السبت، 16 مارس، 2013

تخفيضات تدرين بالميه

السلام عليكم ورحمة الله وبركاته،

باقي 15 كيلو على بيلاروسيا .. صادنا ساهرهم على سرعة 80 لكن فدا ..
قبل ما ندخل الديره وقفنا نصلي ونطير الشراب وسرينا ..
وصلنا ندور شقه أربع غرف وثلاث حمامات تكرمون بكل غرفه حمام إلين لقينا نفس اللي نبي بالضبط .. شقه غرفتين وصاله وحمام مشترك ..
المهم ..


يوم نزلنا الأغراض وجلسنا نقسم الغرف ومن بينام بالمطبخ ومن بينجطل بالصالة ..
لقينا العدد ناقص ..
مهوب الغرف ..
الأوادم ..
وين ساريه ..
يا ساريه خبريني ..
دوروا ساريه ..
آخر شيء ..
طلعت أنا واياي ندورها .. لقيناها شاقصه بالمكان اللي وقفنا به ..
زبعناها وسرينا ..
أنا واياي وساريه واياها ..
ضيعت الشقه : ( !!!!
وخلصت المقدمة ..

النقاط على (الـ خ ـروف):
* خبر: بيلاروسيا توقف تصدير الحسناوات.
- تعليق: دول الخليج (تتصدر تصدير) الخرفان.

جدتي حصه وأعوذ بالله من عيون الشياطين.
- يمه ..
* وش تبي ..
- مبروك الدراعه الجديدة ..
* أعوذ بالله من عيون الشياطين ..
- أفا يعني أنا شيطان ؟! ..
* لا بس تفطن أهل الأرض ..

الله أكبر يا فكتوريا سكريت .. تراها من خياط (ماما فهد) ولا بعد ناظريها من عند الكتف مشقوقه ..

الا على طاري (لا تفطن) ..
أوجس بـ ألم هنا يجيني إذا .... بلا بلا بلا ..
صدق وأنا أمك ؟! ..
إي والله ..
طيب دوك .. هذا عسل وذا زيت زيتون .. مقري فيهن .. تدهن وعلى الريق خذ لك ملعقه ..
ماشي ..

بعد ثلاث أيام جاني تلبك معوي ..
ولفت نظر من الوالدة ..
وأصابعي يبغى لها مشرط عشان أفككهم عن بعض .. !!

طبيعي يا أبو ساره ..
أجل تتدهن بالعسل وتملعق الزيت .. خبل أنت ؟! ..

ما علينا منه هالفاهي ..
السعودية حقتنا لها فتره صايره كأنها بطولة خروج مغلوب ..
التاء اليمين Vs التاء اليسار
والباقين .. لعبوني والا بـ أخرب ..

مـ أنت فاهم .. يـ (أغبى) من مر بـ بجنون ..
سيدك سلم أمره .. لـ (الخلود) ..
شاف فيك الصمت يـ القلب الحنون ..
شيء طبيعي لو يجازيك بصدود ..
وخلصنا المدخل ..

(القصة)
في ذات يوم من الأيام، كان النسوة نايمات ولا تكاد تسمع سوى شخيرهن رنة رسالة إحدى جوالات وحدتن منهن وفزت كما لو أنها فزت من الفزه ..
قرأت الرسالة وإذا بها تحتوي على (خصم 50٪) .. تلقائياً قامت بـ إعادة إرسالها إلى باقي النسوة النايمات وفزن هن أيضاً كما لو أنهن فزن .. بلا سماجه يا أبو ساره ..
المهم فلانه وينك ..
وش فيه ..
ما دريتي .. فيه خصم ياخذ العقل ..
لا ياشيخه ..
يالله يالله مريني خل نلحق قبل لا تروح الأشياء الحلوه ..
ومسيكين يا سنواردي ..
مر خاله وضحى .. بعدين روح حق بيت نوف اختي .. آخر شيء جيب ماما بعدين تعال حق أنا .. عشان ودي كلو سوق ..
سنواردي بدأ مهمته الشاقه ..
وصل عند بيت خاله وضحى ..
يطنب ..
يطق ..
طلع له ولدها .. سنواردي ودي شارع عمي أبغى شيل شاورما ويرجع .. ماما شوي يصير جاهز ..
وداه ورجع ..
لقى أخت الولد البثر تنتظر .. ركبت معليش سوناردي ودي بيت صديقه حق أنا هنا قريب يبغى شيل ملزمه ..
وداها ورجع ..
طلع أبوهم .. يقول هاه سوناردي كيف الحال كويس إن شاء الله .. يعطيك العافيه ..
يامال العافيه حقيقي ما قصرت .. لكن لا هنت يالطيب ما ودك تجرب لو مره قبل ما تروح لسهرتك تجيب عشاء لعييلك وتودي بنيتك تقضي لازمها بعدين تروح لسهرتك ؟! ..
ما علينا .. طلعت وركبت خاله وضحى ..

وراح لم اختي نوف ..
اخذ له عشر دقايق عند الباب .. وكل شوي طالع البزر .. دقييقه بس دقيقه ..

ركبت نوف .. وراحوا لم ماما ..
أول ما ركبت نوف اتصلوا على ماما يقولون اطلعي حنا عند الباب ..
بين بيت نوف وبيت ماما أربعين كيلو وحادثين وزحمة شارع المطاعم ..
وصلوا أبشركم وانتظروا بس نص ساعه على ما طلعت وطقمت معهم ..

ارجع ألحين لم عمتك يا سوناردي ..
طبعاً ما طولت بسرعه طلعت وأول ما ركبت .. سوناردي أنت ليش تأخير والله كلم بابا يسوي خصم من راتب .. أنا ساعه انتظار هذا كلام مافي مضبوط ..

حقيقي ما في مضبوط ..

مات حيلي وأنا أكتب .. وش عاد هو .. وآخر شيء سوي خصم مافي مضبوط ..
انقهرت .. مانيب مكمل ..

أبروح لـ دلوعة زوجها ..
اللي لما قرت فالواتس عن الخصم وإنهم بيروحون اتصلت عليه وها حبيبي .. تكفى الله يخليك تعال بسرررعه أبيك ضروري ..
وهو ضعيف الله .. وش فيه .. تعبانه .. فيك شيء ..
لا لا .. بس تكككفى الله يخليييك .. بسرررعه لازم تجي ..
ويجي الحبيب طاير .. وش فيك .. سمي عسى ما شر ؟
لا بس ضروري لازم أروح السوق فيه ماركه مسوي خصومات مررره تهبل واليوم آخر يوم لو ما لحقت بتروح علي وأنت عارف الاسبوع الجاي عندي .... والجامعه لبسي ... وخواتي شروا .... وأمي دايم تقول ....
خلاص خلاص .. اركبي ..
ومشوا لين وصلوا للسوق والزحمه والقرف .. وآخر شيء ..
دخلت وطلعت بـ شباصه ..

آآآآآآآع فكوني عليهم ..
زعلت مانب مكمل للمره الثانيه ..

كملوا انتم ..
سلام

هناك 4 تعليقات:

  1. هههههه زعلت ماني مكمل ...الله يسعد ابو سارة ..

    ردحذف
  2. حسيت ان المدونة حيت .. ويسعد غير معروف والجميع

    ردحذف
  3. آآآخ كلش ولا زعلك ابو ساره .. فكني عليهم انا

    ردحذف
  4. جد تراي وقفت الكتابة بدون تخطيط مسبق ..
    هههههههه عليك بهم

    ردحذف

سيتم إدراج تعليقك بعد الموافقة عليه وشكراً،