الأحد، 3 نوفمبر 2013

وآتذكر صوتك المليان سكر

من "زمانك" ..
أحاول أكتب أي شيء ..
شيء غيرك ..
شيء ما به طاري فراقك ولا حتى خيانك ..
والحقيقة ما قدرت ..
قتلني البرد بـ شعوري ..
لين صرت أخاف من طاري الشتاء ..
وأكره الحاجه لـ "حنانك" .. !

.....


أبكسر الخوف وأحكي لك عن الماضي ..
وإن ما وصل قلبك الإحساس يكفيني:

أعيش باقي العمر في غيبتك .. راضي ..
من غير لا أي ذكرى لك .. تبَكَّيني ..


.....


العمر له منتهى .. والحب له آخر ..
وأنتي معاك العمر والحب ما يقضي ..

حتى جروحك بصدري طعمها فاخر ..
أزعل وأجيك اتأسف لك وأقول ارضي ..


.....


ليت "ريح الذكريات" اللي عثت فيني "تهبك"..
ليتني ما كنت أعرفك ..
ليت قلبي .. ما يحبك ..



.....


وآتذكر ..
صبحي المفعم بروحك ..
صوتك المليان سكر .. !




السبت، 12 أكتوبر 2013

وين صوتك ؟

تفضلي ..
كانت بداية للحياة ..
جيتي ..
وأنا شاعر على قيد الوفاة ..

- ابسألك ..
حاضر أعلمك .. اسألي ..
- وشو الشعر ؟! ..
- ايه وبعد .. كيف أكتبه ..

راحت سنين ..
وبسبب هذا الكلام ..
أيامنا تبكي حنين ..

الشعر .. 
واو قبل الراء .. هذا أولاً ..
بعده .. وزن ..
مع قافيه ..
وحالة حزن ..

- ما به فرح ؟! ..
الا .. ولكنه جُرِح ..
- ليه الزمن ما طيبه ؟! ..
عفواً ..
بحور الشعر سبعه ..
وفيه حُر ..
أو ما يسمونه .. حداثه ..

- منين أبتدي ؟! ..
من حالتك ..
مثلاً:
أنا مبسوط ..
أكتب (سعادة القلب في مبسمك يا ساره .. يا جعلني ما أعدم هالبسمه الحلوه)
- مسحوب هذا ؟!
ايه ..
- طيب من هي ساره ؟! ..
عفواً .. عن اذنك ..
- لا تطول ..
يصير خير ..

- "معقول تترك عيوني ما تطمنها .. ياحي قلبي عليك موقفٍ نبضه" ..
لمين هذا .. !!
- لي أنا ..
صح قلبك ..
- منكسر ؟! ..
قلبك !! .. 
- بعيد الشر عني .. البيت أقصد ..
ما ينكسر دامه من شعورك (كُتب) ..
- مبسوط بيتي .. ياخي شكراً ..
حاضرين ..


راحت سنين ..
وبسبب هذا الكلام ..
أيامنا تبكي حنين ..

ما ألوم الشعر فينا ..
حنا ياللي مع بعضنا .. 
ما توقفنا وحكينا ..
في حدود الشعر طبعاً ..
بيت منك وبيت مني ..
لين غبتي .. وانتهينا .. !

من يقوله ..
مـ انتهينا ..
الفراق إن كان حل ..
باقيه لأيامي ظل ..
ما تفارقني بيوتك ..

كنت أرددها علي ..
أحيان .. فترات زعلي ..
وأحيان .. لا من صرت رايق ..
وأذكر إني كل ما رددت لك بيت أتضايق ..
وين صوتك ؟! ..
بحتك .. في يا حبيبي ..
نبرة اللهفه .. بـ أحبك ..
ابتسم .. حنيتك ..
والتفاصيل "الكثيره" ..

ياه .. يـ الدنيا الصغيره ..
هذا أنتي ؟! ..
وش ذكرك ..
وش رجعك ..
ما كان باقي شوي وأسلى ..
- هاه .. أروح .. 
لااااا .. معك أمزح خلاص اكتفيت من الجروح ..
- طيب اسمع ..
سمي قولي ..
- أنا قلبي يا حبيبي .. من ظروف الوقت يدمع ..
فضفضي لي ..
- ماهو وقته .. هذا رقمي .. اتصل بي بس تفضى ..

ومن فضيت ..
اتصلت ..
صوتها جاوب .. هلا ..
وما قدرت احكي .. وبكيت ..
وهي بكت ..
قوّيت نفسي ..
كيف حالك ؟! ..
ردت بصوت التعب .. مشتاقتن لك ..
وش بصوتك ..
- فاقدك ..

أخذنا نحكي .. 
ونتذكر ..
ونتذكر ..
ليييييين ما راحت سنين ..
وبسبب هذا الكلام ..
أيامنا تبكي حنين .. !

..
النهاية ..
أو صراحه ..
ما حصل شيء من هالحكاية ..
كنت أحلم فالزمن لو كان عاد ..
كيف بتكون .. النهاية .. من عقب ثاني بداية ..





الجمعة، 4 أكتوبر 2013

ثمان سنين .. يلعب بنا: الشوق والواقع وماضينا

دمر حياتي .. قبل دنياك يدمرها ..
لا تشتكين العلاقه والخطا فينا ..

راحت علينا ثمان سنين وآخرها ..
يلعب بنا: الشوق والواقع وماضينا ..

هذي النهاية قبل لـ أبداك خابرها ..
حتى قبل لا نبالغ في أمانينا ..

بس الهوى يملك الأرواح ويآمرها ..
والحب ما كان يوم بعصمة يدينا ..

حبيبتي .. والمشاعر بيّ ذاخرها ..
على أمل تلتقي صدفه خطاوينا ..

عواطفي لك هنا بالشعر أبنثرها ..
وبصوت الإحساس أبسرد لك حكاوينا ..

والغصه اللي من الضيقه بـ أمررها ..
بين السطور الحزينه عن تجافينا ..

دام استحاله ليالينا نكررها ..
مهما على دروبنا جينا .. وردينا ..

راحت علينا ثمان سنين .. وآخرها ..
يلعب بنا: الشوق والواقع وماضينا .. !

الجمعة، 30 أغسطس 2013

جميل الشوق

جميل الشوق ..
اذا جانا بحزن مرموق ..
جميل الشوق ..
وماضينا بعد أجمل .. 
وذكرانا الجميلة .. ذوووق ..
جميل الشوق ..

كذا لك دايم أشعاري ..
أبديها بـ جميل الشوق ..
كذا والقلب مو داري .. متى بتفوق ؟! ..

يا قطعة من ألم .. يا قلبها المخنوق ..
متى بتفوق ؟! ..

منتظرك ..
وإذا بترجع .. مسامح في خيانتها ..
خيانتها عسل .. 
ترجع ؟! ..

أبد راضي ..
تعال لحالك بـ حبي الـ رسمته في ملامحها .. تقل غيم وتركته فوق ..

ولا تنسى صباحات الوله .. 
والليل ..
ودموعي ..
وبدايات الشعر فيني .. 
وجميل الشوق .. !!


الجمعة، 2 أغسطس 2013

لا ملامه

لا ملامه .. يا حديث النفس هد ..
التعب ..
والآهـ ..
والفرحه .. 
مع الإنسان مخلوقين ..
مره دمع ومره ضحك ..
هي كذا الدنيا إلى يوم القيامه ..

لا ملامه .. 
وش بيديني وأجيبه ..
وكل شيءً بـ أمر ربي ..
راحتي ..
حزني ..
ثباتي فـ المصيبه ؟! ..

لا ملامه ..
الصغيره .. يا أنا صغرها أكثر ..
والكبيره بالصبر تُفرَج وتصغر ..
شوف غيرك .. واحمد الله ..
يا أنا هذا مصيرك ..

لا ملامه ..
قوني يا حرفي المكسور فيني ..
ارفع الإحساس فوق ..
ضايق وصدري مخنوق ..
والله أعلم .. في حنيني ..

لا ملامه .. 
ياحديث النفس هد ..
ويا أنا ..
لا تاخذ الصدمات جد ..
ما يعيش الا المطنش ..
والصبور ..
ومن تلحف في غرامه .. !!




الاثنين، 15 يوليو 2013

حزني يفطر

تصوم عين الغزل عن شوف غيرك ..
والبنات كثار .. والحلوات أكثر ..
بس مـ أقدر ..
لو على طول المدى بيني وبينك ..
مروا أعمى ..
ما أشوف الا غديرك ..
لـ أجلك أضمى ..
ولـ أجلك أصبر ..
والله يجمع مصيري يا غناتي في مصيرك ..
المسافه لا تطول ..
كم سنه راحت أبيك ..
كم ليله أحتريك ..
كم صباح يمر دون تجين فيه .. ولا أجيك ..
كم قصيده صفوها عقبك تكدر ..
كم .. وكيف .. وليه .. وأكثر في سواليفي تبيك ..
أصغر بـ أطراف وجهي .. ولا لمحتك في مراية كنتي بجنبي عليها .. قلبي يكبر ..
وأتذكر ..
وأتذكر ..
زهره من عمري روت ..
لين كبرت ..
والله كتب مني تروح إلى القدر ..
وأبقى أنا .. مع بوحي المملي عنا .. لا من طرت ..
لا من طرت .. دمعي بريقي يختلط .. حزني يفطر ..
ما يفطر شوف انثى .. غيرها ..
حزني يفطر .. !

الخميس، 27 يونيو 2013

سر المحبة


أفشيت لك سر المحبه على أيش ؟!
ماهو عشاني فيك مالي عيوني ..

حتى تركت الحلم في قلبك يعيش ..
فدوة غرام اللي ذكرت ونسوني ..

هذي جزاتي صار لمواصلك ريش ؟
من عقب ما نبرات صوتك سبوني ..

آسف لقلبي لو بدا من تطنيش ..
خوذي أحبك لم غيري وخوني ..

لحظه ..
وصورك \ ذكرياتك مع الطيش ..
وحب الشعر روحي بهم واتركوني ..

أنا يمر الوقت وأنساك بشويش ..
لو كان همك بـ أقدر أعيش دوني ..

آخر جروحك ما تبي منك تنبيش ..
تكفي الليالي عنك لا جَرَّحوني ..

خطاي وأتحمل ولا تسألي ليش ..
أو كيف أبقدر عنك أموت شجوني ..

أترك معي سر المحبه على أيش ؟
الا أبقوله وأطيح عيوني .. !

الجمعة، 3 مايو 2013

ميلادي اليوم يا ذكراي .. عيب

ميلادي اليوم .. يا ذكراي ..
شكراً لذاكره والنساي ..
آسف على ما مضى .. روحي ..
اللي تبينه "مـ عاد هوب جاي" .. !

.......

عيب ..
لا يجي فـ بالك لـ وهله ..
إني أنساك وأغيب ..
أنا .. آنتي ..
أنتي بنتي ..
كيف ما أذكرك .. عيب ..
رغم قلبي .. وما أصابا ..
من حبيبك ..
 أنت بابا ..
لو نسى الصوت الحناجر ..
ما نسيت الرد عيني ..
لو يكون الطهر فاجر ..
ما تركتك في حنيني ..
عيب ..
إيه أحب إني أحبك ..
لو بدا بالوجه شيب ..
دايمه بـ عيون روحي .. 
في جروحي .. 
لو رحلتي بعيد عني .. 
ما ني قادر عنك أغيب .. !

...


ما لك بقلبي بلاها شيء ..
لو كان لي في قدومك ضي ..
مولود أنا لحظة لقاها ..
لحظة بـ قلبي شعرته حي .. !



السبت، 20 أبريل 2013

عديني إنسان مو عادي .. واستكثريني على ضدك



يا زهرة القلب .. يا كادي ..
بستان عمري على يدك ..

أسقيه دام الهوى غادي ..
والحب ما هو على قدك ..

كود أشعر بعشقي البادي ..
الأظلم لقلب ما وَدك ..

عواطفي شوقها حادي ..
للروح من قبل لا أعدك ..

عديني إنسان مو عادي ..
واستكثريني على ضدك ..

واقتطفي العشق وأولادي ..
ما دام دمعي على خدك ..

يا زهرة العمر يا كادي ..
بستان قلبي على يدك .. !

أسهر ولو كان ما ودي .. بفراقه أسهر على شانه


مكسور صوتي .. وأنادي لك ..
يا راحة الآهـ .. مفتقدك ..

هو به طريقـ(ن) يودي لك ؟! ..
وألقاك في .. آخره وحدك ؟! ..

......................

يتجدد الفقد .. وأعدي ..
والعين بالدمع غرقانه ..

أسهر ولو كان ما ودي ..
بفراقه أسهر على شانه ..

الحب لو كان في يدي ..
ما كانت الروح تعبانه ..

ولا باح فـ موادعه سدي ..
والصدر ما فاضت أحزانه ..

وارتاح من دمعتي خدي ..
والنوم غطتني أجفانه .. !

..................

أشتعل لك .. وأنطفي .. ليله وليله ..
ما تحسين بحرارة فقدك .. الا ..

لو سمعتي آخر أبياتي .. بشيله ..
تثبت إني في غيابك .. ما أتسلى .. !



الأحد، 24 مارس 2013

يا فلانه .. رغم أنفي والخيانة فيك مغرم .. !

محتاج أنادي ..
كثر ما أكره عنادي ..
يا .... فلانه ..
رغم أنفي .. والخيانه فيك مغرم ..
فيك أحس الكون هادي .. !

ماني فاقد .. قد ما ناري تواقد ..
رمدتني الدنيا دونك ..
"ليه خلتني عيونك" ؟! ..
تذكرين الشطر هذا .. !!
كنت لك في وقتها ..
وألحين شوفي .. قالوا عاقد .. !!
ايش قالوا ؟
قالوا عاقد .. 

يا ضجيج الكون هد ..
شوشرتني الذكريات ..
ومن يقول الماضي مات ؟! ..
هذا أنا لـ ألحين أعد:
١- أحلام الطفوله .. عام تسعين الجريح ..
٢- بكلتها ورشة عطرها ..
باقي بعد .. متبعثرات ..
الطيش .. نظرات العيون ..
ولعبها .. بين البنات ..
وصوتي العالي .. فلاااااااانه ..
.. أمي قالت لي أنادي ..
إيه أنادي لك .. تعالي ..
وهي تغلى .. بس تجي ..
ما هوب مثل ألحين .. 
أنادي ..

يا .... فلانه ..
رغم أنفي .. والخيانه فيك مغرم ..
بس عيت لا تجي .. !

السبت، 16 مارس 2013

تخفيضات تدرين بالميه

السلام عليكم ورحمة الله وبركاته،

باقي 15 كيلو على بيلاروسيا .. صادنا ساهرهم على سرعة 80 لكن فدا ..
قبل ما ندخل الديره وقفنا نصلي ونطير الشراب وسرينا ..
وصلنا ندور شقه أربع غرف وثلاث حمامات تكرمون بكل غرفه حمام إلين لقينا نفس اللي نبي بالضبط .. شقه غرفتين وصاله وحمام مشترك ..
المهم ..

وش بعد .. شافك .. !


ودي أصدق بعض ما جاني بقافك ..
على سبيل الخيانة والشعر متي ..

من عقب الأثنين والتجريح واجحافك ..
زايد عذابي ولا قصرتي وزدتي ..

أغار للحين لكن وش بعد ؟ .. شافك ..
بحروفه أو من عيوني له تحتتي ..

بنتي ولو كنت مقفي عنك وآخافك ..
زرعت فيك الحياة إلين وردتي ..

قطفك وأنا تركت الشوك بـ لحافك ..
غطيني اليا تعبت أنده لك وبتي ..

يستاهل الجرح من حبك ولا عافك ..
على كثر ما لغيره بالسعد جدتي ..

مانيب محتاج دون الحزن لـ إنصافك ..
الله يستر عليك أبعجن ولتي ..

مد القصيد بشعوري مرك وطافك ..
ماهوب ذنب البحر لو كان ماخذتي ..

ماني مصدق بعض ماجاني بقافك ..
على سبيل الخيانة والشعر متي .. !


الخميس، 7 مارس 2013

ملاذ أبوك

يا ضياعه ..
شاعرك أول عشانك .. يخطف من الوقت ساعه ..
معك يسولف عن دوامه .. والضجيج فـ اجتماعه ..
لك يفضفض اهتمامه .. في هدوء وارتياعه ..
يا غرامه ..
كيف حاله ؟! .. اسألي باقي حطامه ..
واسمعي صوت الظهيره .. تاه عقبك ..
وين حبك ؟!
كنتي يومه ..
كنتي الصبح فكلامه ..
وليل إذا أرهق ينامه ..
يا بقاه ..
لا ملت صدره همومه ..
يا شقاه ..
يا ملاذ الذكريات الخالده ..
توقي لقاه ..
دامه أسماك بحياته (يا ضياعه يا غرامه يا بقاه) .. !


الجمعة، 22 فبراير 2013

عشان غيري بنبضة قلب يقطفها

البوح لو كان ينفع ما ترجيته ..
كتبت لين امتلى دفتر مواقفها ..

صدفة شعر ليتها ماجات في بيته ..
ولا الدموع لشعور الـ فقد تذرفها ..

يا ليتني مت ولا ذا الحب لبيته ..
حياتي القادمة عيناي تعرفها ..

ما نبَّت اليآس في صدري وسقيته ..
عشان غيري بنبضة قلب يقطفها ..

مليتني حزن خاطرها .. وكفيته ..
وفّيت حتى غدى ليلي يوالفها ..

أسهر على كوب سم جراح مليته ..
يمزق عروق .. روحي لين تنزفها ..

سيلي مع الوجد عنك الشوق صديته ..
قربت أخلصك .. حتى صرت مسرفها ..

قصايدي فيك منك تروح .. ناخيته ..
يا عقلي الباطن استودع مشارفها ..

البوح لو كان ينفع ما ترجيته ..
كتبت لين امتلى دفتر مواقفها .. !

الجمعة، 1 فبراير 2013

صوره

وأقرا بعض صمتك ..
فـ أبيات مكسوره ..
وعيون تاخذني ..
جوَّات هالصوره ..

الباقي فـ عمري ..
 قصة حروف أربع ..
يا بنتي أ ح ب ك ..
وأحب هالصوره ..

نمارس التطنيش ..
عشان ايش ؟ .. نعيش ..
والصدق ميت بك .. 
وأحيا بهالصوره ..

غيرك ولو حبوا ..
ما والله انحبوا ..
انتي بقلبي عشق ..
وبعيني الصوره ..

بحة صدى صوتك ..
فـ أذاني تغني ..
"أحبك .. أحبك .. أحبك" ..
وتبروز الصوره ..

وأقرا بعض صمتك ..
فـ أبيات مكسوره ..
وعيون تاخذني ..
جوَّات هالصوره ..

نعمة القرب

ما صرت أحس بـ نعمة القرب يا ليل ..
الا بعد ما ذقت فرقا هواها ..

فقدتها والصدق مشتاق بالحيل ..
الفارقه عن كل بنت بحلاها ..

من جد أحس همومي تحط وتشيل ..
أبغى لقاها وين أحصل لقاها ؟! ..

حاولت أعوض نورها بالقناديل ..
ما جو بعيني ربع طلة ضياها ..

خذت حياتي واهتمامي بها سيل ..
جارف لكل معرض(ن) في حماها ..

ليت الظروف الحايله بيننا تحيل ..
وتعوَّد البسمه لوجهي معاها .. !




الثلاثاء، 29 يناير 2013

الشوق ماهو بـ إحتياج

اعترافك ما وصل ..
لكن حصل مبطي فـ قلبي ..
وفتت شعوري وصل ..

ما بـ أتصل ..
عيدي علي الإتصال ..
إلين أرد وقبل أحبك ينفصل ..

بالك طويل ؟!
أنا معك لـ الليل .. عيدي ..
وش يكون المستحيل ..
حاولي .. حتى أحبك لي .. تصل ..

عندك كرامه ..
يـ أنا .. يعني اللي عندك هو أنا ؟! ..
غصة كلامه ..
ابتسامه ..
شوقه المملي عنا ..
بقلبي غرامه ..

والدُرف ..
تذكر سوالفنا .. الطُرف ..
جت تعترف ..
مشتاقه لك ..
رغم الجُرف ..
وأيام مليانه عجاج ..
أبعترف لك واسألك ..
صح الدموع الـ "تنذرف" ذي شوق ماهي بـ إحتياج ؟! ..

أحتاج أحسك من قريب ..
إني أبو ..
إني أخو ..
اعترفي أكثر لو حصل ..
أحتاج أحس إني حبيب .. !

ما عاد باقي بي عزم ..
لا عاد .. مدري .. جربي ..
واتصلي يمكن أنهزم ..
ما دمت رافقت السهر ..
والجرح ابن عمي لزم .. !

السبت، 26 يناير 2013

دليات

امتداد لـ الشعور ..

الجمعة، 25 يناير 2013

تغير اسم الأنوثه لبنت نجديه

على (غزل):

تغار منها وتسألها منين أنتي ؟!
وتجاوب عيونها ملاك نجديه ..

كذا انولدتي جميله أو تجملتي ..
لا والله إني كذا يا بنت عاديه ..

من خلقتي والحلا بي قبل ما كنتي ..
كبرت وأنا صغيرة شاعر الهيه ..

يقول: تبطين زيني لو تزينتي ..
يالـ غايره توصلين لحد رجليه ..

خليك عني بعيده .. لو تكرمتي ..
وشلون الإنسيه تقارن بحوريه ؟!

وآخر كلامه يقول إن كان ما شنتي ..
قدامها راجعي دكتور نفسيه ..

حتى تشوفين نفسك بي تجننتي ..
وتصدقين إني إنسانه طبيعيه ..

وإنه إذا قال: أحبك موت يا بنتي ..
تغير اسم (الأنوثه) لـ (بنت نجديه) .. !

الأحد، 20 يناير 2013

ما عاد أقوى .. !

سطر حرك بقلبي نبض قايلته ..
شعور ظروف قاتلته ..
أويلي يـ العطش بـ أروى ..
مـ عاد أقوى ..
قبل يومين كنت أضحك وأنا أبكي ..
معاي وجيه تسألني .. وش اللي مشغل عيونك ؟!
وأقول الحب متبسم .. يحسبوني أمازحهم .. وجد أحكي ..
هناك .. أقصد هنا حنا تلاقينا بـ أول غيم ..
مـ عاد أقوى ..
أويلي يالعطش بـ أروى ..
من العذبه مطر بـ أروى ..
مشينا أو مشوا لكن .. أنا وأنتي تذكرنا .. 
وتلاقيني بسطر حرك بقلبي نبض قايلته ..
تعالي يـ الظروف الصم ..
ابتجاذب معاك الهم ..
صافيني ..
وش مسببك ما بـ اسأل ..
لأني بـ القدر مؤمن ..
ولكن وردتي تذبل ؟
هنا أزعل ..
قولي من ؟!
من اللي ذبل الورده .. وأنا الساقي بـ دمع ودم ..
بـ شعور(ن) لها منثور بـ أوراقي .. ولن يلتم ..
الا لين ترجع هي .. مثل ما هي على شفاهي ..
ابتسامة (ضم) لا تخجل من الباقي ..
ومـ عاد أقوى ..
إذا هـ اللي كتبته فوق ما حرك بها نبضي .. ولا يسوى ..
كتبت الشعر .. لا لا لا ..
كتبتني فـ الشعر .. شاعر ..
وإذا ما هي قرتني به ..
فعلى هالشعر أنا عاله ..
من الأوهام تاخذني .. وتعطيني من الإلهام ما يكفي وينقذني ..
حبيبة غامض الفكره ..
أحبك .. ليه ما أكره ؟!
بعد ذيك الليالي البيض ..
بـ عز البرد عز القيض ..
إلين ألحين نستطعم .. بها سكره .. وإلى بكره ..
مـ عاد أقوى ..
أويلي يـ العطش بـ أروى ..
من الأبيات .. والذكرى ..
من الأبيات .. والذكرى ..
من الأبيات .. والذكرى .. !

الثلاثاء، 8 يناير 2013

لا تزوج وأنت في قلبك حبيبه ..

لا تزوج وأنت في قلبك حبيبه ..
واستر اللي باقي(ن) فيك يتحرك ..

ويش ذنب الساتره في ذا المصيبه ..
تاخذك جسم وتحاول ما تضرك ..

والفؤاد بـ غيرها قايد لهيبه ..
نار حبك خلها لـ وحدك .. تحرك ..

ما جتك من بيت أبوها دون شيبه ..
كامله فـ البر وتدور .. تبرك ..

مستعزه في غنى الله قبل جيبه ..
جات لك رجال ما جت لك تطرك ..

دام ما تقدر تخليها حبيبه ..
خلها .. ربي يعوضك ويسرك .. !

الأحد، 6 يناير 2013

وش يزود الحب وأنتي تنقصين ؟!

ماشيه عكس اتجاهي .. لا تجين ..
الله يسهل خُطاك الحايده ..

ابعدي فالحلم عن وجد الحنين ..
الرجاوي من متى بك بايده ..

غير أحاسيسي وروحي والسنين ..
وش بقى ما جاك مني .. زايده ..

المحبه ما تبي واحد حزين ..
الـ أحبك دون بسمه كايده ..

إيه لك فالقلب قلبـ(ن) مستكين ..
إيه وأنتي في عيوني نايده ..

اذكري وجهك متى ما تضحكين ..
كيف كنت أضحك معه وأعايده ..

واذكريني لا نويتي تدمعين ..
من غرامك نار عيني قايده ..

احرقتني لين رمدني الأنين ..
والزعل لا هب عنك ذايده ..

وش يزود الحب وأنتي تنقصين ؟! ..

ليه أوقف دام ما بك فايده ؟! ..

ماشيه عكس اتجاهي .. لا تجين ..
الله يسهل خُطاك الحايده ..


الثلاثاء، 1 يناير 2013

عطشان ترويني .. بردان شوق وحب

جميل هذا المساء ..
وأنتي به الأجمل ..
يا جامعه زين النساء ..
سنتي معك تكمل ..

أحبـ .. 
لا والله ..
أكثر بـ قلبي لك ..
أحبك ويفداك كل العمر كله ..

ما أداني الساعه ..
لا مرت بـدونك ..
وعيوني طماعه ..
لا جات بـ عيونك ..

مفتون بـ النظره ..
والبسمه العذبه ..
واللي به السكره ..
وريقي تلذذ به ..

يا حضنها دفيني ..
بردان شوق وحب ..
عطشان ترويني ..
أكثر وصال وقرب .. !