الاثنين، 6 أكتوبر 2014

ذكرها يا صبح من تالي ممل

اشرقي يا شمس من بين السحاب ..
فـ الصباح اللي تجيبينه .. أمل ..

ودي ألمح عمر .. شتته الغياب ..
يمكن أجمع حلمي اللي ما كمل ..

وأقدر أنسى .. ليلي المكسو عذاب ..
والشعور اللي بذكراها .. ثمل ..

انتظرت سنين لين القلب .. شاب ..
وشلت فيني لين ما عدت احتمل ..

غايبه .. مدري نستني أو سراب ..
كل ما جيت أوصله عني (همل)* ..

الوله .. من كثر دمع الفقد ذاب ..
وذكرها فـ البوح من تالي .. ممل ..

أشرقي يا شمس من بين السحاب ..
فـ الصباح اللي تجيبينه أمل .. !


هَمَل: ذهب .. يعني راح .. بس بالزلفاي :)

الجمعة، 3 أكتوبر 2014

ارتواء

ماضي .. هوا ..
تنفسه قلبي .. وعشت ..
سنين موجوعه معك ..
وألحين محتاج لـ دواء .. !

باقي مرض عشقك معي ..
وآثاره أقوى من .. تزول ..
أسامحك ؟
وأزعل عليك ..
أطيب .. وأحس بذبول ..

شـ كان .. ما كان الألم ..
ضجيج راسي ما هَدى ..
بـ أنساك .. موتي داخلي ..
يا جعلني لـ عمرك فداء .. !

ما للتناقض بك أخير ..
أحسني فيك متلبك ..
يكتبك حرفي .. زعل ..
وأقراك بعيوني رضا ..
وأكرهك من قلبي .. وأحبك .. !

لا تجين ..
اللي شهقته من هواك ..
أكثر من اللي بي سجين ..
وكل طعنه منك تبرا ..
بس لي .. لا ترجعين .. !

وداعة الله .. يا سحاب .. سنين ممطرني جفاف ..
وكل يوم أوادعه ..
وأرجع أبي منه ارتواء .. !

الاثنين، 15 سبتمبر 2014

مـ الله كتب لي بك فرح .. !

فتحت صدري واحتويت الأماني ..
والواقع أصدق من شعوري وكذبت ..

هذا أنا من طحت بالحب .. أعاني ..
وما زالت أعاني فيه للحين وما تبت .. !


ضمد جروحك بي .. ورح .. 
ما دمت قبلك منجرح .. 
لا تستحي من دمعتي .. 
مـ الله كتب لي بك فرح .. !

العمر قد جاوز حدودك ..
ياللي تماديت بـ صدودك ..
موَّت عنك غيرتي ..
مـ الله كتب لي بك فرح .. !

أذكرك وأنساك وأتمنى ..
ما كان هالحب ولا كنا ..
والشوق زود حيرتي ..
مـ الله كتب لي بك فرح .. !

بـ اقفاك لا تلتفت يمي ..
وإن جيت .. ذكرني بـ همي ..
واشمت علي في رجعتي ..
مـ الله كتب لي بك فرح .. !

هذي النهاية .. والسلام ..
اقفل على ابواب الغرام ..
ولا .. لا تهمك خيبتي ..
مـ الله كتب لي بك فرح .. !

أدعي عليك، بصوت خافت وخايف ..
ود أنتقم منك .. ولا ودي أكرهك .. !

الجمعة، 30 مايو 2014

ذكرى وتلويحة وداع .. وصوت غيمه ..

عطري سنين أعطف عليه ..
ما أُفرغه ..
له زاوية في غرفتي ..
لا ضقت أجيه ..
وعادتي ..
فالصبح أشمه ..
وابتدي يومي معاه ..
وقبل مـ أرقد ..
لـ أجل يرقد شوقي الميت عليه ..

--------------------------------------

ذكرى وتلويحة وداع .. وصوت غيمه ..
والدموع بكل طاري لك تهل ..

أسقي بشوقي محبتك القديمه ..
لين ما حرفي من شعوري نهل ..


--------------------------------------

لا تكَسَّرك الظروف وتضعفين ..
أنتي أقوى من حنينك قاوميه ..

ما يرد الضعف أي الراحلين ..
والصُدف ما تعرف اللي نحتريه .. !





الأحد، 4 مايو 2014

أمل بعيني وين يممت أشوفه

في عمري أنت للمشاعر حقيقه..
أمل بـ عيني .. وين يممت أشوفه..

الراحل اللي فيك مر بـ طريقه..
لقى ملاذه بك من أقسى ظروفه..

سكَّن ضجيجه واحتوى الصبر ضيقه..
واستلهمت منك الأماني .. حروفه..

اليوم .. فرحه والمعاني .. عميقه ..
وأكثر من الـ (مبروك) جوات جوفه ..

على مهلك ..
تحرك الإحساس .. لـ أجلك ..
أبكتب بك ولو قصرت ..
يكفيني إذا مريتي فـ بالي ..
أحاكيني: أنا عبرت ..
لو شوي ومن أجلك ..

أكتب وأعيد اللي كتبته .. وأنا أبوك ..
ما أحس به وصَّل مشاعر حبيبك ..

يا طفلتي .. من قلبي آقول: مبروك ..
أثمر تعبك .. وطاب لك مثل طيبك ..

السبت، 3 مايو 2014

٣ أيار

راحت سنه بالعمر فيها وفيها ..
وأشد شيء اللي كسبته خسرته ..

حسايفي ما هي علي وعليها ..
على أنين الصبر .. واللي انتظرته .. !


٣ أيار .. ميلادي ..
صباح الخوف ..
أنا هادي ..
أحس بعمري الـ مفقود .. 
يسمعني وأنا أنادي ..
من أنادي ؟! ..
شبابي دون طيش ارحل ..
ولا تذكرني عنادي ..
طموحي .. لا تخليني ..
أبيك تطول بصبري ..
وقول: آمين ..
ربي حقق مرادي .. 
شعوري .. شَيَّبْ فـ شعري ..
ولكن لا تخلي العين تدمع شوق فـ بعادي ..
حنيني .. والصبر كذبه ..
إذا صاح الطفل جواي ..
قله بس يا مسكين .. ما تذكر من البادي ؟! ..
ويا حزني ..
عليك الله يا حزني ..
وش أحكي عنك .. وأنت بكل حرف ألقاك ..
حتى اليوم ماليني ..
عليك الله يا حزني .. شلون أنساك ؟!
وأنا ذاكرك .. 
حتى بـ يوم ميلادي ؟! ..

تقدم يا عمر .. وأقطف حصادي لو بدا تالف ..
غرست بواقعي .. حلمي .. ولا مرت عليه الشمس ..

غدي لو جيت به يجرح على التجريح أنا والف ..
لأن الصبر قواني .. وربتني جروح الأمس .. !




السبت، 15 فبراير 2014

شعور مهيب

الليالي دونك .. امتليت عنا ..
كيف مـ أسهر لك تعب وأنا حبيب ..

وكيف أعبر عن شعوري لك وأنا ..
كنت أعيشك وأنتي لـ غيري نصيب ..

أزرع الاحساس في غيري هَنا ..
وأقطف الشوق المبلل بالنحيب ..

قلت أحبك لين موتي بك .. دنا ..
وانتهت دنياك في جوف الغريب ..

يا بعد من لـ أعذب احساسك جنا ..
الأماني في نهايتها .. تخيب ..

والصمود اللي تخبرينه بنا ..
طاح لكن باقي شعوره مهيب ..

تعرفين..
اليوم لو منك فنا ..
قلبي المحتاج فـ الذكرى .. يطيب ..

الدقايق ما لها عنك .. غنا ..
كل ما حولي بـ نبضاتك رطيب ..

ما يفوت الوقت ما دمتي هنا ..
لو يغيب الصوت .. حبك ما يغيب ..


الأربعاء، 1 يناير 2014

يتيم ذَكَّره الفرح جرحه .. ولا ينسى ..

يتيم:
يا مساء الذكريات .. إن كان لـ خطاها صُدَف ..
مشّني لعيونها صدفه .. تعبت الانتظار ..


ذَكَّره:
شاعرك، سيدك، حبيبك، ما تميّله الظروف ..
وان لمستي به طفل .. حساس لكنه قوي ..

مر من فتره مكان .. أول لقاء مليان خوف ..
وانسدل مع دمعته .. شوق(ن) وعيا ينطوي ..


الفرح:
راحت عيوني على الصوره .. وضميتك ..
وانهال دمعي من الفرحه على الرسمه ..

ما لامست ظهرك .. كفوفي وحسيتك ..
حسيت .. بـ عيونك الخدرات والبسمه ..


جرحه:
في شتات الحب يسأل: وين صار وكيف كان ..
من قطف زهرة شباب الحب .. لكنه رحل ؟! ..

ما رحل بـ سكات .. ليته .. راحل وما كان خان ..
ولا أخذ كل الشعور .. وتارك لـ غيره محل ..


ولا ينسى:
ما جيتك بـ كيفي الـ .. طاغي على ذاتي ..
أروح وأرَجّعْك .. مشتاق لك .. وأقسى ..

لـني أحبك .. كثر صدي وطعناتي ..
عَجَزت لا أبَعَّدكْ عني ..  ولا أنسى .. !