الأحد، 7 أكتوبر، 2012

أحبك لحالك

قليلك ما يكفيني ..
هذي الحقيقه الجارحه ..
وأكبر مثال البارحه .. لما امتليت بدمع غيرك ..
ما قدرت أفك عيني ..
خفت أشوفك في شعوره .. وأنهزم .. وأصارحه ..
ضليت ساكت لين راح ..
وابتدت آلامي .. تصرخ .. آح .. آح .. 
يـا للوجع .. يـا للجراح ..
أثرني لـ ألحين أحب ؟! .. 
وما لقيت لقلبي طب ؟! ..
إلى متى .. هذا الهوس ؟! .. 
وإلّا متى بـ أرتاح ؟! ..
تكثر علي الأسئله ..
والمشكله .. 
من أول الليل .. أبحث .. أبحث .. وما ألاقي أجوبه ..
وأنتي .. 
يـ أنتي .. ما دريتي .. ما طرا لك مره ضعفي .. 
ولنتي بس مره وجيتي ..
جيتي .. بـ المعنى الحقيقي ..
مو لـ إلقاء السلام .. وقبل ما ابدأ الكلام .. درتي ظهرك لي وسريتي .. !
 اجلسي .. لا تحضنيني ..
قابليني .. خلي عينك صوب عيني واسمعيني:
تذكرين ٢٠٠٥ ؟! ..
كيف كنا .. لما نسهر مع بعض .. والليل يخلص مثل همسه .. 
والصباح .. الله يا ذيك الرسايل ..
والصور .. وطيور شعري .. والدخون .. وريحة أطراف الجدايل ..
والـ (أحبك) .. كم ترامت .. من على حضني لـ حضنك ..
تذكرين ؟! ..
لو ناسيه .. هالليله بس .. حاولي تتذكرين ..
عادي والله .. من طرف واحد أبرضى ..
مو رضيت انحب بعدك .. قبل ما أنتي تجين ..
وما رضيت أحب غيرك ..  كاتم فـ صدري الحنين ..
خوذي مني ما تبين ..
واتركي لي كلمتين .. فـ آخر اللحظات هذي .. واحفظيهم زين زين ..
رحتي عني فـ ليل حالك ..
ما سألت ..
قلتي انسى ..
ما زعلت ..
وغبتي وطول غيابك ..
وارتحلت .. بين أماكنا القديمه .. شايل فـ صمتي سؤالك ..
ليت قلت .. وليت قلت .. وليت قلت ..
إيه أنا ..
(أحبك لحالك) .. !!!!


 

 

هناك تعليقان (2):

  1. ي اااااه عليك مبدع

    ادمنت احساسك و بوحك من زماااان

    من 3 سنين اذكر كنت غايب ورجعت

    مبدع بكل حروفك والوانك

    MaHa

    ردحذف
  2. ي ااااااه ع ابداعك

    الله يحرسك من كل عين

    مبدع بحروفك والوانك

    تابعت ابداعك من 3 سنين اعتقد

    كنت غايب ورديت وكااانت بليالي شتاء مجنونه

    من وقتها ادمنت احساسك بوحك
    خلف الكواليس ع قولتهم

    عسى ربي يقويك ويسعدك
    MaHa

    ردحذف

سيتم إدراج تعليقك بعد الموافقة عليه وشكراً،