من يمها يعطف ويترقق .. !

    ردحذف
  191. كيف السنه تبدأ بلا ضمتك لي ؟ ..
    وأنتي لي التاريخ جعله بك يدوم ..

    ما أحتفل تقليد لـ عيون الأصلي ..
    يا مهجة سنيني ويا فرحة اليوم ..

    ردحذف
  192. سمي فداك الروقي ومن يعاذله ..
    يا فاتنه .. يا ساحره .. يا أميره ..

    قلبي قبل طلبْتك لرضاك باذله ..
    لا تسمعين آهل العقول الصغيره ..

    الحب وامني ولانيب خاذله ..
    ولا أبي فالروح وياك غيره .. !

    ردحذف
  193. سبعه .. وعدت فـ الشعر وجعانه ..
    هذي سنيني ربتك بجروحي ..

    لا ما عبرتي مثل أي إنسانه ..
    أنتي جروح استوطنت في روحي .. !

    ردحذف
  194. زمة شفايفها تجمد ملامح ..
    وأطراف منثور الظلام يتهجد ..

    مبطي وأنا زعلان لكن مسامح ..
    كله على شاني أحب أب عن جد .. !

    ردحذف
  195. أرق منها طيفها لا عبرني ..
    وأستسلم الخاطر بليا مـ أقاوم ..

    أسهر لها من غير لا تفتكرني ..
    تكفيني الذكرى قبل ما أداوم .. !

    ردحذف
  196. من سنين الطفوله وأنتي أنتي ..
    فارقه عن جميع الغيد .. لبى ..

    صرتي أنثى كبيره بس بنتي ..
    طفلتي والغلا لك .. ما يخبى .. !

    ردحذف
  197. يا حروفي حمليني ما أطيقه ..
    واخذي من رجفي وخوفي ..
    يا حروفي جمليني .. وبحريقه ..
    لو تغير لون دمعي وصار موفي .. !

    ردحذف
  198. سلام تنبيش المواجع سلامك ..
    طيب ولا تسأل بعد كيف حالك ..

    تجزاني بهجرك وتنشد علامك ؟! ..
    سلامتك .. لكن فقدت اتصالك .. !

    ردحذف

سيتم إدراج تعليقك بعد الموافقة عليه وشكراً،