الأحد، 6 يناير 2013

وش يزود الحب وأنتي تنقصين ؟!

ماشيه عكس اتجاهي .. لا تجين ..
الله يسهل خُطاك الحايده ..

ابعدي فالحلم عن وجد الحنين ..
الرجاوي من متى بك بايده ..

غير أحاسيسي وروحي والسنين ..
وش بقى ما جاك مني .. زايده ..

المحبه ما تبي واحد حزين ..
الـ أحبك دون بسمه كايده ..

إيه لك فالقلب قلبـ(ن) مستكين ..
إيه وأنتي في عيوني نايده ..

اذكري وجهك متى ما تضحكين ..
كيف كنت أضحك معه وأعايده ..

واذكريني لا نويتي تدمعين ..
من غرامك نار عيني قايده ..

احرقتني لين رمدني الأنين ..
والزعل لا هب عنك ذايده ..

وش يزود الحب وأنتي تنقصين ؟! ..

ليه أوقف دام ما بك فايده ؟! ..

ماشيه عكس اتجاهي .. لا تجين ..
الله يسهل خُطاك الحايده ..


ليست هناك تعليقات:

إرسال تعليق

سيتم إدراج تعليقك بعد الموافقة عليه وشكراً،