الاثنين، 13 نوفمبر 2017

وش عليه إن هلت العبرة عليه ..

الشعور اللي تخبى في ضلوعك ..
وش عليه إن هلت العبرة عليه ..

أطلقيه إن كان ما يسوى دموعك ..
حتى لو يسوى دموعك أطلقيه .. !

-------------------------------

أنا تغير في طباعي لك كثير ..
ومو كثير إني عشانك آتغير ..

دام حبك في شراييني كبير ..
ما أبي في يوم أحس إني (صغير) ..

-----------------------------

والدعاوي مع صباح الخير بدري ..
كنها تمطر علي راحة وخير ..

ويزهر الإحساس لك في وسط صدري ..
غيري وأنتي طول عمرك فيني غير ..

---------------------------

أنا بعيوني غيرك أنتي ولا أشوف ..
الاك ياللي شامخه في عيوني ..

في مظهرك في مخبرك زينة وصوف ..
كنك قصيدي لارسمك بشجوني ..

والموقف اللي صار قد صار محذوف ..
ترا المسفه ما تحرك سكوني ..

أنا بعيوني غيرك أنتي ولا أشوف ..
الاك ياللي شامخه في عيوني .. 

الجمعة، 1 سبتمبر 2017

كل عام ووقت جداني بخير ..

كل عام وضيقة الخاطر بخير ..
أشعر إني في زمن ما هو زماني ..

أدعي الله ودني لين الأخير ..
للنهاية يمكن أعرف شيء ثاني ..

غير ماني عارفه يومي صغير ..
في طباعي وبسلوكي والأماني ..

ليه ؟
فـ صدور المجالس هالحقير ؟
وكيف ذاك الخزي برقبته يباني ..

وذيك بين الناس تنشر ما يصير ..
ولا أحد غيري يشوف ولا يعاني ..

كل عام ووقت جداني بخير ..
دامي أشعر هالزمن ماهو زماني ..

الخميس، 24 أغسطس 2017

آسره .. ما تختشين ؟

للشوق راوي في وجودي ولا باس..
من ضامه فراقي يجيني وأسلم..
أنا هنا ما أغيب لا غابوا الناس..
وأحس باللي جاء لو ما تكلم..

آسره، ما تختشين ..
ليش هذا الزين كله ؟ ..
ليش توك لي تجين ؟
بعد ما جف الشعور ..
وما بقى في حنين .. 

بس شوفك.. 
تعرفين ؟ 
يقطف الاحساس فيني ..
والمشاعر لك تمايل .. 
احكي احكي .. دام حكيك لي وتين ..
وضحكتك ترسم أماني ..
يا بعد هاك السنين ..

حلم .. والابداع قصه ..
والغزل شاعر حزين ..
يطيب .. 
يزهى .. 
كل ما تتبسمين .. !




الدمع لا حدر عليها من الشوق ..
ماهوب عيب الا فخر وآتباهى ..
حبيبتي بنتي لو العمر ملحوق ..
أترك حياتي وين تمشي وراها ..


السبت، 29 أبريل 2017

ضم أمنياتي

ملاذي الأول وصدر التوجع ..
جيتك وأنا مهموم ضم أمنياتي ..

منيب محتاج لطموحي مشجع ..
محتاج من يقرا علي سيئاتي ..

قدمت فأحلامي وأنا كنت أرجع ..
ما كن به دافع ولا شيء .. آتي ..

كذبت بالواقع، وصدقه يفَجَّع ..
غيبت نفسي عنه في ذكرياتي ..

انفث مدامي فيك، قمت آتسجع ..
كودك تبرد حرتي في حياتي ..

واسهر معي لا صاروا الناس هُجع .
جب من جزيلك ما يجمع شتاتي ..

ملاذي الأول .. وصدر التوجع ..
جيتك وأنا مهموم ضم أمنياتي ..

الأربعاء، 12 أبريل 2017

عثرة الأحلام ما تقطع رجاي

من ظلام العين .. للنور .. لهذاي ..
مر في لمحه عسى ذكراه تبقى ..

عمري اللي فات أهايد به غثاي ..
دام خطواتي إلين ألحين ترقا ..

عثرة الأحلام ما تقطع رجاي ..
والطموح لطالب الأمجاد مسقى ..

ما يحدد مبتداي ومنتهاي ..
غرس عام، وحب حي، ودمع فرقا ..

عايش .. أخطي وأتعلم من خطاي ..
ومثل مـ أفرح .. لازم بدنياي أشقى .. !

الاثنين، 10 أبريل 2017

غير الحياة

غير الحياة ..
أيامي الحلوه معك ..
والله غير ..
أكتب شعور ..
وكل ما تظلم علي ..
ألقاك نور ..
أحب ..
ما تعني وتغني ..
أنتي راحه من وصب ..
حاجه أكبر ..
من أنين إنسان كسره التعب ..
ومل يصبر ..
لين جيتي له فرج ..
وإن قلت أحبك لا حرج ..
بس ما توفي الشعور ..

الثلاثاء، 28 مارس 2017

لا تصير إنسان لين .. !

الضيق فالبسمات بيَّن ..
لا تحاتي يا حنيَّن ..
طيب وبالك وسيع .. وكل همَ فيك هين .. !
ابتسم له بس .. واشك ..
اشك للي قدره ..
وإن شان وقتك له تزين ..
خل أكبر منه وأقسى .. لا تصير إنسان لين ..

قلبي يراعيك في قوك وفي ضعفك ..
ما وده إن الشعور يضايقك مره ..

قصايده توصفه وتجود في وصفك ..
وإن ضرتك فالشعور شعوره تضره ..

الصبح تنهيدة طفل ..
مـ أحلاه .. إذا جفل ..
ملامحه طهر الحياة ..
ولا تبسَّم يشرق النور بشفاه ..

الحب ما هو فالعمر ..
شيب وعيش في كبد ..
من طاح به مثل الخمر ..
يفقد شعوره للأبد ..

تهد حيلي كل ذكرى عليها ..
وأقول أبنسى لكن القلب عيا ..
هي ما تبيني بس روحي تبيها ..
غصبن علي والله ما هو بـ ايديا ..

خلوا لي الحب وآنا لا تخلوني ..
أعيش مكسور للفرقى وذكراها ,,
ياللي تعرفونها تكفون دلوني ..
عباير الشوق ما بي حيل(ن) أدرها ..

ما أحب الضيق لكنه ييجي في كل سيره ..
والصدر موطن هموم ودمعتي دمعة غريب ..
التعب لا زاد أقول: الله يجعل فيه خيره ..
باكر الدنيا تزين وكل ما فيني يطيب ..