الخميس، 24 مارس، 2016

حبك سماء

حبك سماء ..
والعمر طاير في هواك ..
أهواك ..
يا غيمة شعور .. إذا هتنت يُنبت أحاسيس الضمى ..
وأضماك .. !

حبك سماء ..
وصوتك مدينة هادية ..
وأضواء همسك .. تاخذ ايدين العمى ..
للنور .. من فوق الظلام ..
وأعيش في حبك سماء .. !

حبك سماء ..
ظله وطن .. ألقاه في أية مكان ..
ولا وهن ..
قلبي بـ حضنه ارتمى ..
وللحين لاقي به أمان .. !

حبك سماء ..
ربيت فـ أحلامه .. وفي صدري نماء ..
يكبر أماني محققه ..
يكبر فرح ..
يكبر سحاب ..
يكبر بعد .. ويصير لي (حبك سماء) .. !

الأحد، 20 مارس، 2016

مبطي عن الحرف

السلام عليكم ورحمة الله وبركاته،،
ساعدوني أرجع أكتب .. اشتقت للحرف وأقول:
مبطي عن الحرف والقيفان لا صدت ..
أحس بالذنب وأستغفر وأحايلها ..

قصايدي مع نضوج الفكر ما ردت ..
يبي لها هبال يغريها ويشعلها ..

---------------------------

الأبيات أدناه، لقيت جزء منها محفوظ كمسودة من 2014 :) اعذروني لو كانت منشورة من قبل ..

---------------------------

بالذاكرة صورة وبالقلب غصة ..
والعين تدمع كل ما ذكروها ..

للراحلين وفقدهم ألف قصه ..
راحوا لخالقهم وهم ماقروها ..

---------------------------

ناسيك .. وأحس بخسارتك فيني ..
لا طحت واحتجت لتعضد ولا قمت ..

وأذكرك .. فالبسمات يا نور عيني ..
وأحكي بـ حبي لك على الدمع والصمت .. !

---------------------------

الحب ما له وقت .. لا ..
ما ينتهي لك .. حب حي ..

ولا يموت الا معاي ..
ولا يعيش الا بـ ايدي ..

---------------------------

لذة أيامك بـ صدري .. عن غيابك .. توها ..
لا بعد عن يوم .. يوم تزود وأحن وأبيك .. !