السبت، 12 أكتوبر، 2013

وين صوتك ؟

تفضلي ..
كانت بداية للحياة ..
جيتي ..
وأنا شاعر على قيد الوفاة ..

- ابسألك ..
حاضر أعلمك .. اسألي ..
- وشو الشعر ؟! ..
- ايه وبعد .. كيف أكتبه ..

راحت سنين ..
وبسبب هذا الكلام ..
أيامنا تبكي حنين ..

الشعر .. 
واو قبل الراء .. هذا أولاً ..
بعده .. وزن ..
مع قافيه ..
وحالة حزن ..

- ما به فرح ؟! ..
الا .. ولكنه جُرِح ..
- ليه الزمن ما طيبه ؟! ..
عفواً ..
بحور الشعر سبعه ..
وفيه حُر ..
أو ما يسمونه .. حداثه ..

- منين أبتدي ؟! ..
من حالتك ..
مثلاً:
أنا مبسوط ..
أكتب (سعادة القلب في مبسمك يا ساره .. يا جعلني ما أعدم هالبسمه الحلوه)
- مسحوب هذا ؟!
ايه ..
- طيب من هي ساره ؟! ..
عفواً .. عن اذنك ..
- لا تطول ..
يصير خير ..

- "معقول تترك عيوني ما تطمنها .. ياحي قلبي عليك موقفٍ نبضه" ..
لمين هذا .. !!
- لي أنا ..
صح قلبك ..
- منكسر ؟! ..
قلبك !! .. 
- بعيد الشر عني .. البيت أقصد ..
ما ينكسر دامه من شعورك (كُتب) ..
- مبسوط بيتي .. ياخي شكراً ..
حاضرين ..


راحت سنين ..
وبسبب هذا الكلام ..
أيامنا تبكي حنين ..

ما ألوم الشعر فينا ..
حنا ياللي مع بعضنا .. 
ما توقفنا وحكينا ..
في حدود الشعر طبعاً ..
بيت منك وبيت مني ..
لين غبتي .. وانتهينا .. !

من يقوله ..
مـ انتهينا ..
الفراق إن كان حل ..
باقيه لأيامي ظل ..
ما تفارقني بيوتك ..

كنت أرددها علي ..
أحيان .. فترات زعلي ..
وأحيان .. لا من صرت رايق ..
وأذكر إني كل ما رددت لك بيت أتضايق ..
وين صوتك ؟! ..
بحتك .. في يا حبيبي ..
نبرة اللهفه .. بـ أحبك ..
ابتسم .. حنيتك ..
والتفاصيل "الكثيره" ..

ياه .. يـ الدنيا الصغيره ..
هذا أنتي ؟! ..
وش ذكرك ..
وش رجعك ..
ما كان باقي شوي وأسلى ..
- هاه .. أروح .. 
لااااا .. معك أمزح خلاص اكتفيت من الجروح ..
- طيب اسمع ..
سمي قولي ..
- أنا قلبي يا حبيبي .. من ظروف الوقت يدمع ..
فضفضي لي ..
- ماهو وقته .. هذا رقمي .. اتصل بي بس تفضى ..

ومن فضيت ..
اتصلت ..
صوتها جاوب .. هلا ..
وما قدرت احكي .. وبكيت ..
وهي بكت ..
قوّيت نفسي ..
كيف حالك ؟! ..
ردت بصوت التعب .. مشتاقتن لك ..
وش بصوتك ..
- فاقدك ..

أخذنا نحكي .. 
ونتذكر ..
ونتذكر ..
ليييييين ما راحت سنين ..
وبسبب هذا الكلام ..
أيامنا تبكي حنين .. !

..
النهاية ..
أو صراحه ..
ما حصل شيء من هالحكاية ..
كنت أحلم فالزمن لو كان عاد ..
كيف بتكون .. النهاية .. من عقب ثاني بداية ..





ليست هناك تعليقات:

إرسال تعليق

سيتم إدراج تعليقك بعد الموافقة عليه وشكراً،