الجمعة، 22 فبراير، 2013

عشان غيري بنبضة قلب يقطفها

البوح لو كان ينفع ما ترجيته ..
كتبت لين امتلى دفتر مواقفها ..

صدفة شعر ليتها ماجات في بيته ..
ولا الدموع لشعور الـ فقد تذرفها ..

يا ليتني مت ولا ذا الحب لبيته ..
حياتي القادمة عيناي تعرفها ..

ما نبَّت اليآس في صدري وسقيته ..
عشان غيري بنبضة قلب يقطفها ..

مليتني حزن خاطرها .. وكفيته ..
وفّيت حتى غدى ليلي يوالفها ..

أسهر على كوب سم جراح مليته ..
يمزق عروق .. روحي لين تنزفها ..

سيلي مع الوجد عنك الشوق صديته ..
قربت أخلصك .. حتى صرت مسرفها ..

قصايدي فيك منك تروح .. ناخيته ..
يا عقلي الباطن استودع مشارفها ..

البوح لو كان ينفع ما ترجيته ..
كتبت لين امتلى دفتر مواقفها .. !

الجمعة، 1 فبراير، 2013

صوره

وأقرا بعض صمتك ..
فـ أبيات مكسوره ..
وعيون تاخذني ..
جوَّات هالصوره ..

الباقي فـ عمري ..
 قصة حروف أربع ..
يا بنتي أ ح ب ك ..
وأحب هالصوره ..

نمارس التطنيش ..
عشان ايش ؟ .. نعيش ..
والصدق ميت بك .. 
وأحيا بهالصوره ..

غيرك ولو حبوا ..
ما والله انحبوا ..
انتي بقلبي عشق ..
وبعيني الصوره ..

بحة صدى صوتك ..
فـ أذاني تغني ..
"أحبك .. أحبك .. أحبك" ..
وتبروز الصوره ..

وأقرا بعض صمتك ..
فـ أبيات مكسوره ..
وعيون تاخذني ..
جوَّات هالصوره ..

نعمة القرب

ما صرت أحس بـ نعمة القرب يا ليل ..
الا بعد ما ذقت فرقا هواها ..

فقدتها والصدق مشتاق بالحيل ..
الفارقه عن كل بنت بحلاها ..

من جد أحس همومي تحط وتشيل ..
أبغى لقاها وين أحصل لقاها ؟! ..

حاولت أعوض نورها بالقناديل ..
ما جو بعيني ربع طلة ضياها ..

خذت حياتي واهتمامي بها سيل ..
جارف لكل معرض(ن) في حماها ..

ليت الظروف الحايله بيننا تحيل ..
وتعوَّد البسمه لوجهي معاها .. !